箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Chiân-giân
I-su-la-el ông Ta-bi̍t ê kiáⁿ Só͘-lô-móng ê Chim-giân.
1:2 Chiahê Chim-giân ē hō͘ lâng liáu-kái tì-hūi kah kà-sī, bêng-pe̍k thong-ta̍t ê ōe;
1:3 Ē hō͘ lâng tit tio̍h kà-sī, lâi ēng tì-hūi pān tāichì, ē hō͘ lâng ū kong-gī, kong-pêⁿ kah chèng-ti̍t.
1:4 Hō͘ gōng-ti̍t ê lâng ū lêng-khiàu, hō͘ siàu-liân lâng ū tì-sek kah kè-ōe;
1:5 Hō͘ tì-hūi ê lâng thiaⁿ-liáu ke-thiⁿ ha̍k-būn, hō͘ chhong-bêng ê lâng tit tio̍h chin ê kiàn-sek;
1:6 Hō͘ lâng bêng-pe̍k Chim-giân kah phì-jū, lí-kái tì-hūi lâng ê giân-sû kah bī-chhai.
1:7 Kèng-ùi Siōng-chú sī tì-sek ê kin-pún; gû-gōng ê lâng biáu-sī tì-hūi kah kà-sī.
1:8 Khó͘-khǹg Siàu-liân Lâng
Góa ê kiáⁿ, tio̍h thiaⁿ lí ê lāu-pē ê kàu-tok; m̄ thang khì-sak lí ê lāu-bú ê kà-sī.
1:9 In-ūi chiahê ōe ē chò lí thâu-khak téng ê bián-liû, chò lí ām-kún ê kim-liān.
1:10 Góa ê kiáⁿ, pháiⁿ lâng nā ín-iú lí, lí m̄ thang tòe i kiâⁿ.
1:11 In nā kóng, " Lí kah goán chò-hóe khì, lâi bih-.leh thâi lâng, tng-tán bû-ko͘ ê lâng lâi kā i thâi.
1:12 Lán chhin-chhiūⁿ im-hú kā in oa̍h-oa̍h thun lo̍h-.khì; in chhin-chhiūⁿ hām-lo̍h kheⁿ ê lâng hō͘ lán chò chi̍t-ē thun lo̍h-.khì.
1:13 Lán ē tit tio̍h ta̍k chióng ê châi-bu̍t, kā só͘ chhiúⁿ ê tún-móa lán ê chhù.
1:14 Lí lâi ji̍p goán ê tóng, tāi-ke ū kong-kiōng ê chîⁿ-tē. "
1:15 Góa ê kiáⁿ, m̄ thang kah in tâng kiâⁿ, tio̍h iok-sok lí ê kha, m̄ thang ta̍h ji̍p-khì in ê lō͘.
1:16 In-ūi in ê kha cháu-khì kiâⁿ pháiⁿ, in kóaⁿ-kín beh khì hō͘ lâng lâu hoeh.
1:17 Lâng nā hō͘ chiáu-á khòaⁿ tio̍h i teh Siat ê lô-bāng, siūⁿ beh lia̍h chiáu á-.sī bô chhái kang.
1:18 Chiahê lâng bih-.leh sī beh hāi lâng, khiok sī ē lâu in kakī ê hoeh; tng-tán beh siong lâng, khiok sī ē hāi tio̍h kakī ê sèⁿ-miā.
1:19 Kiàn-nā tham châi-lī ê, in ê lō͘ sī ánne, to̍h-sī hāi tio̍h in kakī ê sèⁿ-miā.
1:20 Tì-hūi ê Ho͘-siaⁿ
Tì-hūi tī ke-lō͘ tōa-siaⁿ teh kiò, tī khui-khoah ê só͘-chāi chhut i ê siaⁿ.
1:21 I tī lāu-jia̍t ê ke-lō͘ thâu tōa-siaⁿ teh kiò, tī siâⁿ mn̂g-kháu, tī siâⁿ lāi, kóng-chhut i ê ōe,
1:22 " Gōng-ti̍t ê lâng ài gōng-ti̍t, bú-bān ê lâng ài bú-bān, gû-gōng ê lâng oàn-hūn tì-sek, beh kàu tang-sî?
1:23 Góa kā lín chek-pī, lín tio̍h chun-thàn góa ê ōe; lí khòaⁿ, góa beh kā Sèng Sîn kàng-lo̍h hō͘ lín, ēng góa ê ōe chí-sī lín.
1:24 In-ūi góa bat kiò lín, lín m̄-thiaⁿ; góa bat chhun chhiú kā lín chio-ho͘, lín bô lâng tì-ì;
1:25 Lín tian-tò khòaⁿ-khin góa só͘-ū ê khoàn-kài, m̄-khéng chiap-siū góa ê chek-pī.
1:26 Só͘-í, lín tú tio̍h hoān-lān ê sî, góa beh léng-chhiò; lín tú tio̍h kiaⁿ-hiâⁿ ê sî, góa beh thí-chhiò.
1:27 Lín ê kiaⁿ-hiâⁿ chhin-chhiūⁿ kông hong sàu-lâi, lín ê chai-hō chhin-chhiūⁿ kńg-lê-á hong sàu lâi, hoān-lān thòng-khó͘ lîm-kàu tī lín ê sin chiūⁿ.
1:28 Hit sî, lín beh kiû góa, góa m̄-thiaⁿ; lín pek-chhiat cháu-chhōe góa, chhōe bē tio̍h.
1:29 In-ūi lín oàn-hūn tì-sek, bô ài kèng-ùi Siōng-chú.
1:30 Lín m̄-thiaⁿ góa ê khoàn-kài, biáu-sī góa ê chek-pī.
1:31 Só͘-í, lín ē chia̍h kakī hêng-ûi só͘ kiat ê kóe-chí, lín kakī só͘ kè-bô͘ ê ok 果 ē hō͘ lín chia̍h kah pá koh ià.
1:32 Gōng-ti̍t ê lâng ē hō͘ kakī ê pōe-ge̍k hāi-sí; gû-gōng ê lâng ê hó kòe-ji̍t ē hō͘ i tì-sú bia̍t-bông.
1:33 To̍k-to̍k chun-thàn góa ê ōe ê lâng ē an-jiân seng-oa̍h, hióng-siū pêng-an, bô kiaⁿ chai-hō. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。