哥林多前書 15章1節 到 15章11節   背景資料  上一筆  下一筆
這是真重要ê一章,使徒保羅用kui章ê篇幅teh談論有關死人koh活ê問題,是新約聖經中談論有關死人koh活siōng詳細一章。Chit章mā為後來使徒信經提供非常重要ê信仰告白──肉體ê koh活。Mā tùi chit章ē-tàng看出哥林多教會信徒中,有人雖然信了耶穌,á是來加入信仰團契,m̄-koh卻對koh活ê事感覺無法度理解,á是對koh活ê事持懷疑ê態度。Á使徒保羅傳福音ê時,siōng重要ê一個信仰告白,就是所有信耶穌ê人,會kah耶穌同死,mā會kah耶穌同koh活(參考羅馬書六:8)。

其實,有關koh活ê問題,並m̄是tī外邦人中間chiah有chit種問題,猶太人中間ê撒都該派ê人mā有chit方面ê問題;in並m̄相信有死人koh活chit款tāi-chì,所以in bat利用摩西律法中所規定ê「利未拉特婚姻條例」(Levirate Law)來試問耶穌關係koh活ê事。Á耶穌ê回答是:「今世ê 人有嫁有娶, m̄ -koh,會堪得tùi 死人中koh 活進入來世ê,就無嫁無娶。 因為in koh 活了後bē koh 死,kah 天使仝款,lóng 是上帝ê kiáⁿ 兒。(全民版)」(路加福音二十:34—36)

使徒保羅會án-ne強調肉體ê koh活,是因為希臘思想中,將人分做兩個部分,一是肉體ê,另外一個是靈魂ê。肉體是污穢、無好ê,所以人死後,肉體就開始腐pháiⁿ。M̄-koh靈魂是潔淨ê,所以當人往生ê hit一刻,靈魂就離開了身軀。所以當使徒保羅tī哥林多教會傳福音hō͘ in ê時,lóng會強調身軀就是上帝聖神ê殿(參考六:19),這表示人ê身軀kah上帝有密切關係。Á上帝是聖潔ê,所以人ê身軀一定tio̍h保持聖潔,án-ne,死後koh活就是一個全新ê性命。Á這是希臘思想無法度接受ê想法。這mā是哥林多教會信徒中,有人認為只有靈魂會得救,身軀原本就會敗壞死亡。所以chit種信徒雖然是信耶穌了,卻iáu是teh過淫亂ê生活,in認為這bē影響tio̍h靈魂ê聖潔,chit點mā是使徒保羅非常受氣ê事。其實,chit種態度m̄-nā發生tī哥林多教會,mā出現tī以弗所(參考以弗所書五:5)、歌羅西(參考歌羅西書三:5)等地區ê教會。

Tī chit段經文中,使徒保羅提供了真重要ê珍貴資料,就是描述thang見證耶穌koh活ê神跡ê人真chē,包括有祂ê門徒,mā有chē kah五百gōa個跟tòe ê民眾,koh khah重要ê,是chiah-ê親目chiu金金看見koh活ê耶穌ê人iáu活teh,表示這是ē-tàng查證ê事,而且koh khah重要ê,使徒保羅ê轉變就是因為伊親自看見koh活ê耶穌。所以使徒保羅談死人koh活ê信仰,是根據伊親目chiu金金看見ê基礎,mā是tùi chit點伊自認是hō͘上帝kah耶穌親自揀選成做「使徒」ê一siōng重要理由(參考加拉太書一:1)。

第1到2節,chit兩節mā是chit章經文ê引言。使徒保羅ài哥林多教會信徒記tiâu伊傳hō͘ in ê信息,就是「耶穌基督kah伊死tī十字架上」ê信息(參考哥林多前書二:2)。伊講傳chit-ê福音,是「óa靠聖神ê大能來證實ê」,為tio̍h是beh hō͘哥林多教會ê信徒tī信仰上「不根據人ê智慧,卻是用上帝ê大能做基礎」(參考哥林多前書二:4—5)。這mā說明哥林多教會中,已經有人滲透入去講「另外一種福音」了(參考哥林多後書十一:4),chiah-ê人後來就是使徒保羅所講ê「超等使徒」(參考哥林多後書十二:11)。

第3到4節,chit兩節真重要,使徒保羅講已經kā家己所領受ná「siōng重要」ê信息傳hō͘哥林多教會信徒。Chia所講ê「siōng重要」一詞,tī中文《和合本》是用「第一」,台語漢字mā是用「第一」,指ê就是「siōng重要」ê意思。表示chit兩節所提起ê,mā是福音信息中siōng重要ê-耶穌為人ê罪死,而且埋葬,m̄-koh第三工有koh活。這mā是基督教信仰告白中siōng重要ê內容。Ài beh特別注意ê是,使徒保羅講伊所傳講ê chiah-ê信息,lóng是「按照聖經所講ê」,m̄是伊家己發明ê。聖經是上帝語,福音就是beh根據聖經上帝傳,m̄是人家己創造ê信息。如果無照聖經,就無法度講是福音。Chit點是非常重要ê認bat。

第5到7節,tī chit-ê幾節經文中,使徒保羅講tio̍h有關耶穌koh活了後顯現hō͘甚麼人看過ê記錄;Tī chit段經文中,使徒保羅提起耶穌bat向(1)彼得、(2)十二使徒、(3)五百gōa個跟隨者、(4)雅各等、(5)最後是使徒保羅家己。Tī聖經中有關koh活ê耶穌顯現hō͘彼得看過,可能是路加福音第廿四章34節記載ê資料,說明十一位門徒(除了出賣耶穌基督ê猶大外)當teh講:「主真正有koh活;伊已經顯現hō͘西門看了!」(mā thang參考馬可福音十六:7)「五百gōa個跟隨者」,chit點tī福音書中chhōe bē-tio̍h chit-ê資料,m̄-koh可能盛傳tī早期教會中。最後一位是「雅各」,伊真可能就是耶穌ê小弟;伊原本並m̄相信耶穌(參考約翰福音七:5),福音書mā無特別記載有關雅各看見耶穌koh活ê記事。不過,tùi使徒行傳第十五章,以及加拉太書第二章lóng thang看tio̍h chit位雅各後來tī早期耶路撒冷教會有真大ê影響力。使徒保羅強調chiah-ê看過耶穌基督koh活ê人,iáu有真chē人活teh。換句話講,早期教會teh見證耶穌koh活ê信息,並m̄是空談,卻是確實有人teh見證chit-ê tāi-chì,mā是因為án-ne,加上聖神充滿ê氣力,in勇敢地見證chit-ê tāi-chì,chiah hō͘福音大大廣傳開來。

第8到11節,使徒保羅kā家己排tī最後一位;伊遇tio̍h koh活ê耶穌,是因為當時伊當teh四界迫害耶穌ê信徒,然後發生tī伊前往大馬士革beh繼續掠信徒ê途中,koh活ê耶穌親自顯現hō͘伊看,並且kā伊講話(參考使徒行傳九:1—9)。Mā因為chit pái ê奇妙境遇,改變了使徒保羅ê一生。如果講耶穌ê兄弟雅各有改變,則使徒保羅ê改變koh khah明確,而且對教會後來ê發展影響koh khah大。使徒保羅講為tio̍h感謝koh活ê耶穌親自向伊顯現ê恩典,伊並無因此就驕傲,自認為有甚麼特權,á是看bē起其他ê門徒,伊講he是上帝ê恩典kah伊同齊同工,chiah hō͘伊kah其他使徒同齊傳耶穌koh活ê信息。


重新查詢 專卷研經 哥林多前書系列
錯誤回報,請聯繫