30.第廿一章33到46節：
Tùi chit-ê譬喻thang看出耶穌kah猶太宗教領袖之間ê衝突真大。耶穌用chit段葡萄園譬喻來講述chiah-ê宗教領袖心態上ê thang議ê所在，就是in有竊據上帝主權ê心思意念。

第33節，是採用以賽亞書第五章2節有關主人開墾葡萄園ê詩歌為背景。

第34節，葡萄園主人外出去旅行前，kā葡萄園出租。依照利未第十九章23到25節ê記載，開墾新種ê果子樹，前三年收成ê果子lóng tio̍h當作無清氣ê，第四年ê收成是屬tī上帝ê初熟果子，第五年chiah是屬tī家己ê。因為án-ne，chia講「到à葡萄成熟ê季節」，mā就是第五年收成ê時，beh去收租金。Chia指出葡萄園主人「應得ê分額」，意思是in之間有契約關係。

第35到39節，chit段經文是佃戶ê心態就是想beh霸佔該葡萄園，因為án-ne，對主人派僕人去收租金，m̄-nā無beh hō͘伊，iáu kā收租ê僕人殺害。最後主人只好派出家己ê kiáⁿ兒去收租金，結果iáu是仝款遭遇tio̍h殺害。Kui個譬喻ê中心經文是tī第38節，佃戶想beh「奪取」園主ê產業，自命為園主。

第40到41節，真清楚地，園主一定會採取行動，嚴厲懲罰chiah-ê惡劣ê佃戶。然後收tńg來葡萄園，轉租hō͘「ē-tàng按時交租ê佃戶」。

第42節，chit節是引用詩篇第一一八篇22到23節ê詩歌，表示人所看bē起ê上帝僕人，tī上帝手中卻是siōng貴重ê。

第43到44節，耶穌指出chiah-ê猶太宗教眾領袖，根本就無份tī上帝國，因為in kah想beh奪取葡萄園ê惡佃戶仝款。

第45到46節，chiah-ê宗教領袖聽了後，非常受氣，因為in知影chit-ê譬喻就是teh講in，而且kāin譬喻為無得救希望ê對象，in感覺lóng受侮辱，因為án-ne，想beh掠耶穌。因為he是tī聖殿範圍內，in ē-tàng直接掠，而且送去siōng koân議會審判，m̄-koh in m̄敢án-ne做，原因是當時正逢Pôaⁿ過節，耶路撒冷城婦人人潮真kheh，特別是群眾lóng歡喜耶穌，而且認為伊是「先知」，萬一掠耶穌引發群眾情緒激盪á失控，in會受tio̍h羅馬政府ê嚴厲懲罰。因為án-ne，m̄敢出手掠。