哥林多前書 1章1節 到 1章3節   背景資料  下一筆
哥林多前、後書lóng是使徒保羅寫ê書信,主要是談論到有關基督徒生活kah信仰之間ê問題。Tī使徒保羅所寫ê書信中,寫hō͘哥林多教會ê書信占有真重要份量。前後兩份書信共計有廿九章,討論ê範圍非常真闊。Tùi使徒行傳第十八章1到4節thang看tio̍h使徒保羅到哥林多城,tī hia tú-tio̍h亞居拉kah百基拉chit對夫妻,因為in kah使徒保羅lóng是「靠製造帳棚維持生活」,所以in tī哥林多成做真好ê福音同工。Tī使徒行傳第十八章第4節講:「Ta̍k個安息日, 保羅lóng tī 會堂kah 人辯論,苦勸猶太人kah 希臘人來信主。(全民版)」Chit節講出使徒保羅奠立了哥林多教會ê基礎。原本使徒保羅是「靠製造帳棚維持生活」,後來因為西拉tùi腓立比ê教會帶來一筆信徒ê奉獻(參考哥林多後書十一:8—9),使徒保羅teh生活無慮了後,就kā全部ê時間投入傳福音ê事工上(參考使徒行傳十八:5)。

哥林多是希臘ê大城市,是羅馬帝國統治下屬tī亞該亞省ê首都,mā是一個非常繁華ê城市,不過社會風氣非常敗壞,道德低落,是一個多宗教信仰ê城市。Chiah-ê社會敗壞ê現象mā發生tī教會內部,使徒保羅聽tio̍h後感覺非常ê痛心,當伊tī以弗所三年ê福音事工teh beh結束,準備ài離開chìn前寫chit封冊,目的就是beh處理信徒tī信仰kah生活中所發生ê問題,並且透過此書信勸勉大家應該彼此相疼,因為每一個信徒lóng是上帝福音ê同工。

Ná親像現代人寫phe ê時會有一定ê樣式,古代人tī chit方面koh khah是án-ne。新約聖經時代寫phe lóng會先自我紹介,寫明收phoe ê對象,然後是寫上請安語。使徒保羅ê書信mā是循tio̍h chit-ê模式。

第1節,使徒保羅所寫書信ê特色,伊自稱是「基督耶穌ê使徒」,tī伊ê書信中一再出現chit種話句(參考羅馬書一:1,加拉太書一:1,以弗所書一:1,歌羅西書 一:1,提摩太前書一:1、後書一:1,提多書一:1)。伊之所以每寫一封書信就自稱「使徒」,原因是tī伊離開開拓起來ê教會了後,真緊to̍h有人去傳「另外一種福音」(參考加拉太書一:6),chiah-ê傳「另外一種福音」ê人,siōng歡喜講使徒保羅無「使徒」ê身分。若照使徒行傳第一章22節記載有關揀選「使徒」ê條件,使徒保羅確實是無「使徒」ê資格。M̄-koh ná親像伊寫hō͘加拉太教會ê書信中所講ê,伊之所以自稱做「使徒」,並「m̄是因為人ê選召,mā m̄是受人ê委派,卻是耶穌kah Hit位 hō͘祂tùi死裡koh活ê父上帝指派ê」(參考加拉太書一:1)。

Chia提起「所提尼」chit-ê兄弟,chit-ê名只tī chia出現,伊真可能就是使徒行傳第十八章17節記載ê hit位tī哥林多城管理猶太人會堂者,因為使徒保羅tī hit-ê城ê猶太人會堂傳講耶穌ê福音,激怒猶太人,in掠tiâu伊,毆打伊。可能後來in因為聽tio̍h使徒保羅所傳講ê福音,á是聽tio̍h亞波羅傳講ê福音信息而歸屬信耶穌。

第2節,chit節真重要,chit節已經講出普世教會ê觀念,to̍h是所有信耶穌ê信徒,lóng是屬tī「上帝教會ê信徒」,lóng是用基督為元首(參考以弗所書一:22)。

Tio̍h注意ê是chia ê「信徒」一詞,表示「分別為聖」ê意思,kah一般人是無仝款ê。換句話講,tī主耶穌內面,所有ê信徒lóng是屬tī上帝ê子民,是神聖ê子民。而且tī耶穌裡成了合做一個ê團契,是仝一個家庭ê份子。使徒保羅會án-ne講,一定kah教會內部ê分裂事件有關。

第3節,chia講出當時書信ê模式,就是請安kah祝福。Chia講「恩典」,表示tùi上帝來ê賞賜,chit種tùi上帝來ê賞賜,是無法度用任何代價來換得tio̍h,卻是上帝tī耶穌裡白白hō͘ in ê。「平安」,chit-ê詞m̄是表示無tú-tio̍h任何問題,卻是指性命充滿tio̍h飽足、歡喜,而且滿有活力ê意思。


重新查詢 專卷研經 哥林多前書系列
錯誤回報,請聯繫