哥林多前書 6章12節 到 6章20節   背景資料  上一筆  下一筆
因為希臘人是輕視肉體,in將肉體看做是無好ê,因此對淫亂ê事並無在意,而且有真chē城市人民tī chit-ê性事頂面mā真隨便。哥林多城就是一個典型ê「淫亂之lóng」。Mā因為án-ne,致使哥林多教會ê信徒mā tòe深受影響。使徒保羅將教會看做是基督ê身軀,每一個基督徒lóng是建立tī基督ê基礎上(參考以弗所書二:20)。所以無法度隨便做tāi-chì,致使基督ê聖潔受褻瀆。做基督教會ê一份子,就無法度隨便以家己ê意見做tāi-chì, tio̍h考慮ê是整體ê。

Tī chit段經文中,thang看tio̍h使徒保羅提供一個重要ê信仰認知:一個人無法度將身軀kah靈魂分開。性命是一體ê,無肉體kah靈魂分開chit款tāi-chì。希臘人就是有chit種觀念,chiah會放縱情慾。In認為肉體是會朽pháiⁿ ê物體,靈魂chiah是聖潔ê。M̄-koh,使徒保羅tī chia強調講m̄是án-ne,伊講身軀就是聖神ê殿,聖神tòa tī身軀內面(參考羅馬書八:9),mā所以咱是屬tī上帝ê。

第12到14節,當有人為tio̍h beh表示家己真有信心,所以甚麼事lóng thang做。這固然無錯,m̄-koh卻無一定lóng有「益處」。注意使徒保羅tī chia用「益處」chit-ê詞,tī希臘文是由兩個字合起來ê;前部分是「συμ」(sum),意思是「做伙」。後半字是「ψερω」(pherō),意思是「帶」á是「堆置」。Án-ne,咱看tio̍h「益處」ê原文「συμψερω」(sumpherō)就是「Kā物件khǹg做伙」ê意思。基督ê教會是一個信仰團契,是beh聚集眾人做伙,m̄是beh分散。所以ài做任何事,就beh想tio̍h怎樣chiah ē-tàng將眾人聚集做伙,m̄是hō͘人分開,這就是使徒保羅用「益處」chit-ê詞ê意思。一個ê時常誇耀家己ê靈命真強ê人,卻往往犯罪,而且所犯ê罪行是連異教ê人mā m̄敢做ê事,chit種人tī教會內,只會hō͘人離開,bē hō͘人聚集。

Chia ài beh特別注意ê是tī第13節,使徒保羅提出一個例,就是有關「食物」ê問題。伊引用哥林多人常常掛tī口邊ê一句話:「食物是為腹肚,腹肚是為食物。」使徒保羅並m̄是反對人性上有chit種需要,伊反對ê是濫無顧忌地放縱,所講ê暴飲暴食,á是放縱情慾ê行為。伊koh一pái提醒哥林多教會ê信徒一定tio̍h ân-ân記tiâu,信耶穌基督ê人,就是為tio̍h基督而生活。基督徒性命之可貴就是tī koh活,因為上帝已經hō͘耶穌基督tùi死裡koh活,mā tio̍h hō͘信靠伊ê人仝款koh活。

第15到17節,這是繼續teh詮釋頭前一段提出ê問題。使徒保羅tī chia提起保持潔淨身軀ê重要性,因為基督徒是kah耶穌結合做伙ê,伊tī第16節套用了夫妻關係來形容基督徒kah耶穌之間ê關係,是連結做伙,無法度分開ê,ná親像夫妻ê關係一般。Chit種觀念一再出現tī伊所寫ê書信中(參考以弗所書五:25—32)。

第18到20節,使徒保羅希望哥林多教會ê信徒tio̍h避免淫亂事件發生,是ài in堅持信仰上ê忠貞,因為信耶穌ê人如果犯淫亂罪,所象徵出來ê m̄-nā是身軀上ê問題,koh khah嚴肅ê,是心靈上ê。因為每一個基督徒lóng是身上帶有耶穌ê記號,是上帝ê殿。這殿是為tio̍h beh敬拜上帝。所以每一個信徒lóng tio̍h「屬tī上帝」ê chit種觀念。Á第20節講「用重價買來」ê,chit種「重價」指ê就是耶穌死tī十字架上ê性命。

重新查詢 專卷研經 哥林多前書系列
錯誤回報,請聯繫