哥林多前書 4章1節 到 4章13節   背景資料  上一筆  下一筆
使徒保羅tùi開始就建立一個siōng基本ê信仰認知:每一個信耶穌ê人,lóng是耶穌福音ê奴僕。有奴僕ê認知了後,就bē驕傲,認為家己真重要,真了不起而看bē起別人。只有kā家己建立tī福音事工上奴僕ê角色,chiah會知影tī福音事工上,無誇耀家己ê成就。

另外一個問題是,面對哥林多教會分黨結派ê情形,並且是用伊kah其他如亞波羅、彼得等人ê名義所組成ê派系,伊mā一定tio̍h hō͘ in正確ê糾正,免得伊kah其他同工ê名koh一pái hō͘人誤用,而損害了福音ê聖潔。

Tī chit段經文中,使徒保羅強調福音ê奴僕並無甚麼好誇口ê,所以就無甚麼資格去批評別人ê長短。因為奴僕ê工作,就是先kā家己ê本份ê tāi-chì做好。伊對hiah-ê用伊kah其他門徒名義結成黨派ê人提出明確ê指責,講in是驕傲ê一陣信徒,chit種信仰態度並bē-tàng取。

第1到2節,chit兩節真清楚,使徒保羅提起任何參與福音事工ê人,lóng是福音ê奴僕。奴僕ê職責就是對主人忠心。Chia特別指出「上帝之奧秘」,意思是teh指福音ê信息,tī一般人看起來是愚戇ê,m̄-koh tī福音事工ê人看起來是性命拯救ê氣力。

Koh講,使徒保羅講「應該kā阮當做是基督ê奴僕」,chit句話是使徒保羅tī宣教工作上為家己所做ê定位,mā是hō͘所有為福音事工獻身ê每一個人非常重要ê認bat。Chit句話同時mā是teh kā哥林多教會ê信徒講,m̄-thang kā使徒保羅、亞波羅、彼得等人看做是「領袖」,á是教會ê「頭」,hit種看法是有錯誤 ê。既然是「奴僕」,就無所謂「領袖」thang講。

第3到5節,使徒保羅提起:人ê審判事小,上帝ê審判chiah是siōng重要ê事。因為上帝是審判人心內動機ê上帝。只有祂chiah明白所有ê一切,因為所有隱藏ê,lóng將tī上帝面前顯露出來(參考希伯來書四:13)。所以使徒保羅tī chia koh一pái提醒信徒,m̄-thang隨便評斷人。因為人ê評斷bē標準,mā無一定正確。

第6到7節,所謂「chiah-ê tāi-chì」是teh指分黨結派ê事,使徒保羅特別用家己kah亞波羅做例,表示伊ē-tàng hō͘家己á是亞波羅hō͘人指責,m̄-koh無希望哥林多教會ê信徒彼此之間有分裂ê現象。因為一切lóng是tùi上帝來賞賜,無人ē-tàng自認比別人koh khah高貴、有地位。

第8到10節,chit段經文真清楚指出哥林多教會信徒ê驕傲,in認為家己比別人koh khah高貴,koh khah有才能。所以使徒保羅故意用非常明顯ê對比,而且語帶諷刺句來說明家己kah其他同工ê卑微,故意凸顯哥林多教會信徒自認ê高貴,而使徒保羅故意kā家己kah其他同工自認ná親像被羅馬帝國俘虜beh送去競技場被恥笑ê囚犯仝款。

第11到13節,這幾節經文thang參考哥林多後書第四章7到12節、第六章4到10節、第十一章23到33節、第十二章10節等等。Tī chiah-ê經文中lóng ē-tàng看出使徒保羅所經歷到ê困境。這真清楚說明一點:真正傳福音ê人,是ài面對迫害者ê欺壓、迫害,bē爽快到有時間去內爭、相鬥,chiah-ê lóng是閒來無所事事ê人chiah會有ê現象。M̄-koh身為基督信徒,lóng會因為領受耶穌ê救恩,無閒beh kā chit大好消息設法傳揚出去。伊tī第12節chia講家己是靠「「雙手辛勞工作來飼家己」,chit點thang tùi使徒行傳第十八章3節看出來,使徒保羅是óa靠織帳棚飼家己。

重新查詢 專卷研經 哥林多前書系列
錯誤回報,請聯繫