哥林多前書 2章6節 到 2章16節   背景資料  上一筆  下一筆
Tī chit段經文中,使徒保羅以人ê智慧kah上帝ê智慧之間ê差別做對照;伊特別指出上帝ê智慧是種奧秘,m̄是人ê智慧ē-tàng解開,除非有聖神tī人心內中做工chiah會有效果。

第6到8節,chia ê「靈性成熟ê人」,相對tī第三章1節所提起ê「信仰上ê嬰á」。使徒保羅講對chit種ē-tàng認真思考性命問題ê人,伊所傳講ê,是屬tī「上帝奧秘ê智慧」。Chia所講ê「奧秘」,原本是teh指隱藏,無為人知影ê事,taⁿ已因上帝ê啟示,hō͘人明白、頓悟過來。Tī使徒保羅ê書信中,「奧秘」是teh指:1.有關上帝救贖ê工作(參考二:1),2.死人koh活(參考十五:51—52),3.上帝ê創造 (參考二:7),4.婚姻ê關係(參考以弗所書五:32)。5.外邦人信主耶穌,猶太人拒絕(參考羅馬書十一:25)等。

第9節,比較麻煩ê是chit節ê出處Tī聖經中chhōe bē-tio̍h。主要teh表明:上帝賞賜hō͘祂ê子民,lóng是siōng好ê,是世人過去m̄-bat看過、聽過,甚至想像bē到ê。親像:以色列人民ē-tàng經過紅海,tī曠野食嗎哪,甚至thang進入迦南地等等就是真好ê例。

第10到12節,chit三節真重要,chia講出只有tī上帝ê靈裡,chiah ē-tàng認bat上帝。換句話講,tio̍h認bat上帝,並m̄是用人ê智慧、經歷,甚至學歷ē-tàng認bat ê,卻是需要上帝聖神ê啟示,而每一個接受耶穌做性命救主ê人,lóng是領受了上帝ê聖神,這是上帝hō͘基督徒siōng好ê恩賜。

第13到14節,使徒保羅真清楚講,伊m̄是用人ê智慧傳講起帝救恩ê事,卻是用聖神所教導ê言語。M̄-koh屬靈ê人kah不屬靈ê人之間是會有差別ê;後者無法度領受上帝ê恩賜,甚至會嘲(sau)笑上帝tī耶穌裡ê救恩。

第15到16節,「屬聖神ê人」,是teh指有上帝ê聖神同在者,chit種人teh判斷世間ê事物ê時,會因為有聖神同在而充滿智慧,hō͘伊清楚知影萬物ê價值。Á chit點是一般人無法度理解ê。使徒保羅tī chia引用以賽亞書第四十章13節,表示只有tī上帝聖神啟示之下,人才ē-tàng明白上帝拯救ê恩典。所以每一個信耶穌ê人,lóng會有聖神充滿而明白上帝拯救ê計畫,並且照上帝ê旨意去遵行。

重新查詢 專卷研經 哥林多前書系列
錯誤回報,請聯繫