撒母耳记上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
18:1 大卫kah扫罗讲话了后，约拿单ê性命kah大卫ê性命生相连，约拿单疼伊亲像kakī ê性命。
18:2 Hit日，扫罗kā伊留落来，无hō͘伊tńg去in老父ê厝。
18:3 约拿单kah大卫两人结约，因为伊疼大卫亲像kakī ê性命。
18:4 约拿单thǹg伊身躯ê外衫hō͘大卫，koh kā伊ê军服，连伊ê刀，伊ê弓，伊ê腰带，mā lóng hō͘伊。
18:5 见若扫罗差伊去tó位，大卫去做lóng真精通。扫罗to̍h设立伊做战士ê头人，人民kah扫罗ê人臣lóng看做是好。
18:6 扫罗嫉妒大卫
大卫phah死hitê腓利士人了后倒tńg来，in tńg来ê时，hiahê chabó͘人tùi以色列ta̍k个城出来，唱歌，跳舞，用lin-long鼓，用欢喜，用奏乐ê器具，来迎接扫罗王。
18:7 Hiahê chabó͘人跳舞，有ê唱，有ê和，讲：「扫罗kā inthâi死千千，大卫kā inthâi死万万。」
18:8 扫罗不止受气，无欢喜chitê话，to̍h讲：「Kā万万hō͘大卫，千千hō͘我，只有chhun国位bē hō͘伊niā-niā。」
18:9 Tùi hit日起，扫罗看tio̍h大卫to̍h kā伊睨（gîn）。
18:10 隔tńg工，tùi上主hia来ê pháiⁿ神大大临到扫罗，伊to̍hti7厝内讲先知话。大卫照常用手弹琴，扫罗手里有枪。
18:11 扫罗用枪cho̍k去，因为讲，我beh凿大卫，kā伊钉tī壁里。大卫tī伊ê面前闪避两pái。
18:12 扫罗惊大卫，因为上主kah伊同在，离开扫罗。
18:13 扫罗chiah hō͘大卫离开伊，设立伊做营长，伊tī人民ê面前出入。
18:14 大卫见所做ê tāichì lóng真精通，上主kah伊同在。
18:15 扫罗看tio̍h大卫做ê tāichì lóng真精通，不止惊伊。
18:16 总是，以色列kah偤大ê群众lóng疼大卫，因为伊tī in面前出入。
18:17 大卫娶扫罗ê Cha-bó͘ kiáⁿ
扫罗kā大卫讲：「你看，我beh kā大chabó͘ kiáⁿ Bí-la̍h hō͘你做bó͘，总是，ài你做我ê勇士，替上主交战。」扫罗心内想讲：「我m̄ thang亲手害伊，tio̍h借腓利士人ê手害伊。」
18:18 大卫kā扫罗讲：「我是啥人，我有啥物身分，我老父ê家tī以色列中是啥物款ê家，我kám thang做王ê kiáⁿ婿？」
18:19 扫罗ê chabó͘ kiáⁿ Bí-la̍h定tio̍h hō͘大卫ê期到à，竟然去hō͘ Bí-hô-la̍h人A-tek-lia̍t做bó͘。
18:20 扫罗ê chabó͘ kiáⁿ米甲疼大卫，有人kā扫罗讲，扫罗欢喜chitê tāichì。
18:21 扫罗心内想讲：「我kā chitê chabó͘ kiáⁿ hō͘大卫做罗网来kā伊网teh，thang借腓利士人ê手害伊。」扫罗to̍h kā大卫讲：「Taⁿ chitê第二pái你thang做我ê kiáⁿ婿。」
18:22 扫罗吩咐人臣讲：「Lín偷偷á kā大卫讲：『王kah意你，人臣mā疼你，所以，你thang做王ê kiáⁿ婿。』」
18:23 扫罗ê人臣to̍h kā chiahê话讲hō͘大卫听，大卫讲：「Lín kám想讲做王ê kiáⁿ婿是小khóa tāichì？我是sànchhiah卑微ê人。」
18:24 扫罗ê人臣回覆，讲：「大卫讲ê，ánne，ánne。」
18:25 扫罗讲：「Lín tio̍h对大卫ánne讲：『王无ài啥物聘礼，只有ài一百个腓利士人ê阳物ê皮，thang报仇tī王ê对敌。」扫罗ê意思是beh hō͘大卫死tī腓利士人ê手头。
18:26 扫罗ê人臣kā chiahê话kā大卫讲，大卫欢喜beh做王ê kiáⁿ婿。
18:27 日期iáu未到，大卫起来kah tòe伊ê人，出发去，thâi死两百个腓利士人。大卫带hiahê阳物ê皮，in to̍h照数额全部献hō͘王，hō͘伊thang做王ê kiáⁿ婿。就ánne，扫罗kā chabó͘ kiáⁿ米甲hō͘大卫做bó͘。
18:28 扫罗看tio̍h，koh知上主kah大卫同在，而且扫罗ê chabó͘ kiáⁿ米甲mā疼伊。
18:29 扫罗koh khah惊大卫，扫罗tiāⁿ-tiāⁿ 做大卫ê对敌。
18:30 腓利士hiahê首领出来交战，in ta̍k pái出来，大卫做比扫罗hiahê人臣khah精通。就ánne，伊ê名hō͘人koh khah尊重。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。