哥林多前書 7章25節 到 7章40節   背景資料  上一筆  下一筆
Chit-má使徒保羅繼續回答哥林多教會信徒提起有關獨身ê看法。Tùi表面起來看chit-ê問題,比起離婚ê事會khah簡單,m̄-koh若認真想一下,並m̄是hiah-ni̍h單純。因為tī chit段經文中mā提起有關已經訂婚ê人,若想beh解除婚約,這就m̄是hiah-ni̍h簡單。

第25到28節,使徒保羅Tī chit段經文中表示一個基本觀念:結婚並m̄是罪惡,而無結婚mā m̄是錯誤。M̄-koh伊提醒,結婚必定會帶來「種種ê拖累」,雖然伊無說明chiah-ê「拖累」是teh指甚麼,m̄-koh thang理解是teh指一種負擔,會有chit種看法,真可能是當時有人想beh專心傳福音,卻因為有家庭負擔而無法度如心所願,á是因為有家庭,致使生活負擔koh khah重,而hō͘家庭出現紛爭。

第29到31節,「時chūn無chē了」,chit句話是chit段經文ê中心思想。早期ê教會「末世」觀念真chiok厚,認為耶穌就teh要koh來,所以ē-tàng減少任何ê負擔,專心tī福音ê事工,就beh全力以赴。「現有ê chit-ê世界teh要過去à」,chit句話koh khah表明使徒保羅mā充滿tio̍h末日來臨ê觀念。

第32到35節,tī使徒保羅ê觀念中,一個人jú少世間ê掛慮,就會koh khah專心天頂ê事。伊無希望有世間ê事煩擾tio̍h人心,而無法度專心仰望天頂ê事。伊認為一個人受呼召,就是為tio̍h beh tī基督koh再臨ê時chūn,kah基督「同齊活teh」(參考帖撒羅尼迦前書五:1—10)。伊希望大家專心斟酌tī基督koh再臨ê事,全心、全力地為福音作siōng好ê見證。

第36到38節,chit段經文mā是ê時常受tio̍h議論ê一段經文。使徒保羅kám講真正是beh kā大家講無結婚khah好?甚至連訂婚ê人lóng thang為tio̍h beh等基督koh再臨ê緣故,kā原本已經確定ê婚事lóng取消?其實,當時ê人普遍有一種觀念,就是「性」是一種罪惡ê行為,chit種觀念tī基督徒ê身上特別chiok厚。結婚,夫妻會發生性ê行為。M̄-koh,有ê人結婚了,卻為tio̍h beh保持所講ê「聖潔」,而拒絕kah bó͘ á是丈夫有性行為。Koh講,早期教會mā可能發生集體生活ê情形,雖然男女聚集做伙,m̄-koh,卻無任何性行為發生,in認為ē-tàng克制家己情慾ê人,是信仰上堅定ê表現。M̄-koh,使徒保羅ê看法是:即使是家己真有抑制能力,mā bē-tàng因為án-ne就不時進行án-ne(同居)ê行為,因為這mā會成做一種誘惑、試探。Tī教會團契生活中,男女分開khiā起是必要ê。若是夫妻,就應該有夫妻共同生活ê責任,這mā是應該。若無,就m̄-thang有hō͘家己進入試探ê陷阱中。

第39到40節,chit兩節經文是針對守寡ê婦女講ê。看起來kah-ná使徒保羅對tī一直守寡ê婦人表示讚賞ê意思,其實,如果koh再對照提摩太前書第五章14節,伊講「寧可少年ê寡婦koh再嫁,生兒育女,照顧家己ê厝」,原因是少年ê寡婦因為生理上ê需要kah上了年紀ê寡婦無仝,tùi chia就thang看出其實伊是看對象ê情況teh講述。

請注意第39節最後一句話,講寡婦koh再婚ê時,「應該以信徒為對象」,意思是teh指:tio̍h嫁hō͘仝款是基督ê信徒khah好。Chit句話原來ê意思並m̄是講一定會koh再嫁hō͘「信徒」,chia所謂「以信徒為對象」,是講如果一個信主ê姊妹守寡,想beh koh再嫁,一定tio̍h會記得家己是一個「信主」ê人。其實chit-ê觀念mā是使徒保羅一貫強調ê,伊一再講基督徒ê身上有耶穌ê「印記」(參考加拉太書六:17,chit所在用「傷痕」,表示十字架ê意思。另外參考以弗所書一:13、四:30)。

另外一方面,第39節ê「一個已婚ê cha-bó͘人tī丈夫活teh ê時chūn是受約束ê」,意思是teh指bē-tàng離婚,這kah第10節講ê「bó͘ bē-tàng離開丈夫」是仝款ê。使徒保羅kah耶穌tī婚姻ê事頂面lóng是抱tio̍h仝款ê看法,就是丈夫往生ê時,bó͘ thang koh再嫁,如果丈夫iáu未往生,bó͘就bē-tàng koh再嫁。原因是婚姻tùi án-ne性命ê約。

重新查詢 專卷研經 哥林多前書系列
錯誤回報,請聯繫