列王纪下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 乃缦得tio̍h医治
亚南王ê军长乃缦，tī伊ê主人ê面前做大，做尊贵，因为上主bat用伊hō͘亚南得胜，伊mā是大权能ê勇士，总是，伊患癞ko。
5:2 早前亚南人kui阵出去，tùi以色列地掠一个chabó͘ gín-á，她to̍h来侍候乃缦ê bó͘。
5:3 她kā她ê主母讲：「苦bē tàng我ê主kah撒马利亚ê先知同在，伊一定ē医好伊ê癞ko。」
5:4 有人入去kā伊ê主讲：「属以色列地ê chabó͘ gín-á ánne ánne讲。」
5:5 亚南王讲：「你去，我mā beh寄一张phoe hō͘以色列王。」乃缦to̍h去，带银十他连得，金六千，衫裤十套；
5:6 带phoe去到以色列王hia。Phoe内讲：「Phoe到你hia ê时，你看，我差人臣乃缦去见你，你tio̍h kā伊ê癞ko医好。」
5:7 以色列王看phoe了后，to̍h拆裂伊ê衫，讲：「我kám是上主，ē tàng hō͘人死，hō͘人活？Chitê人竟然差人来我chia，叫我医好伊ê癞ko。请lín 斟酌想，看chitê人án怎chhōe缝beh来攻击我。」
5:8 上帝ê奴仆以利沙听tio̍h以色列王拆裂伊ê衫，to̍h差人去见王讲：「你ná ē拆裂衫？Thang hō͘ hitê人来我chia，伊chiah知以色列中有先知。」
5:9 乃缦to̍h kah伊ê马，伊ê车来，khiā tī以利沙ê厝门口。
5:10 以利沙差一个使者，kā乃缦讲：「你去约旦河洗身躯七pái，你ê肉to̍h ē复原，你ē得tio̍h清气。」
5:11 乃缦就受气，退去，讲：「我本想讲伊一定ē出来见我，khiā-teh求叫上主—伊ê上帝ê名，tī患tio̍h ê所在摇手，来医好癞ko ê。」
5:12 大马士革ê河，A-má-nah kah Phal-phal，kám无比以色列所有ê水khah好？我kám bē tàng tī hia洗身躯来清气？」to̍h oa̍t-tńg身受气，做伊去。
5:13 乃缦ê奴仆进前来，kā伊讲：「我ê父，先知若叫你去做一件大事，你kám无beh做？何况伊kantaⁿ kā你讲，去洗to̍h ē清气？」
5:14 乃缦to̍h落去，照上主奴仆ê话，tī约旦河洗身躯七pái；伊ê肉就复原，亲像gín-á肉，伊to̍h清气。
5:15 乃缦kah所有tòe伊ê人倒tńg来上帝ê奴仆hia，khiā tī伊ê面前讲：「你看，我taⁿ知，除以色列以外，普天下无有上帝。Taⁿ求你收你ê奴仆ê礼物。」
5:16 以利沙讲：「我kí永远活ê上主，to̍h是我khiā tī他ê面前ê，来chiùchōa，我一定m̄收。」乃缦强迫伊收，m̄ koh伊绝对m̄收。
5:17 乃缦讲：「若m̄收，求你kā两只骡所ē tàng载ê土hō͘你ê奴仆，因为tùi taⁿ以后，你ê奴仆无koh用烧祭á是别种ê祭hō͘别个神明，只有beh献hō͘上主。
5:18 独独有一项事，愿上主赦免你ê奴仆，to̍h是我ê主入临门 ê庙，tī hia敬拜，óa tio̍h我ê手ê时，我koh tī临门ê庙àⁿ腰，to̍h是我tī临门ê庙àⁿ腰ê时，愿上主tī chit件tāichì赦免你ê奴仆。」
5:19 上帝ê奴仆to̍h kā伊讲：「你thang平安去。」乃缦to̍h离开伊去，
5:20 行一站á了后，上帝ê奴仆以利沙ê差用基哈西，心内想讲：我ê主人体贴chitê亚南人乃缦，无beh tùi伊ê手收伊所带来ê，我kí永远活ê上主来讲，我beh走去jiok伊，tùi伊the̍h淡薄。
5:21 基哈西to̍h去jiok乃缦。乃缦看tio̍h有人走来jiok伊，to̍h落车kā伊迎接，讲：「Lóng平安？」
5:22 基哈西讲：「Lóng平安。我ê主差我来讲：『Tú-chiah有两 个少年人，是先知ê学生，tùi以法连山地来见我，请你用银一他连得kah衫裤两套hō͘伊。」
5:23 乃缦讲：「M̄-thang推辞，请收两他连得。」强迫伊，to̍h kā两他连得银装tī两 个布袋，kah两套衫裤交hō͘伊ê两 个奴仆；两 个奴仆kā hiahê物背teh，行tī伊ê头前。
5:24 来到山里ê时，基哈西tùi in ê手接来，hē tī厝内，差in去，in to̍h去。
5:25 伊to̍h入去khiā tī伊ê主人ê面前。以利沙问伊讲：「基哈西，你tùi tó位来？」伊应讲：「你ê奴仆无去tó位。」
5:26 以利沙kā伊讲：「Hitê人落车倒tńg来kā你迎接ê时，我ê心kám无kah你去？这kám是接受银，接受衫裤、橄榄园、葡萄园、牛、羊、奴仆、女婢ê时？」
5:27 就ánne，乃缦ê癞ko beh传hō͘你kah你ê kiáⁿ孙，一直到永远。基哈西tùi以利沙ê面前退出去，to̍h起癞ko，白kah亲像雪。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。