歷代志上 13章1節 到 13章14節   背景資料  上一筆  下一筆
Tùi第十三章開始,直到第十六章止,lóng是teh描述大衛án怎迎接約櫃進入耶路撒冷城ê事件。歷代志ê作者kā大衛王當做是此經冊ê中心人物,而耶路撒冷聖殿則作者編撰此經冊ê主要題旨。

Chit章mā thang參考撒母耳記下第六章1到11節。詳細對照這兩處ê記載,就會發見chit章ê第1到4節,tī撒母耳記並無出現,特別是大衛強調tio̍h派人去報告「tòa tī各城ê祭司kah利未人,請in lóng來chia kah阮聚集做伙」,主要目的是beh迎接上帝ê約櫃進入耶路撒冷城。換句話講,大衛beh運約櫃進入耶路撒冷,有通告所有以色列人民,特別是hō͘祭司kah利未人知影,chit件神聖ê大事,lóng一定tio̍h出席,而且tio̍h用舉國慶祝而且神聖ê大事來看待。Koh講,之所以需要通知利未人,是因為只有in chiah thang搬移約櫃(參考歷代志上十五:2)。

第1到4節,這是大衛tī執政了後,而且tùi原來tī希伯崙做王,換到耶路撒冷城à。Chit時chūn,伊認為應該kā約櫃迎進耶路撒冷chiah-tio̍h。其實,伊是phah算先運進耶路撒冷,然後chiah選一個美好所在做蓋聖殿、安置約櫃ê所在。因為án-ne,伊召集將領討論有關運送約櫃ê事。Teh徵求大家同意之下,伊向全國人民宣告,beh運約櫃入耶路撒冷城。伊koh特別強調講,過去約櫃一直khǹg tī基列‧耶琳,是因為掃羅無重視約櫃ê緣故。Chit句話,說明大衛kah掃羅之間ê差別;大衛是重視kah上帝之間立約ê君王,而chit點mā是歷代志作者主要強調ê。

約櫃,這是用來象徵上帝kah以色列人民同在。因為án-ne,有約櫃tī-.teh,就表示上帝tī in中間。反之,就是無。因為án-ne,約櫃就成做以色列人民宗教生活ê中心。

第5到8節,當決定了後,大衛就號召全國人民lóng kah伊到基列‧耶琳去迎接約櫃入城。大衛kā約櫃khǹg tī「一台新ê車上,然後由烏撒kah亞希約tī頭前領路。照撒母耳記下第六章3節ê記載,in是亞比拿達ê kiáⁿ。然後,大衛kah所地人民lóng盡情地歡樂慶祝,ná親像嘉華年會一般。

第9到11節,無想tio̍h,當拉車ê牛差一點á絆倒ê時,烏撒趕緊伸手扶tòa約櫃,無想tio̍h上帝卻因為án-ne大大受氣,致使烏撒因為án-ne死tī hia,chit件事大衛真無歡喜。

為甚麼會造成烏撒ê死亡?這是一個常常hông提起ê問題。照歷代志作者ê觀點,大衛雖然有真好ê心意,m̄-koh,運送約櫃是一件非常神聖ê大事,bē-tàng隨便由一般人來搬運,一定tio̍h是有祭司資格ê人chiah thang,chit點是歷代志作者ê用意,chit點thang tùi第十五章13節大衛召集祭司、利未人來ê時說明ê原因看出,伊講:「因為lín 早前無án-ne 做, 咱ê 上帝— 上主已經kā 咱責罰,因為咱無照定tio̍h ê 例走chhōe祂。(全民版)」

第12到14節,因為chit件意外ê事件,hō͘大衛心生驚惶,m̄敢繼續運送約櫃,而kā約櫃暫時安置tī迦特城人俄別‧以東ê厝裡。Tùi第十五章21節、24節,以及第廿六章4到5節ê資料來看,就thang明白俄別‧以東乃是利未人。由伊看守約櫃mā是符合本來ê用意。約櫃tī chia停留了有三個月時間,真特別ê是:約櫃停留期間,上帝特別賜福hō͘俄別‧以東。這mā說明大衛之所以beh kā約櫃運送入耶路撒冷城ê原因。因為只要有上帝同在,就是siōng大ê福氣。

重新查詢 專卷研經 歷代志上系列
錯誤回報,請聯繫