歷代志上 4章1節 到 4章10節   背景資料  上一筆  下一筆
Ná親像頭前所講ê,因為tńg去故鄉迦南重整家園ê用猶大支族ê人數siōng chē,真自然tek,kui個以色列民族ê中心,就tī猶大支族。因為án-ne,作者tī chit章中,開始紹介ê,就是tùi猶大支族ê族譜開始,而且紹介ê非常詳細(第1到23節)。了後,tùi第24到43節是紹介西緬支族ê族譜。

M̄-koh會用猶大為首,mā可能是因為呂便kah老父雅各ê細姨辟拉上床(參考創世記三十五:22),hō͘ 雅各取消大kiáⁿ ê繼承權(參考創世記四十九:4),排行第二ê西緬kah第三ê利未共同策劃大屠殺示劍城所有cha-po͘人ê事件,引起雅各非常ê受氣,詛咒了chit兩個兄弟(參考創世記四十九:5—7),tùi án-ne改由排行第四ê猶大取代。Thang是án-ne iáu是有疑問。因為án-ne,有另外一種講法,認為會先提起西緬支族,是因為西緬支族kah猶大支族是tī仝一個區域,而且後來mā是歷代志作者寫chit份族譜ê時chūn,西緬支族已經被猶大支族所併入à。講白些,就是ná親像雅各詛咒ê時所講ê「in會分散tī以色列全境」、「散居tī以色列人中間」(參考創世記四十九:7)。

Tùi第1到23節chit份猶大族譜,thang看出官方資料ê特色,因為tī其它ê經冊中都無chit份資料,只出現tī chia。

第1到2節,一開始就講猶大有五個kiáⁿ,siōng小ê是朔巴,續落來就是紹介朔巴ê kiáⁿ孫。M̄-koh tio̍h注意chia寫「迦米」,應該是迦勒chiah-tio̍h。

第3到4節,chit段族譜開始,mā會紹介人物kah in所開創ê城鎮,mā就是人名kah城市ê名相疊。其中伯利恆城就是戶珥ê後代開創ê,而比努伊勒則開創基多城,而以謝珥開創了戶沙城。

第5到8節,chit段經文紹介提哥亞城ê開拓者亞施戶ê族譜。

第9到10節,chia講有一個人名叫「雅比斯」,chit-ê名tī希伯來文是「痛苦」ê意思。伊ê母親替伊取chit-ê名,tú好說明伊出世ê時遭遇ê苦難,當時ê人lóng認為需要改名chiah ē-tàng改變性命ê結果。M̄-koh,雅比斯卻直接向上帝祈禱,結果上帝聽伊ê祈禱。這說明聖經作者ê觀點:tī苦難中,向上帝祈求,必得tio̍h上帝ê垂聽。

(幾年前,有一本真轟動ê冊,名叫《雅比斯ê祈禱》,就是teh kā讀者講,只要向上帝祈求,上帝lóng會垂聽,照你所beh hō͘你。結果該冊tī各地教會書房大賣。其實,chit種認知真需要重新檢討kah省思。)

重新查詢 專卷研經 歷代志上系列
錯誤回報,請聯繫