利未记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
18:1 Îm-loān ê Kìm-lēng
Siōng-chú hoan-hù Mô͘-se kóng,
18:2 " Lí tio̍h hoan-hù I-su-la-el lâng, kā in kóng, Góa sī Siōng-chú — lín ê Siōng-tè.
18:3 Lín í-chêng só͘ tòa ê Ai-gi̍p tē, hit ūi ê lâng só͘ kiâⁿ ê lín m̄ thang chun-thàn in lâi kiâⁿ, Góa beh chhōa lín kàu Ka-nân tē, hit ūi ê lâng só͘ kiâⁿ ê, lín mā m̄ thang chun-thàn in lâi kiâⁿ, mā m̄ thang chiàu in ê kui-lē lâi kiâⁿ.
18:4 Lín tio̍h chun-thàn Góa ê hoat-tō͘, siú Góa ê lu̍t-lē, chiàu chit-ê lâi kiâⁿ, Góa sī Siōng-chú — lín ê Siōng-tè.
18:5 Só͘-í, lín tio̍h siú Góa ê lu̍t-lē kah hoat-tō͘, lâng nā kiâⁿ chiahê chiū ē tùi chiahê lâi oa̍h, Góa sī Siōng-chú.
18:6 " Lín lóng m̄ thang chhin-kīn kut-jio̍k ê chhin, lâi lō͘-hiān i ê ē-sin, Góa sī Siōng-chú.
18:7 " M̄-thang lō͘-hiān lí ê lāu-bú ê ē-sin, lâi lêng-jio̍k lí ê lāu-pē. I sī lí ê lāu-bú, m̄ thang lō͘-hiān i ê ē-sin.
18:8 " Lí ê lāu-pē ê āu-bó͘ ê ē-sin, lí m̄ thang lō͘-hiān, in-ūi he sī lí ê lāu-pē ê ē-sin.
18:9 " Lí ê chí-mōe, bô-lūn sī tâng-pē ê á-.sī tâng-bú ê, chhut-sì tī chhù lāi á-.sī chhut-sì tī ke-gōa, lóng m̄ thang lō͘-hiān in ê ē-sin.
18:10 " Lí ê hāu-seⁿ ê chabó͘ kiáⁿ, á-.sī lí ê chabó͘ kiáⁿ ê chabó͘ kiáⁿ, m̄ thang lō͘-hiān in ê ē-sin, in-ūi he sī lí pún-sin ê ē-sin.
18:11 " Lí ê lāu-pē ê āu-bó͘ ê chabó͘ kiáⁿ, tùi lí ê lāu-pē seⁿ ê, sī lí ê sió-mōe, m̄ thang lō͘-hiān i ê ē-sin.
18:12 " M̄-thang lō͘-hiān lí ê a-ko͘ ê ē-sin, i sī lí ê lāu-pē kut-jio̍k ê chhin.
18:13 " M̄-thang lō͘-hiān lí ê a-î ê ē-sin, i sī lí ê lāu-bú kut-jio̍k ê chhin.
18:14 " Lí m̄ thang lêng-jio̍k lí ê chek-peh, lō͘-hiān i ê bó͘ ê ē-sin, i sī lí ê a-ḿ, lí ê a-chím.
18:15 " Lí m̄ thang lō͘-hiān lí ê sim-pū ê ē-sin, i sī lí ê kiáⁿ ê bó͘, m̄ thang lō͘-hiān i ê ē-sin.
18:16 " M̄-thang lō͘-hiān lí ê hiaⁿ-tī ê bó͘ ê ē-sin, he sī lí ê hiaⁿ-tī ê ē-sin.
18:17 " Cha-bó͘ lâng kah i ê chabó͘ kiáⁿ ê ē-sin lóng m̄ thang lō͘-hiān, m̄ thang kā i ê kiáⁿ ê chabó͘ kiáⁿ, á-.sī i ê chabó͘ kiáⁿ ê chabó͘ kiáⁿ ê ē-sin lō͘-hiān, in sī kut-jio̍k ê chhin, ánne chò sī chin pháiⁿ.
18:18 " Bó͘ iáu tī-.leh, lí m̄ thang lēng-gōa koh chhōa i ê chí-mōe, lō͘-hiān i ê ē-sin, lâi chò i ê tùi-thâu.
18:19 " Cha-bó͘ lâng keng-kî kàu bô chheng-khì ê sî, lí m̄ thang kīn-óa i lâi lō͘-hiān i ê ē-sin.
18:20 " Lí m̄ thang kah chhù-piⁿ ê bó͘ kiâⁿ kan-îm, lâi òe lahsap kakī.
18:21 " M̄-thang hō͘ lí ê kiáⁿ-jî tùi hóe tiong kòe-.khì, kui hō͘ Mô͘-lo̍k, mā m̄ thang siat-to̍k lí ê Siōng-tè ê miâ. Góa to̍h-sī Siōng-chú.
18:22 " M̄-thang kah chapo͘ lâng kau-ha̍p, chhin-chhiūⁿ kah chabó͘ lâng sio-siâng, che sī chin khó-ò͘ⁿ ê tāichì.
18:23 " Bô-lūn siáⁿ-mi̍h siù, m̄ thang kah i kau-ha̍p lâi òe lahsap kakī. Cha-bó͘ lâng mā m̄ thang khiā tī siù ê thâu-chêng kah i kau-ha̍p, che sī ge̍k-sèng ê tāichì.
18:24 " Tī chiahê it-chhè ê tāichì, lín lóng m̄ thang òe lahsap kakī, in-ūi Góa tī lín ê bīn-chêng só͘ kóaⁿ-chhut ê lia̍t pang, tī chiahê it-chhè ū òe lahsap kakī.
18:25 Tē mā òe lahsap, só͘-í, Góa pān i ê chōe, hit-ê tē mā thò͘-chhut tòa tī hia ê jîn-bîn.
18:26 Só͘-í, lín tio̍h siú Góa ê lu̍t-lē kah Góa ê hoat-tō͘, chiahê it-chhè khó-ò͘ⁿ ê tāichì, bô-lūn sī pún-tē-lâng á-.sī kià-kha tī lín tiong-kan ê chhut-gōa lâng, lóng m̄ thang ánne kiâⁿ.
18:27 ( In-ūi tī lín í-chêng tòa hit-ê tē ê lâng kiâⁿ chiahê it-chhè khó-ò͘ⁿ ê tāichì, tē chiū òe lahsap. )
18:28 Bián-tit lín òe lahsap hit-ê tē ê sî, tē chiū kā lín thò͘ chhut-.lâi kah thò͘-chhut tī lín í-chêng ê jîn-bîn kāng-khoán.
18:29 " In-ūi kiàn-nā kiâⁿ chiahê it-chhè khó-ò͘ⁿ ê tāichì ê chi̍t hāng, ánne kiâⁿ ê lâng ē hông tùi i ê jîn-bîn tiong chián-tû.
18:30 Só͘-í, lín tio̍h siú Góa só͘ kau-tài ê, bián-tit lín chun-thàn hiahê khó-ò͘ⁿ ê hong-sio̍k, to̍h-sī tī lín í-chêng ê lâng só͘ tiāⁿtiāⁿ kiâⁿ ê, tì-sú lín tùi hiahê lâi òe lahsap kakī. Góa to̍h-sī Siōng-chú — lín ê Siōng-tè. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。