创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
50:1 Iô-sé-huh phak tī i ê lāu-pē ê bīn-chêng thî-khàu, kā i chim.
50:2 Iô-sé-huh hoan-hù sū-hāu i ê i-seng, ēng phang-liāu koàn i ê lāu-pē, i-seng chiū ēng phang-liāu koàn I-su-la-el.
50:3 Koàn sin-si tiāⁿ tio̍h ê lē tio̍h sì-cha̍p kang, hit-ê sì-cha̍p kang móa, Ai-gi̍p lâng koh ūi i thî-khàu chhit-cha̍p kang.
50:4 Ūi tio̍h i thî-khàu ê ji̍t kòe liáu-āu, Iô-sé-huh tùi Hôa-láu chhù lāi ê lâng kóng, " Góa nā tī lín ê bīn-chêng tit tio̍h un-tián, chhiáⁿ lín thong-ti Hôa-láu, kā i kóng,
50:5 ' Góa ê lāu-pē kiò góa chiùchōa kóng, góa beh sí à, lí tio̍h kā góa bâi-chòng tī Ka-nân tē, tī góa ūi pún-sin só͘ ku̍t ê bōng. ' Taⁿ kiû lí chún góa tńg-khì bâi-chòng góa ê lāu-pē, jiân-āu góa ē koh tò tńg-.lâi. "
50:6 Hôa-láu kóng, " Lí thang tńg-khì bâi-chòng lí ê lāu-pē, chiàu i só͘ kah lí chiù ê chōa. "
50:7 Chiū ánne, Iô-sé-huh tńg-khì kā i ê lāu-pē bâi-chòng. Kah i chò-hóe tńg-.khì ê, ū Hôa-láu ê chèng jîn-sîn kah Hôa-láu chhù lāi ê tiúⁿ-ló, í-ki̍p Ai-gi̍p kok ê chèng tiúⁿ-ló,
50:8 koh ū Iô-sé-huh choân ke kah i hiahê hiaⁿ-tī, í-ki̍p i ê lāu-pē ê ka-koàn, chí ū in ê gín'á kah iûⁿ-kûn, gû-kûn, lóng lâu tī Go-sián tē.
50:9 Koh ū chhia kah khiâ bé ê, hit-tīn lâng put-chí chē.
50:10 In lâi-kàu Iol-tàn hô gōa, A-ta̍t ê tiūⁿ-tiâⁿ, chiū tī hia tōa thî-khàu, tōa ai-siong; Iô-sé-huh ūi tio̍h lāu-pē pi-siong chhit ji̍t.
50:11 Tòa tī Ka-nân tē ê jîn-bîn khòaⁿ tio̍h A-ta̍t tiūⁿ-tiâⁿ ê thî-khàu, chiū kóng, " Che sī Ai-gi̍p lâng ê chi̍t tiûⁿ tōa thî-khàu. " In-ūi ánne, hit-ê tē miâ kiò-chò A-bel-mit-laim, sī tī Iol-tàn hô gōa.
50:12 Iâ-kop hiahê kiáⁿ chiū chiàu lāu-pē só͘ hoan-hù ê khì chò.
50:13 Hiahê kiáⁿ kā i ūn kàu Ka-nân tē, bâi-chòng tī Mam-lē ê thâu-chêng, Mak-pe-la̍h chhân-.ni̍h ê hia̍t; hit-ê hia̍t kah chhân sī A-bu-la-hàm tùi Hiat lâng E-hu-lóng bé lâi chò sán-gia̍p kah chò bōng-tē ê.
50:14 Iô-sé-huh bâi-chòng in lāu-pē í-āu, chiū kah chèng hiaⁿ-tī, í-ki̍p it-chhè kah i tńg-khì bâi-chòng in lāu-pē ê lâng, lóng tò tńg-khì Ai-gi̍p.
50:15 Iô-sé-huh An-ùi Chèng Hiaⁿ-tī
Iô-sé-huh hiahê a-hiaⁿ khòaⁿ in lāu-pē í-keng sí, chiū kóng, " Kiám-chhái Iô-sé-huh beh oàn-hūn lán, chiàu lán í-chêng kā i khoán-thāi só͘-ū ê pháiⁿ, choân-pō͘ kā lán pò-ho̍k. "
50:16 In chiū thok lâng khì kìⁿ Iô-sé-huh kóng, " Lí ê lāu-pē bōe sí ê chìn-chêng, ū hoan-hù kóng,
50:17 ' Lín tio̍h tùi Iô-sé-huh ánne kóng, í-chêng lí chiahê a-hiaⁿ pháiⁿ khoán-thāi lí, kiû lí sià-bián in ê kòe-sit kah chōe-ok. ' Taⁿ kiû lí sià-bián lí ê lāu-pē ê Siōng-tè ê lô͘-po̍k ê kòe-sit. " In tùi Iô-sé-huh kóng chiahê ōe, Iô-sé-huh chiū thî-khàu.
50:18 I chiahê a-hiaⁿ koh lâi phak tī i ê bīn-chêng, kóng, " Goán sī lí ê lô͘-po̍k. "
50:19 Iô-sé-huh kā in kóng, " M̄-bián kiaⁿ, góa kám sī teh tāi-thè Siōng-chú? "
50:20 Í-chêng lín ê ì-sù sī pháiⁿ, chóng-.sī, Siōng-tè ê ì-sù sī hó; I beh pó-choân chin chē lâng ê sèⁿ-miā, chhin-chhiūⁿ kin-á-ji̍t.
50:21 Taⁿ lín m̄-bián kiaⁿ, góa ē iúⁿ-chhī lín kah lín ê kiáⁿ-jî. " Chiū ánne, Iô-sé-huh ēng chhin-ài ê ē kā in an-ùi.
50:22 Iô-sé-huh ê Sí-bông
Iô-sé-huh kah in lāu-pē ê ka-koàn lóng tòa Ai-gi̍p, Iô-sé-huh oa̍h pah-it hòe.
50:23 Iô-sé-huh ū oa̍h kàu khòaⁿ tio̍h E-hu-laim tē-saⁿ tāi ê sun; Má-ná-se ê sun Ma-kil ê kiáⁿ, Iô-sé-huh mā ū kā in phō tī kha-thâu-u.
50:24 Iô-sé-huh tùi i ê hiaⁿ-tī kóng, " Góa teh beh sí à, chóng-.sī, Siōng-tè it-tēng ē khòaⁿ-kò͘ lín, chhōa lín tùi chit só͘-chāi chiūⁿ-.khì, kàu I chiùchōa èng-ín hō͘ A-bu-la-hàm, Í-sak, Iâ-kop ê tē. "
50:25 Iô-sé-huh kah I-su-la-el ê kiáⁿ-sun chiùchōa kóng, " Siōng-tè it-tēng ē chiàu-kò͘ lín, lín tio̍h kā góa ê kut-thâu ūn tńg-.khì. "
50:26 Iô-sé-huh sí ê sî tú-á pah-it hòe, lâng ēng phang-liāu kā i koàn, kā i siu lo̍h-khì koaⁿ-chhâ, thêng tī Ai-gi̍p.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。