Chit章主要teh說明建造聖殿ê事，表面上是由所羅門所建造，其實是大衛王ê功勞，因為材料、地點等lóng是大衛王為所羅門事先準備、選定ê（第1節、第2到3節、第14節等等）。所羅門充其量是執行大衛所交帶ê工作罷à。

「Ē-sái講是伊少年，koh無經驗，所以我一定tio̍h kā一切準備好勢」，這是歷代志作者kā建造聖殿歸功tī大衛王ê一個基本看法。

照歷史來看，所羅門繼任王位ê時，年紀大約是二十歲左右。建造聖殿大約tī伊當以色列王ê第四年，án-ne算來，所羅門王mā不過chiah二十四歲。既然，上帝講大衛王並m̄是建造聖殿ê人，伊ê gín-á chiah是。因為án-ne，為tio̍h有份tī建造聖殿，伊決定先kā一切準備好勢，然後交帶kiáⁿ去執行。至少這mā是表達伊回應上帝hō͘伊ê疼ê一種方式。

第2到4節，chia大衛王運用tī以色列國內ê外僑，chiah-ê外僑包括phah戰俘擄來ê奴隸，以及因為以色列強盛而慕名移居來以色列境內工作ê人，大衛王用chiah-ê人來準備大塊ê石頭。伊mā準備做聖殿門扇ê釘子、鉤子，tùi泰爾kah西頓兩個港口mā大量運了來自黎巴嫩ê香柏木，這香柏木是當時中東地帶siōng珍貴ê木材。

第5節，chit節講出大衛王做chiah-ê chìn前ê準備工作ê原因，就是看見伊想beh kā王位hō͘所羅門ê時，伊尚且少年，無甚麼經驗。M̄-koh teh準備chiah-ê工作ê時，所羅門應該是侍衛tī邊á，thang看見、聽見，大衛王ê指導kah提醒，án-ne有幫助伊以後建造聖殿ê路用。另外一方面mā thang án-ne講，tio̍h建造一座金碧輝煌ê聖殿，單單準備建材就beh花費真chē時間kah人力。

第6到10節，大衛王這是第一段ài所羅門建造聖殿ê原因，詳細說明hō͘所羅門聽，thang hō͘伊知影為甚麼ài建造聖殿，而且知影應該用甚麼態度來進行chit項大而且神聖ê工程。

Tī chia，大衛王先表示原本是伊beh建造聖殿，m̄-koh上帝並無同意，主要原因是伊出兵相戰刣死真chē人，上帝無希望用伊ê手來建造聖殿。Á所羅門無chit種問題，koh tī以後伊做國王ê時，上帝會庇護，hō͘以色列國內享受和平。Tī chit段時間內，chiah來興建聖殿。換句話講，興建聖殿是tī國家siōng安穩ê時chūn建造起來ê。Án-ne聖殿ê意義顯明出來à，一則，它是一個敬拜上帝ê所在，無法度hō͘殺害人ê性命、流人ê血ê人來建造。因為上帝是慈愛ê上帝。二則，ná親像大衛向亞勞拿所講ê，獻hō͘上帝ê祭品，無法度是「白白得來ê」，是需要付出代價ê，chit種代價所詮釋出來ê意義，祭品ê內面是有性命ê，m̄是死ê。