哥林多前書 9章1節 到 9章14節   背景資料  上一筆  下一筆
Chit-má使徒保羅開始講tio̍h有關傳道工作ê問題,chiah-ê kah-ná kah頭前所談ê問題lóng無關聯,其實不然,因為tī第八章9到13節中,伊提起有關基督徒「自由」ê問題,特別是tùi食物ê問題看信仰生活中ê「自由」。自由應該kah責任相輔相成,有自由,就會有責任ê問題。Tī第八章裡,伊一再強調基督徒ê自由一定tio̍h考慮tio̍h tī信仰上脆弱ê兄弟姊妹,m̄-thang因為家己tī信仰上ê認知比較周全,á是經歷比較多,而傷害到hiah-ê信仰上tú起步,á是尚且在學習階段ê人。

第九章是使徒保羅進一步以家己為例,teh解釋「自由」ê問題。Tùi chit章thang清楚看tio̍h使徒保羅並無想beh替家己辯護甚麼,伊只是想kā哥林多教會ê信徒講:做一個基督徒,tī信仰裡談「自由」ê時,所beh付出ê代價遠比一般人所要求ê水準koh khah高。如果無chit種信念kah認bat,談信仰上ê「自由」是真空洞ê。Mā就是講,一個人beh享受自由,就一定tio̍h為自由付上真chē代價。Koh khah重要ê是,「自由」siōng大ê特色是用「心甘情願」為基礎,所以談信仰上ê「自由」,就無法度有心存驕傲ê態度,卻是寧可屈就家己,kah卑微ê人做伙,這mā是耶穌ê教導(參考馬可福音十:43—45)。

Chit段經文mā thang看出哥林多教會內部有人teh論到傳福音者領受酬勞ê事。而且利用chit-ê機會tī背後議論講使徒保羅可能因為m̄是真正使徒,所以m̄敢接受信徒beh hō͘伊ê酬勞。其實,tùi哥林多後書第十到十一這兩章thang看出,哥林多教會中出現假先知,á是假使徒teh欺騙信徒,m̄-koh為tio̍h beh達tio̍h欺騙ê結果,就會利用機會中傷使徒保羅,捏造各種謠言。使徒保羅Tī chit段經文中,特別講tio̍h家己原本thang享受一切,m̄-koh伊卻甘願放棄,只為tio̍h beh見證福音。伊hō͘哥林多教會信徒清楚知影:真正自由,是會自我約束,而且心甘情願ê付出。Chit種自由chiah是真正自由。

第1到2節,chit兩節講tio̍h「使徒」身分ê問題。Chit種問題tī使徒保羅傳福音ê過程中,一再出現。是有人專門teh使徒保羅開創ê教會散佈chit種話,講伊無跟tòe過耶穌,無算是使徒,所以,所傳講ê福音不真實,mā無權威。Mā因為tī加拉太教會中,chit種聲音koh khah chē,chiah hō͘伊決定寫phe去嚴肅警告,而該信ê踏話頭mā是親像chia仝款,講tio̍h甚麼是使徒ê身分(參考加拉太書一:1)。使徒保羅講真正使徒,是kā福音傳開來,而且因為聖神ê帶領,hō͘聽tio̍h ê人領受而且成做信徒。所以伊講哥林多教會ê信徒就是伊成做「使徒」siōng好ê見證者。

第3到7節,tī chit段經文中,使徒保羅舉出真chē反證來說明,就算伊接受哥林多教會hō͘伊ê報酬mā是應該ê,chit種報酬包括生活中食、lim ê需要。就算軍人mā為tio̍h保護國家而the̍h軍餉,á葡萄園主人mā會食家己栽種ê葡萄,顧羊人仝款會lim家己牧養ê羊ê奶等,chiah-ê lóng是一種真普通ê常識。

第8到14節,使徒保羅Tī chit段經文中繼續說明伊傳福音得tio̍h應得ê報酬ê正確性。伊tī第9節提起摩西律法記載tī申命記第廿五章4節,beh hō͘牛tī田裡工作ê時,mā thang食田裡ê草。作穡人tī田裡掖種,á是收割ê時,大家lóng希望ē-tàng有所收成,chit本是應該有ê份。伊tùi chia切入主要ê問題:使徒保羅表示伊kah同齊ê同工並無án-ne要求哥林多教會ê信徒hō͘ in報酬,只有一個原因,就是無想beh造成誤會,講伊kah同工是去斂財、騙錢ê。伊進一步舉出猶太人ê祭司,thang tùi獻祭者所獻祭ê物件中得tio̍h該得ê食物(參考利未記十:12—15,民數記十八:8—19,申命記十八:1—3),耶穌差派門徒出去傳福音ê時,mā有chit種交帶(參考路加福音十:7)。

重新查詢 專卷研經 哥林多前書系列
錯誤回報,請聯繫