歷代志上 7章1節 到 7章5節   背景資料  上一筆  下一筆
Tùi第七章1節到第八章40節是記載約旦河西岸其他六個支族ê族譜。族譜ê名有kóa所在ê記載掠準它經典ê記載有差別;親像第七章6節有關便雅憫ê族譜,tī chia只有記載比拉、比結、耶疊等三個名,m̄-koh tī民數記第廿六章第38到39節則記載有比拉、亞實別、亞希蘭、冊反、戶反等五個,就無比結、耶疊ê名。Á tī創世記第四十六章21節則記載便雅憫ê kiáⁿ有十個,in是:比拉、比結、亞實別、基拉、乃幔、以希、羅實、母平、戶平、亞勒等。這說明一件事實:亡國後ê文士tī收集祖先ê資料ê時,有kóa已經遺失,koh tī口傳上mā失去聯繫。另外,mā有可能其中有kóa宗族已經kah其他宗族合併à。因為án-ne,無仝ê資料來源顯示出不同時代之間社會曉背景ê差別。像tī第七章chia,就是紹介tī軍事行動上有戰功ê人為主要對象,因為án-ne,會一再強調in是「ē-tàng作戰ê戰士」(第2節、第5節、第7節、第9節、第11節、第40節)。

Chit段經文是記載以薩迦ê後代族譜。Chit段族譜thang參考創世記第四十六章13節;民數記第廿六章23到25節。

第1到2節,chia寫落來以薩迦ê四個kiáⁿ,m̄-koh延續記載ê只有大kiáⁿ陀拉ê kiáⁿ孫,講陀拉有六個kiáⁿ,而且後來lóng成做「族長」,chiah-ê人tī大衛王時代lóng是「英勇ê戰士」。Á緊接chit句話ê是「in ê後代有兩萬二千六百名」。表示chiah-ê人lóng是用ē-tàng相戰ê為計算人口,而且時間lóng是tī大衛時代。

第3到5節,chit段經文是延續陀拉ê大kiáⁿ烏西,伊ê後代koh khah興旺,m̄-nā「有真chē bó͘ kah細姨kah子女」,而且in ê「後代中有三萬六千名ē-tàng作戰ê戰士」。然後tī第5節作一個簡單ê結論,講以薩迦支族ê族譜上,共計列了「八萬七千名ē-tàng作戰ê戰士」。Kā chit句話對照士師記第五章15節,就會發見該支族ê首領bat率領ē-tàng相戰ê勇士參與底波拉kah巴拉聯合對抗迦南族ê人。

重新查詢 專卷研經 歷代志上系列
錯誤回報,請聯繫