列王紀上 1章1節 到 1章10節   背景資料  下一筆
列王記上、下分卷點是用北國以色列亞哈王朝ê結束(上卷廿二:37),kah南國猶大王約沙法王死後無久(上卷廿二:50)作分界。

Tùi第一章1節開始直到第十一章43節止,chit段lóng是用所羅門王ê記事為主軸。接落去tùi第十二章開始,就是描述以色列王國分裂做做南kah北兩國ê情形,而所有分裂ê經過kah了後ê情景,是tùi上卷第十二章起,一直到下卷第十七章41節止,交替紹介南、北兩國ê狀況,然後tùi下卷第十八章開始,記載南國猶大ê情景,直到第廿五章猶大王國被巴比倫帝國消滅,人民hông掠去做奴隸ê經過。

第一到二章,是記載大衛王kā王位傳承hō͘伊kah拔示芭所生落來ê kiáⁿ所羅王ê經過。Mā是tùi大衛王開始,王位tùi原本上帝揀選,變成做世襲ê制度。單是chit點已經teh暗示大衛脫離上帝原本ài先知揀選君王帶領以色列人民ê本意。

    Chit段經文描述大衛晚年ê時,伊ê眾kiáⁿ開始有密謀篡位ê動作,特別是siōng有可能繼承王位ê亞多尼雅因為忍不住氣,就想beh擁兵宣告家己為王。這mā teh表示大衛晚年無法度巡視國政大事,眾kiáⁿ爭取王ê宮廷鬥爭浮出檯面上。

    第1到4節,作者一開始就講「chit時chūn,大衛已經老邁」,所謂「老邁」,應該是「七十歲」。因為伊是tī三十歲ê時被膏立為以色列ê王,然後伊統治四十年,其中包括tī希伯崙統治猶大七年半,tī耶路撒冷統治以色列kah猶大共計三十三年(參考撒母耳記下五:3—5)。可能是因為年邁體衰,因為án-ne,伊ê臣僕替伊chhōe一位名叫「雅比莎」ê處女服侍伊,伊並m̄是被選來做bó͘ ê,卻是類似今á日ê看護工作仝款,這mā是第4節所講ê,大衛無kah伊親近ê意思。Chit點mā kah後來亞多尼雅請求所羅門kā chit位cha-bó͘-gín-á hō͘伊做bó͘有關(參考二:17)。這是古代社會一種特異ê看法,認為hō͘處女睏tī cha-po͘人身上thang取暖,hō͘身軀健康。M̄-koh作者mā特別強調,大衛「無kah伊發生關係」。

	第5到8節,大衛ê大kiáⁿ暗嫩被押沙龍殺害,第二kiáⁿ基利押(只出現tī撒母耳記下第三章3節),而押沙龍因為叛變死去,chit-má大衛kiáⁿ中以亞多尼雅為伊ê kiáⁿ群中是siōng年長ê。伊第一個想beh ê就是得tio̍h王位繼承權。事實上當時伊ê條件siōng好,m̄-koh伊無經過大衛同意,就爭取到元帥約押、祭司亞比亞他ê支持,m̄-koh卻無得tio̍h「祭司撒督、耶何耶大ê kiáⁿ比拿雅,以及「先知拿單、示每、利以,kah大衛ê眾侍衛」ê支持,這表示伊雖然有得tio̍h約押ê軍方勢力支持,m̄-koh siōng重要ê,是大衛ê禁衛軍,特別是先知拿單等人ê支持,這真危險。

Tùi chit段經文看tio̍h亞多尼雅bē記得約押擁有兵權而且恃兵而驕,真oh駕馭,大衛是一直teh想辦法beh除掉伊(參考二:5-6)。因為án-ne,伊chhōe約押本身就是一步危險ê棋子。Á約押kah亞比亞他之所以支持伊,真可能是因認為亞多尼雅是大kiáⁿ,繼承王位乃是理所當然ê事。Mā tùi chia看出當時王宮裡有兩派人馬,一派擁護亞多尼雅,另外一派則擁護所羅門。擁護所羅門ê是用先知拿單為首,加上祭司撒督,以及大衛ê侍衛軍團,這mā形成非常堅強ê一股擁護所羅門繼承王位ê勢力。Á先知拿單是主導hō͘所羅門繼承王位ê主要人物。

    第9到10節,有一工,亞多尼雅舉辦獻祭禮儀,而且排設筵席宴請大衛其他ê kiáⁿ,mā就是伊ê眾小弟kah王室大臣,m̄-koh卻獨漏先知拿單、比拿雅、同父異母ê小弟所羅門,以及王室ê侍衛軍。

重新查詢 專卷研經 列王紀上系列
錯誤回報,請聯繫