列王纪上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
3:1 所罗门祈求智慧
(代下1：3-12)
所罗门kah埃及王法老结亲，娶法老ê chabó͘ kiáⁿ做bó͘，chhōa她入大卫城，thèng候伊起kakī ê厝kah上主ê殿，以及耶路撒冷四箍围ê城墙完工。
3:2 当时iáu未有为上主ê名起殿，所以，人民犹原tī山头坛献祭。
3:3 所罗门疼上主，照ánne行伊ê老父大卫ê律法，独独tī山头坛献祭烧香。
3:4 王去基遍献祭，因为tī hia有极大ê山头坛，所罗门tī坛顶献烧祭ê chengseⁿ一千只。
3:5 Tī基遍，暗时tī梦中，上主对所罗门出现，上主讲：「你ài我赏赐hō͘你啥物？你thang对我求。」
3:6 所罗门讲：「祢bat施大恩hō͘祢ê奴仆—我ê老父大卫，照伊用诚实、公义、正直ê心，kah祢同在，行tī祢ê面前。祢mā kā伊留chitê大恩典，to̍h是赏赐伊一个kiáⁿ来坐伊ê位，亲像今á日ánne。
3:7 上主—我ê上帝ah，taⁿ祢hō͘祢ê奴仆续接我ê老父大卫做王；总是，我是gín-á，m̄知tio̍h án怎出入。
3:8 祢ê奴仆tiàm tī祢所拣ê人民中间，chiahê人民chē到算bē了。
3:9 求祢赏赐祢ê奴仆智慧ê心，thang判断祢ê子民，来分别好pháiⁿ，因为啥人ē tàng判断祢chiah chē ê人民？」
3:10 因为所罗门求这，主欢喜伊ê话。
3:11 上主对伊讲：「你既然求这，无为kakī 求岁寿，无为kakī 求好额，mā无求灭亡你ê对敌ê性命，kantaⁿ为kakī 求智慧thang分别审判ê道理，
3:12 你看，我beh照你ê话来做，我beh赏赐hō͘你聪明智慧ê心，致到以前无人亲像你，以后mā无有人亲像你。
3:13 你所无求ê，to̍h是好额kah尊贵，我mā ē hō͘你，hō͘你tī世间ê日子，列王无一个ē tàng kah你比得。
3:14 你若行我ê道路，守我ê律例kah我ê诫命，学你ê老父大卫所行ê，我to̍h ēhō͘你长岁寿。」
3:15 所罗门困醒，知影是眠梦。to̍h去耶路撒冷khiā tī上主ê约柜前，献烧祭kah谢恩祭，koh为tio̍h伊hiahê人臣排设宴席。
3:16 所罗门判断疑难案件
有一日，两 个妓女来王hia，khiā tī王ê面前。
3:17 一个chabó͘人讲：「我ê主，我kah chitê chabó͘人做伙tòa一间厝，我tī厝内生一个kiáⁿ。
3:18 我生kiáⁿ了后第三日，chitê chabó͘人mā生gín-á，阮做伙tòa，除阮两人以外，厝内无别人kah阮做伙。
3:19 暗时，chitê chabó͘人ê kiáⁿ死去，因为她困ê时teh tio̍h伊。
3:20 她半暝起来，趁你ê女婢teh困，tùi我ê身边kā我ê gín-á抱去，hē tī她ê胸前，kā她ê死gín-á hē tī我ê胸前。
3:21 天beh光ê时，我起来beh hō͘我ê gín-á食奶，无想讲，gín-á已经死去；到天光，我详细看，伊m̄是我所生ê kiáⁿ。」
3:22 Hitê chabó͘人讲：「M̄是！活ê是我ê kiáⁿ，死ê是你ê kiáⁿ。Chitê chabó͘人讲：「M̄是！死ê是你ê kiáⁿ，活ê是我ê kiáⁿ。」In tī王ê面前ánne相诤。
3:23 王讲：「Chitê chabó͘人讲：『活ê kiáⁿ是我ê，死ê kiáⁿ是你ê。』Hitê chabó͘人讲：『M̄是！死ê kiáⁿ是你ê，活ê kiáⁿ是我ê。』」
3:24 王to̍h讲：「Kā我gia̍h刀来！」In就gia̍h刀来到王ê面前。
3:25 王koh讲：「Kā活ê gín-á破做两pêng，一pêng hō͘ hitê，一pêng hō͘ chitê。」
3:26 活ê gín-á ê老母为tio̍h kakī ê kiáⁿ，心亲像火teh-to̍h，to̍h对王讲：「我ê主，kā活ê kiáⁿ hō͘ hitê chabó͘人，千万m̄ thang hō͘伊死！」Hitê chabó͘人讲：「Chitê gín-á m̄ thang归你，mā m̄ thang归我。Kā伊破，thang照ánne做！」
3:27 王应讲：「Kā活ê gín-á hō͘ chitê chabó͘人，千万m̄ thang kā伊thâi，因为她实在是伊ê老母。」
3:28 以色列人民听tio̍h王所判断ê案，to̍h lóng敬畏伊，因为in有看tio̍h伊ê心内有上主ê智慧来teh判断。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。