士师记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
19:1 利未人kah伊ê细姨
当以色列无王ê时，有寄脚tī以法连山地hit-pêng ê一个利未人，娶一个偤大伯利恒ê chabó͘ gín-á做细姨。
19:2 细姨行奸淫来背叛她ê丈夫，离开伊倒tńg去偤大伯利恒，到老父ê家，tòa hia四月日。
19:3 她ê丈夫起来，chhōa一个奴仆kah牵两只驴á去，beh用好话kā她安慰，来chhōa她tńg来。伊入去她ê老父ê厝，chabó͘人ê老父看tio̍h，to̍h kā伊欢迎。
19:4 伊ê丈人，to̍h是chabó͘ gín-á ê老父kā伊留落来，伊to̍hkah丈人tòa三日，in to̍h做伙lim食，tī hia tòa。
19:5 到第四日，in透早起来，伊beh出发去，chabó͘ gín-á ê老父kā kiáⁿ婿讲：「请你食淡薄饼做点心，后来，chiah thang出发行。」
19:6 两人to̍h坐落去，做伙lim食。Cha-bó͘-gín-á ê老父tùi hitê人讲：「请你欢喜koh tòa一暝，hō͘你ê心快乐。」
19:7 Hitê人起来beh出发，伊ê丈人强强kā伊留，伊to̍hkoh再歇一暝。
19:8 到第五日，伊透早起来beh出发，chabó͘ gín-á ê老父kā伊讲：「请你koh食kóa点心，thèng候到日落西山chiah出发。」In两人to̍h koh做伙食。
19:9 Hitê人kah伊ê细姨以及奴仆起来beh起行，伊ê丈人，to̍h是chabó͘ gín-á ê老父，kā伊讲：「你看，日beh暗à，请你koh歇一暝，日头beh落山à，你tio̍h歇chia，hō͘你ê心快乐，明á载透早chiah出发倒tńg去lín tau。」
19:10 Hitê人m̄肯koh歇一暝，to̍h起身出发，来到耶布斯ê对面，耶布斯to̍h是耶路撒冷。两只挂鞍ê驴以及伊ê细姨，kah伊做伙去。
19:11 行近耶布斯ê时，日已经beh落山，奴仆kā主人讲：「来，咱不如 oat入去耶布斯人chitê城，tī hia歇暝。」
19:12 主人讲：「咱无beh oat入去外邦人ê城，to̍h是无属以色列人ê，khah好咱tio̍h过来去基比亚。」
19:13 伊koh kā奴仆讲：「来，咱tio̍h来去chiahê所在中间ê一个，来歇tī基比亚á是拉玛。」
19:14 In就进前去，将近便雅悯ê基比亚ê时，日头已经落山。
19:15 Into̍h oat入去，beh tī基比亚歇暝，to̍h入去坐tī城内ê街路，因为无人接纳in入去厝内歇暝。
19:16 日暗了后，有一个老人tùi田里做工tńg来。伊本是以法连山地ê人，寄脚tī基比亚；总是，hit所在ê人是便雅悯人。
19:17 老人gia̍h头看tio̍h人客tī城内ê街路，to̍h问伊讲：「你tùi tó位来？Beh去tó位？」
19:18 伊应讲：「阮tùi偤大伯利恒来，beh去以法连山地hit-pêng。我本来tī hia，to̍h是过去偤大伯利恒，taⁿ我beh去上主ê殿，tī chia无人接纳我入去伊ê厝。
19:19 其实我有草有粮thang hō͘驴á，mā有饼有酒thang hō͘我本身kah女婢，以及tòe我来ê奴仆ê少年人，lóng无欠kah一项。」
19:20 老人讲：「愿你平安，你所需要ê由我来处理，只是你m̄ thang tī街路里过暝。」
19:21 就ánne，老人chhōa in到伊ê厝，饲伊ê驴á，in to̍h洗脚lim食。
19:22 In ê心tú teh快乐ê时，城内hiahê匪类来围伊ê厝，直直phah门，对厝主老人讲：「你kā hitê入去你ê厝ê人chhōa出来，阮beh kah伊交合。」
19:23 Hitê厝主出来in hia，kā in讲：「亲爱ê兄弟，千万m̄ thang做chitê pháiⁿ tāichì。Chitê人既然入来我ê厝，lín to̍hm̄ thang做chitê见笑ê tāichì。
19:24 我有chabó͘ kiáⁿ iáu是在室女，koh有伊ê细姨，我chhōa in出来，lín thang kā in凌辱，chhut-chāi lín ê意思来款待in，独独对chitê人lín m̄ thang行chitê见笑事。」
19:25 总是，hiahê人m̄听伊ê话，hitê人to̍h kā伊ê细姨 牵出去外面交in，in to̍hkah她交合，kui暝kā她凌辱，到早起天beh光ê时，chiah放她去。
19:26 天phú光ê时，chabó͘人来到伊ê主人所歇hitê厝门口，to̍h倒tī hia，一直到天光。
19:27 天光早起，伊ê主人起来开厝ê门，出去beh出发ê时，看tio̍h hitê chabó͘人，to̍h是伊ê细姨，倒tī厝门口，两支手挂tī户碇里。
19:28 to̍h kā chabó͘人讲：「起来，咱beh出发！」总是，她无应，伊to̍hka7她扶起lí驴ê顶面，出发去伊ê本所在。
19:29 到伊ê厝，to̍h用刀kā伊ê细姨ê身尸kah骨头割做十二块，差人the̍h去全以色列ê全境。
19:30 见若看tio̍h ê人lóng讲：「Tùi以色列人出埃及ê日，一直到今á日，m̄ bat ánne行，mā无看tio̍h。Τaⁿ lín tio̍h想，tio̍h参详，然后chiah讲。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。