哥林多前書 12章1節 到 12章11節   背景資料  上一筆  下一筆
Tùi第十二章開始,一直到第十四章,這三章lóng thang清楚看出發生tī早期教會ê另外一個問題,就是關係聖神充滿ê事,mā因為對聖神ê問題看法差別,無形中tī教會內部mā產生分裂á是糾紛ê現象。

Tùi使徒行傳ê記事中看tio̍h,耶穌ê門徒會開始見證福音,就是tī聖神感動kah充滿之下,tùi不安kah驚惶中,變成勇敢見證耶穌koh活ê信息。所以開啟了福音信息傳播ê動力。續落來,使徒保羅kah其他同工就是tī聖神ê差遣下,開始踏出海外宣教事工,hō͘福音ê信息因此而傳開,m̄-nā tī耶路撒冷,koh khah闊傳到外邦地區去。作者路加tī使徒行傳chit本史冊中,差不多就是用「聖神」做主題teh描述眾使徒kah早期信徒信仰上ê見證。聖神tī早期是引chhōa教會福音事工行向ê主要力量,真chē人表明家己有聖神充滿,四界去傳福音,見證耶穌ê救恩,福音ê事工即使tī被迫害ê環境下,猶原廣傳出去。不過,哥林多前書第十二到十四章卻是teh探討哥林多教會發生所講ê「聖神問題」,kah使徒行傳所描述聖神大大充滿tī門徒身上,hō͘ in勇敢四界去見證福音信息ê情形大無相仝,tī哥林多前書這三章所講tio̍h ê聖神問題,卻是kah講「方言」有密切關係。原因是有信徒亂使用了「聖神ê恩賜」chit-ê信仰認知,造成教會內部ê紛爭。

Tī chit段經文,使徒保羅強調一個重要ê信仰觀念:無聖神作工,人無可能認bat耶穌是救主。換句話講,如果無聖神感動,任人án怎努力,mā是枉然。因為認主耶穌為救主,這是關係tio̍h性命ê問題,關係tio̍h性命得救ê事,就m̄是人ê能力所ē-tàng改變ê,一定tio̍h是來自聖神ê氣力。聖神只有一個,m̄-koh,聖神ê工作是多樣ê,mā因人ê需要而異。

Koh講,既然是聖神ê工作,就無所謂「輕重」ê問題,因為聖神是上帝拯救世人性命ê氣力,是屬tī上帝ê,m̄是用人ê方式ē-tàng衡量ê。所以帶領一個細漢ê孩童來認bat主耶穌,kah帶領一個王公貴族悔改來信主耶穌,仝款重要,無輕重之別。

第1到3節,tùi第1節thang看出有關聖神ê問題是哥林多教會提出來ê。使徒保羅提出哥林多教會信徒原本m̄知福音信息,因此lóng是teh過拜偶像ê信仰生活,後來聽tio̍h福音信息而信耶穌。所以使徒保羅強調這就是聖神ê工作,只有tī聖神感動之下,人chiah會信耶穌是主。Mā就是講,若無聖神ê啟示,人無可能認bat耶穌就是性命ê救主。

第4到6節,tī chit段經文中,使徒保羅強調聖神只有一個,m̄-koh聖神賞賜hō͘每一個人ê「恩賜」lóng無相仝。伊tī chia表明:每一個人身上ê才能 lóng是tùi上帝來聖神ê賞賜。所以每一個人lóng有無仝恩賜,m̄-koh卻只有一位主,就是性命ê救主。Chia所謂「恩賜」,tī希臘文kah「恩典」是同字根「charis」,指ê是:自賞賜得tio̍h,m̄是靠人ê能力得tio̍h ê。所以所謂「聖神ê恩賜」,真清楚就是teh指tùi上帝來ê恩賜。Á上帝ê賞賜是白白ê恩典,m̄是任何代價thang換來得tio̍h。這mā說明一個人擁有聖神ê恩賜,m̄是用來誇耀ê,卻是beh用來回應上帝賞賜ê疼。

第7到11節,使徒保羅Tī chit段經文中,講出每一個人領受ê聖神恩賜無相仝,有ê人擁有知識,有ê得tio̍h信心,mā有人擁有醫病ê能力,á是行神跡ê能力,á是傳講信息ê恩賜,mā有專門講靈語者,mā有解釋靈語ê能力者等等,m̄-koh chiah-ê無相仝ê聖神恩賜,lóng出tī仝款ê聖神。這已經teh說明爭辯甚麼人chiah是有上帝聖神ê恩賜,是錯誤 ê認知。

重新查詢 專卷研經 哥林多前書系列
錯誤回報,請聯繫