歷代志上 23章21節 到 23章32節   背景資料  上一筆  下一筆
Chit段經文記載利未人工作上ê調整,原因是蓋好聖殿後,過去tī曠野時間,利未人需要四界扛約櫃,chit-má m̄免à。需要負責ê工作當然iáu包括管理聖幕,以及聖幕內所有ê器皿等,taⁿ lóng因為有聖殿。因為án-ne,過去扛搬ê工作,改變成管理、清潔等工作。Mā就是保持潔淨比甚麼工作lóng重要。

第21到23節,chia記載利未ê第第三kiáⁿ米拉利ê kiáⁿ孫。比較特別ê是chia記落來了米拉利ê孫á以利亞撒無kiáⁿ,而kā cha-bó͘-kiáⁿ嫁hō͘表兄弟ê事記錄落來,這算是比較少見ê記載。

第24節,chit節真重要,kā原本三十歲chiah登錄名單,tùi án-ne改為二十歲以上。

第25到26節,大衛王強調上帝會因為約櫃ê緣故而「永遠tòa tī耶路撒冷」,chit句話其實是強化興建耶路撒冷聖殿ê重要性。另外一方面,mā hō͘利未人ê工作有改變ê理由。

第27到30節,記載利未人過去需要扛約櫃kah聖幕kah其他器皿,chit-má因為有聖殿而固定落來,利未人ê工作mā就大幅改變。Chia指出大衛kā利未人用來協助祭司ê工作,管理聖殿ê庭園kah房間,mā負責清潔ê工作,並且準備每工聖殿裡所需要ê用品,包括供餅、燈油等等。Iáu有,每工早晚兩pái,聖殿一定tio̍h有敬拜禮儀ê課,利未人lóng tio̍h獻唱詩歌頌讚上帝。

第31到32節,chit兩節提起特別ê節日,包括有安息日、初一,以及其他節期,利未人lóng tio̍h按照指定ê人數kah規例,配合tio̍h祭司ê獻祭kah禮拜方式,維護聖殿ê一切秩序,kah幫助祭司進行所有禮拜ê工作。

重新查詢 專卷研經 歷代志上系列
錯誤回報,請聯繫