列王紀上 10章1節 到 10章13節   背景資料  上一筆  下一筆
Chit章thang分做兩個段落來看;第一段是第1到13節,描寫所羅門ê智慧遠近馳名,大家lóng想beh來kah伊學習。Chia紹介一位女王示巴,因慕名而特別遠tùi非洲來kah所羅門認bat、學習。第二段是紹介所羅門ê財富,mā講出tī伊執政下,以色列國勢到à siōng顛峰ê時代。

這是一段非常頂港有名聲下港有出名ê故事,mā同時記載tī歷代志下第九章1到12節。Chit段有關示巴女王訪問所羅門ê事,連耶穌基督tī教示ê譬喻中,mā有提起(參考馬太福音十二:42),就thang知影chit件事tī以色列人中非常廣傳。比較受爭議ê是,真正有「示巴」女王chit-ê人mah?怎樣可能千里迢迢去訪問所羅門,只是為tio̍h beh測試伊ê智慧?tī創世記第十章28節,提起閃族ê後裔中,有「示巴人」。Tī約珥書第三章8節mā提起「遠方ê示巴人」。有kóa聖經學者認為「示巴」,就是設tī阿拉伯西南部ê所在,今á日ê葉門國境內。當時是一個tī商業、文化上lóng真發達ê國家,tùi伊所帶ê禮物kah隨從之多,thang看會出伊ê國家tī經濟發展上是非常bē-bái ê。因為án-ne,有kóa學者認為伊來訪問所羅門,正是kah通商有關。

第1到5節,chia真清楚看tio̍h所羅門因為tī上帝賞賜ê智慧治理之下,國勢日蒸有盛名,真chē慕名而來ê訪問者,「示巴女王」就是其中之一。其實,示巴女王來訪問,並無純粹是想beh瞭解所羅門到底有甚麼特別ê智慧,tùi伊ê隨從所帶來ê大批物件,就ē-tàng看出這是一chōa附帶貿易談判ê事務。當然示巴女王mā tùi所羅門建造ê聖殿、宮殿等,lóng看tio̍h一個全新ê以色列國之國勢強大,而知影以色列國已經kah過去士師時代,不時被外族人侵犯ê時代,已經大無相仝。

第6到9節,chit段經文是示巴女王對所羅門ê o-ló。其實,這mā是一段真典型ê國際禮儀中讚譽外交國領袖ê官方話語。第9節記載示巴女王位所羅門祈福ê話,並無表示伊mā相信上帝,卻是因為古代ê人相信每一位國王lóng是kah其所信ê神ê氣力有關。偉大ê君王往往被譬喻為「神」。示巴女王tī o-ló賞賜恩典hō͘所羅門ê上帝ê時,其實就等於是o-ló所羅門。

第10節,tùi示巴女王送hō͘所羅門ê禮物,mā看會出伊ê國家mā不弱,chit點tùi伊送「四千公斤中ê黃金」hō͘所羅門就thang看出來。

第11到12節,chit段thang連連tī第九章28節後面。希蘭王照約束kā貴重ê「檀香木」運送到以色列來,供應所羅門建造聖殿kah王宮ê路用,同時iáu有真chē「珠寶」。其實,作者kā chit兩節編撰tī chia,mā有一個用意,beh表示就tī示巴女王造訪所羅門ê時chūn,希蘭王ê船隊mā照約束來到以色列,hō͘示巴女王大開眼界,說明所羅門tī外面交上ê能力。因為伊所看tio̍h ê是hit種貴重ê檀香木,hiah-nih-chē珠寶,以及高等ê建材等等,chiah-ê lóng ē-tàng顯示一個國家ê富強。

第13節,chit節講所羅門mā tńg來贈禮物hō͘示巴女王,雖然chia並無列出禮物ê內容,m̄-koh貴重是想像會tio̍h ê。作者用一句「凡是示巴女王要求ê」,所羅門「lóng hō͘她」。

重新查詢 專卷研經 列王紀上系列
錯誤回報,請聯繫