Chit段經文是使徒保羅想beh提供給哥林多教會信徒參考ê信息，就是一個真正有知識ê人，伊bē只考慮家己ê滿足、需要，koh khah會考慮tio̍h別人比家己軟弱ê所在。

第9節，使徒保羅呼籲信徒一定tio̍h「小心」，chit-ê詞是teh指「注意看」ê意思。伊講m̄-thang kan-taⁿ致意個人ê「自由」，soah疏忽iáu有別人存在，結果卻因為家己ê自由，倒成做別人ê絆腳石。Chia提起「犯罪」，意思是teh指離棄上帝。

第10到11節，chit兩節將真正ê問題呈現出來。有知識ê人可能因為自信滿滿，認為tī廟裡食祭祀過偶像神明ê食物無甚麼問題，因為伊ê知識hō͘伊知影偶像神明是虛假ê，根本就無存在，mā m̄免驚惶。M̄-koh卻hō͘有kóa信心軟弱ê人看tio̍h，m̄-koh in並bē真正ê瞭解。有可能因為伊看見有知識ê人做chit款tāi-chì，hō͘伊痛苦而離棄信仰；á是因為看見，mā tòe去食，m̄-koh伊食，並m̄是因為伊真正瞭解，卻是無瞭解下會帶來錯誤 ê信仰認知，致使kā原本得tio̍h ê信仰hō͘混淆，結果會失去耶穌ê救恩，這就等於知識害死去chit-ê軟弱ê信徒。

第12到13節，使徒保羅強調，hō͘一個信心軟弱者會失去耶穌ê救恩，就等於是得罪了基督仝款，mā會hō͘家己失去耶穌救贖ê恩典，後果是得不償失ê。因此，如果有án-ne軟弱ê人在場，tio̍h因為in ê緣故，寧可m̄食。換句話講，信心夠額堅定ê人（指有知識者），m̄-thang我行我素，chit種態度真容易變成驕傲。只有疼心chiah ē-tàng幫助軟弱ê人成長。因此，考慮tio̍h信心軟弱者ê需要，mā是傳福音ê方式。Ná親像使徒保羅寫hō͘羅馬教會ê書信中所講ê：「咱chiah-ê 有能力ê 人， 應該kā軟弱ê 人tàu 擔（taⁿ）重擔，m̄ -thang 求家己 ê 滿足。咱 ta̍ k 人 tio̍ h hō͘ 厝邊歡喜，hō͘  in 得 tio̍ h 利益來建立信心。(全民版)」（羅馬書十五：1—2）