歷代志上 23章1節 到 23章20節   背景資料  上一筆  下一筆
Tùi第廿三章起,到廿七章止ê chit段經文,lóng是記載大衛王為tio̍h建造耶路撒冷聖殿所做ê一切準備,除了頭前所講ê,伊先替所羅門準備好勢材料之外,chit-má koh kā有關聖殿建造完成後,所需要ê管理、敬拜等事宜,mā lóng是tī大衛王ê手中事先組織、分配妥當了後交hō͘所羅門。

歷代志作者chit種記載想beh表明一點:大衛王對tī信仰事務ê關心,大大超過伊對宮廷、家庭事務ê重視。其實,歷代志作者想表達一個基本認bat:是大衛王建造聖殿,m̄是所羅門。所羅門只不過是去執行並完成老父大衛王決定建造聖殿ê工程而已。因為所有建造聖殿ê工程,無論是建造ê經費、材料,甚至是聖殿完工後,所有beh服事ê人員lóng是大衛王準備ê。Mā因為án-ne,tī撒母耳記下第十三章以後ê宮廷內部糾紛ê tāi-chì務,tī歷代志ê作者編撰中,lóng被有省略。作者beh凸顯:大衛王確實是用盡所有ê心思想beh回應上帝對伊kah以色列民族ê疼。

Koh講,大衛ê chiah-ê準備,對後來以色列人民tùi巴比倫tńg來國內了後,重建聖殿以及敬拜ê事宜有真大ê幫助,mā為利未人(祭司)ê位階chhōe-tio̍h siōng有力ê支撐點。若是認真看,就會發見新約時代ê聖殿組織,mā是根據chit份組織系統延伸出來ê。

Chit段經文講述大衛先召集以色列人民ê領袖,ài in調查利未族年滿三十歲以上ê,然後kā之分做革順、哥轄,kah米拉利等三組。然後分派in擔任kah聖殿相關ê工作。

第1節,chit節開始就講大衛晚年ê時,立伊ê kiáⁿ所羅門作以色列ê王。M̄-koh若是對照列王記上第一到二章,就會清楚看tio̍h bat發生過大衛ê kiáⁿ亞多尼雅設法爭奪王位,mā就是宮廷發生政爭ê事件。Chit項王位ê繼承並m̄是真順利。M̄-koh chit節mā說明原本以色列ê君王是由上帝所揀選,m̄-koh tùi大衛開始,卻是改變做世襲。

第2到6節,tùi chit段經文thang理解建造完成後ê聖殿,規模之大,kah需要維護聖殿工作ê龐大人力相配合,而且chiah-ê工作者lóng一定tio̍h hit年滿「三十歲以上ê利未人男子」,這mā是後來有一種講法,年滿三十歲chiah ē-tàng擔任神聖工作。不過會採用三十歲以上,是照民數記第四章3節ê規定。Á tī第廿三章24節koh講是「二十歲以上」,則可能是後來修訂ê,原因可能kah戰爭人口減少,á是因為tùi受掠tńg來後,人數大減有關。大衛kā chiah-ê chē kah三萬八千ê利未人分配tī四項工作:一是領兩萬四千人擔任管理聖殿;六千人保管記錄kah負責仲裁工作;四千人擔任守衛;四千人作樂師。

第7到11節,chit段經文是提起利未大kiáⁿ革順ê kiáⁿ孫,mā是簡單ê族譜。

第12到14節,chit段經文是利未記第二kiáⁿ哥轄ê kiáⁿ孫,伊ê大kiáⁿ暗蘭宗族ê人擔任管理聖殿裡ê聖物,mā負責燒香敬拜ê工作。

第15到17節,記載摩西ê兩個kiáⁿ革順kah以利以謝ê簡單kiáⁿ孫名單。

第18節,這是提起哥轄ê第二kiáⁿ以斯哈只有一個kiáⁿ示羅密。

第19節,是哥轄第第三kiáⁿ希伯倫ê四個kiáⁿ。

第20節,這是哥轄第四子烏薛ê兩個kiáⁿ。	

重新查詢 專卷研經 歷代志上系列
錯誤回報,請聯繫