哥林多前書 2章1節 到 2章5節   背景資料  上一筆  下一筆
Tī chit章中,使徒保羅繼續強調耶穌十字架ê救贖恩典。使徒保羅一再強調:福音,m̄是用人ê智慧ē-tàng瞭解ê,卻是上帝啟示人ê心靈,hō͘人會得thang知影祂tī耶穌裡奇妙ê救恩。

Tī chit段經文中,使徒保羅真清楚表示,傳福音kah是m̄是有高深ê學問,á是用súi ê詞句並無關係,因為十字架表示上帝tī耶穌裡ê疼,án-ne chiah是siōng重要ê信息。

第1到2節,tī chia使徒保羅提起「以前」到哥林多去傳福音ê經驗,這「以前」,就是使徒行傳第十八章1到17節ê記事。Tī該段記事中,thang看出使徒保羅tī猶太人會堂被拒絕,m̄-koh tī「提多‧猶士都ê厝裡」卻有會堂主管基利司布kah伊全家lóng信了主,iáu有真chē哥林多人mā信à。Á使徒保羅強調,當時伊lóng是只有講「耶穌基督kah伊死tī十字架上ê事」而已,不過,因為講耶穌kah伊死tī十字架上ê救恩,卻致使猶太人聯合起來攻擊伊,並kā伊掠去官府。M̄-koh羅馬總督卻tháu放了伊。猶太人因此將憤怒轉向會堂主管ê身上去。

第3到5節,tī hit種環境之下,使徒保羅深深體驗tio̍h,用人ê學問(伊本身就是受過頂真ê法利賽派ê訓練)是無用ê,mā m̄是用花言巧語ē-tàng hō͘人接受福音,卻是因為聖神ê氣力,chiah phah開人ê心門,而這就是上帝ê大能帶來ê效果。所以福音ê事工就是聖神ê事工,傳福音需要聖神ê感動作工,mā需要聖神ê引chhōa,因為有上帝ê靈ê感動,人才ē-tàng認bat有關上帝救恩ê事。若無,靠人ê智慧、能力,真容易hō͘福音變成人ê哲學思想。

重新查詢 專卷研經 哥林多前書系列
錯誤回報,請聯繫