歷代志上 11章1節 到 11章9節   背景資料  上一筆  下一筆
Tùi第十一章開始,直到第廿九章止,lóng是記載有關大衛王朝ê種種事蹟,可見無論是撒母耳記á是歷代志ê作者,lóng對大衛王非常ê重視。

頭前有提起過,歷代志就是用大衛kah所羅門兩位君王為主軸結構起來ê。上卷以大衛王朝為主軸,下卷以所羅門建造聖殿主軸。然後chiah講述南國猶大歷代君王統治ê情況。

Chit段經文thang參考撒母耳下第五章1到10節。Tī chia歷代志上作者只簡單記載大衛被擁護為以色列王ê經過。重點khǹg tī大衛是全以色列人民共同擁護出來帶領in ê王,因為「上主──萬軍ê統帥kah伊同在」,chit句話ē-sái講是大衛一生ê寫照。作者用chit種句話有一個明顯ê目的,就是君王制度固然是好,m̄-koh beh平衡君王ê權利,只有tńg來到信仰ê層面,chiah ē-tàng hō͘人學習謙卑、認罪,mā只有án-ne,chiah bē發生集大權tī一身ê君王亂使用權柄,卻是會學習知影家己ê軟弱kah有限,mā會有犯錯ê可能。大衛一生ê經歷就是án-ne teh說明chit種信仰認知。

第1到3節,chia所講ê「以色列所有ê人」,kah「所有以色列ê長老」,chit種詞句就是teh指北方ê以色列支族。希伯崙是tī耶路撒冷南邊。In來請求大衛做in ê王,並且tī上帝面前kah大衛立約,表示願意順服ê意思。因為án-ne,in就「膏立」大衛作以色列ê王。

第4到6節,chit段經文是記載大衛率領以色列軍隊去進攻耶布斯人ê城,mā thang看出chit-ê城tī約書亞帶領以色列人民進入迦南了後,直到掃羅當政ê時期lóng iáu未被攻打落來。Mā因為chit-ê城tú好隔閡tio̍h南部ê猶大、便雅憫kah西緬支族,久了後,就kah北部支族ê同胞疏遠à。大衛決定攻取耶布斯人ê chit-ê城,是真有智慧ê。後來chiâⁿ實phah落來,就改hit-ê城ê名為「耶路撒冷」。因為耶路撒冷是tī山phiāⁿ上,因為án-ne易守難攻。為tio̍h鼓舞以色列軍隊攻入城去,大衛用siōng大ê獎賞,就是甚麼人tāi先phah入去,甚麼人就當統帥(ná親像今á日ê國防部長)。

第7到9節,果然,重賞之下出勇夫,約押,原本就是大衛身邊ê大將,伊第一個率兵攻入耶路撒冷城。因為án-ne,伊當了元帥。大衛kā hit-ê城整建ê koh khah堅固,而且kā王宮遷入hit-ê城內,因為án-ne,hit-ê城koh kā它稱做「大衛城」。

Kui個大衛ê事蹟,thang用chit句話來形容:上主—─萬軍ê統帥kah伊同在。

重新查詢 專卷研經 歷代志上系列
錯誤回報,請聯繫