创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
32:1 雅各准备kah以扫相会
雅各koh继续行伊ê路，上帝ê使者tú tio̍h伊。
32:2 雅各看tio̍h in，to̍h讲：「这是上帝ê军队。」所以，kā hit所在号名叫做玛哈念。
32:3 雅各差人先去西珥ê地，以东ê田，见伊ê阿兄以扫。
32:4 伊kā in吩咐讲：「Lín kā我ê主以扫讲：『你ê奴仆雅各ánne讲：我tī拉班hia寄脚，tòa到今á日。
32:5 我有牛、驴、羊群、奴仆、女婢，taⁿ差人来报我ê主，ài beh tī你ê面前得tio̍h恩典。』」
32:6 所差ê人tńg来雅各hia，讲：「阮到你ê阿兄以扫hia，伊chitmá当teh来beh kā你迎接，koh有四百人kah伊做伙来。」
32:7 雅各大惊koh心闷，to̍h kā hiahê kah伊同在 ê人、羊群、牛群、骆驼，分做两队，
32:8 讲：「以扫若来攻击chit队，chhun-ê hit队iáu thang逃走。」
32:9 雅各koh讲：「我ê祖先亚伯拉罕ê上帝，我ê父以撒ê上帝—上主ah，祢bat对我讲：『Tò去你ê本地本族，我ē好款待你。』
32:10 祢对祢ê奴仆所施一切ê慈爱kah诚实，to̍h是siōng细ê我mā bē堪得得tio̍h；我前gia̍h我ê拐á，过chitê约旦河，taⁿ我已经成做两队。
32:11 求祢救我脱离我ê阿兄以扫ê手，因为我惊伊，恐惊伊来thâi死我kah我hiahê bó͘-kiáⁿ。
32:12 祢mā bat讲：『我一定ē好款待你，hō͘你ê kiáⁿ孙亲像海边ê沙，chē到算bē了。』」
32:13 Hit暝，雅各歇tī hia，to̍h tī伊所有ê物ê内面，拣出礼物，beh送伊ê阿兄以扫：
32:14 山羊母两百只，山羊kang二十只，绵羊母两百只，绵羊kang二十只，
32:15 骆驼母kah食奶ê kiáⁿ三十只，牛母四十只，牛káng十只，驴母二十只，驴á-kiáⁿ十只。
32:16 伊kā各种chengseⁿ另外一群一群分开，交带奴仆管理，koh kā奴仆讲：「Lín做我ê头前去，tio̍h hō͘ ta̍k群之间有相离。」
32:17 伊koh吩咐做头ê讲：「我ê阿兄以扫tú tio̍h你ê时，若问你讲：『你是啥人ê？你beh去tó位？你头前hiahê chengseⁿ是啥人ê？』
32:18 你tio̍h讲：『是你ê奴仆雅各ê，是beh送我ê主以扫ê礼物。伊chitmá本身mā tī阮ê后面。』」
32:19 雅各koh吩咐第二群、第三群kah所有赶kui群chengseⁿ ê人讲：「Lín tú tio̍h以扫ê时，mā tio̍h照ánne kā伊讲。
32:20 Lín mā tio̍h讲：『你ê奴仆雅各tī阮ê后面。』」因为雅各kakī 想讲：「我用tī我头前去ê礼物来解伊ê恨，然后我见tio̍h伊ê面ê时，kiámchhái伊ē接纳我。」
32:21 就ánne，礼物先行；hit暝，雅各歇tī帐房 中。
32:22 雅各tī 毗努伊勒相ián
雅各暗时起来，chhōa伊两 个bó͘、两 个女婢kah十一个kiáⁿ，lóng过雅博ê渡头。
32:23 伊tāi先hō͘ in过溪，所有ê mā lóng hō͘ in过。
32:24 只有chhun雅各kakī tī hia。有一个人来kah伊相ián，一直到天phú光。
32:25 Hitê人看ián bē赢伊，就siàn雅各ê大腿臼；相ián ê时，雅各ê大腿臼choāiⁿ ・tio̍h。
32:26 Hitê人讲：「天beh光à，tio̍h放我去。」雅各讲：「祢若无kā我祝福，我m̄放祢去。」
32:27 Hitê人讲：「你ê名叫做啥物？」伊讲：「我叫做雅各。」
32:28 Hitê人讲：「你ê名无beh koh叫做雅各，beh叫做以色列，因为你kah上帝á是kah人斗输赢，lóng得tio̍h khah赢。」
32:29 雅各问他讲：「请kā我讲祢ê名。」Hitê人应讲：「你án怎beh问我ê名？」然后，to̍h tī hia kā伊祝福。
32:30 雅各kā hit所在叫做毗努伊勒，因为伊讲：「我当头对面见tio̍h上帝，我ê性命iáu得tio̍h保全。」
32:31 日tú-á出，雅各经过毗努伊勒，伊ê大腿已经跛。
32:32 所以，到今á日，chiahê以色列人无食大腿头ê筋，因为hitê人siàn雅各大腿臼ê筋。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。