哥林多前書 10章14節 到 10章22節   背景資料  上一筆  下一筆
這是第一pái使徒保羅提起有關聖餐ê事,tī第十一章20到32節伊koh khah清楚說明聖餐所表明ê意義。特別ê所在是伊將聖餐ê事kah拜偶像、食祭拜過偶像ê食物同齊討論。原因是哥林多教會中間有信徒自認真有知識,信仰真堅定,所以就參與廟會中祭祀後ê筵席,lim食hiah-ê拜偶像過了後ê食物。使徒保羅講tī hiah-ê偶像背後所表明ê信仰,夠額引人入罪。所以伊特別用耶穌ê聖餐來譬喻說明。

第14到15節,使徒保羅勸勉哥林多教會信徒,一定會遠離拜偶像ê事,而這siōng好ê方式,就是mài去參與in任何祭祀崇拜ê行為。

第16到17節,使徒保羅認為聖餐就是ná親像分享了基督ê血、身軀,mā就是kah基督已經完全合一à。使徒保羅會án-ne解釋,有一個siōng基本ê前提,就是教會乃是基督ê身軀(參考以弗所書一:23),基督徒tī教會chit-ê信仰團契中,就ná親像tī基督ê身軀內面仝款,是kah伊合做一個,無法度分開ê,因為已經kah耶穌ê性命結合做伙,chit種結合ê意義所表明出來ê,就是性命ê共同體。Ná親像伊寫hō͘加拉太教會ê書信中所講ê:「Án ne,chit-má teh 活ê 我m̄ 是原來ê 我,是基督tiàm-tī 我內面teh 活;我chit-má teh 活,是靠信上帝ê Kiáⁿ teh 活;基督疼我,為tio̍h 我放sak 性命。(全民版)」(加拉太書二:20)

第18到22節,使徒保羅強調一個基本觀念:獻祭hō͘上帝,所表示ê m̄-nā kan-taⁿ是祭物本身,卻是tùi祭壇所顯明出來ê意義。因為祭壇表明ê是:上帝顯現、出現,á是khiā起ê位置。所以做一個人獻祭hō͘上帝ê時,伊m̄是單單將物件pái tī祭壇上而已,卻是teh表明伊kah上帝之間有bē-tàng分ê關係。仝款ê,當拜偶像ê人,將祭物獻tī祭壇上ê時chūn,伊所表達ê意思就是敬拜,m̄是單單將祭物khǹg tī祭壇上而已。續落來,伊強調一個人若是去享用拜偶像ê食物,koh怎樣ē-tàng來享用主耶穌救贖ê聖餐?he是無法度án-ne做ê。因為偶像就是鬼附身ê記號,聖餐是耶穌救贖ê恩典,二者絕對bē-tàng混淆。

重新查詢 專卷研經 哥林多前書系列
錯誤回報,請聯繫