歷代志上 1章1節 到 1章27節   背景資料  下一筆
Tùi第一章開始一直到第九章lóng是族譜。Chit段族譜mā是聖經中siōng長篇幅ê。Á chit份族譜開始就是tùi亞當寫起,直到以色列民族全部淪落tī巴比倫做奴隸,以及in koh再tùi巴比倫回鄉,chiah-ê人lóng是一脈相承落來ê。這說明一件重要ê信息:tùi被揀選到受掠,koh再tùi被掠到被tháu放回鄉,lóng tī上帝ê計畫中進行。另外一方面,以色列人民非常重視族譜,因為族譜是表達性命ê延續,而且非常有規矩秩序,chit對一個tùi奴隸tńg去已成廢墟ê家園中beh重建ê民族來講,mā是teh chhōe一個新ê「秩序」ê方式,是非常重要ê出發點。Á kui個族譜結構就是用大衛王朝ê體系為底,因為大衛是出tī猶大ê kiáⁿ孫,mā因為án-ne,猶大ê族譜真自然tek就占有重要ê位置。Mā因為是大衛王朝ê系統,因為án-ne就hō͘人認為chiah-ê資料lóng是出tī「官方」ê觀點。

Chit章族譜是tùi亞當開始,直到以東(以掃ê kiáⁿ孫)結束,這mā teh表明上帝所關顧ê對象,其實並m̄是只有以色列民族,卻是世間所有ê族群,lóng是上帝所關心ê對象。以色列民族(雅各ê kiáⁿ孫)kah其他ê民族lóng仝款,無比較特別。只是上帝beh透過以色列民族來說明上帝揀選kah拯救ê疼。

Chit段經文ē-sái講是根據創世記ê資料編輯ê族譜。Tī編輯上有一個特色,就是先tùi雅弗、含ê kiáⁿ孫講起,然後chiah講閃族ê。仝款ê,tī第28節以後,tī閃族ê族譜是先tùi以實瑪利、以掃等等chiah-ê屬tī旁系ê族譜講起,然後chiah講猶大ê。

第1到4節,chit份族譜kah創世記第五章有關係,m̄-koh卻是簡略了真chē。Tī chit段族譜中,雖然是tùi亞當開始,m̄-koh卻無提起該隱kah亞伯,卻是直接就提塞特。這可能kah第四章24節所講ê彼此殘殺,因為án-ne,m̄是上帝所歡喜,結果消滅à。上帝後來決定hō͘亞當再生下一個kiáⁿ,名叫「塞特」,而當塞特生「以挪士」了後,創世記作者hō͘ chit-ê名下了一個非常重要ê意義,就是「人開始求告『耶和華』ê名」。

第5到7節,chit段記載挪亞ê三個kiáⁿ之族譜,而且是先tùi siōng小ê雅弗chit段族譜開始,這也kah創世記第十章有關挪亞族譜ê排序仝款,lóng是tùi雅弗(參考創世記十:2—4)開始寫起。仝款ê mā只有歌篾kah雅完有記錄落來in ê kiáⁿ孫。

第8到16節,chit段經文是關係挪亞第二個kiáⁿ含ê後代。Chit份族譜kah創世記第十章6到20節記載ê仝款。Chia mā是仝款,tī含ê四個kiáⁿ中間,只有「古實」、「埃及」,kah「迦南」有記落來in ê後代名。

第17到23節,chit段族譜是關係閃ê kiáⁿ孫。chit-ê族譜mā thang對照創世記第十章22到29節。創世記作者特別註明閃族就是「希伯」kiáⁿ孫ê祖先。Chit-ê「希伯」就是後來希伯來人ê祖先無論是tī chia á是tī創世記,lóng有強調講希伯有兩個kiáⁿ,其中有一名叫法勒,chit-ê名表示分散ê意思。因為tī伊ê時代,kiáⁿ孫無koh集中,卻是分散開來到各地khiā起。

第24到27節,chia講tùi「閃到亞伯蘭」,共計是十代。Tī創世記第十一章10到26節中,有真詳細記載chiah-ê世代在世間ê時間表,而且ē-tàng發見存活ê年限一代比一代減少,tùi閃ê六百歲,到亞伯蘭(亞伯拉罕),就只chhun一百七十五歲(參考創世記廿五:7)而已。

重新查詢 專卷研經 歷代志上系列
錯誤回報,請聯繫