申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
32:1 Chiahê天ah，tio̍h àⁿ耳孔，我beh讲话；愿地mā tio̍h听我ê嘴所讲ê。
32:2 我ê教示ē亲像雨降落，我ê话亲像露水teh滴；亲像幼绵绵ê雨落tī幼幼ê草，亲像大雨落tī菜蔬。
32:3 因为我beh宣布上主ê名；lín tio̍h遵咱ê上主做大。
32:4 做石磐ê，他所做ê是完全，他ê路lóng是公平；是真实ê上主，lóng无不义，他是公义，koh正直。
32:5 Chitê乖癖弯曲ê世代kakī 败坏；m̄是他ê kiáⁿ，是in ê弊病。
32:6 愚戆无知ê人民，lín kám ánne报答上主？他kám m̄是你ê老父，买你ê？他有创造你，建立你。
32:7 Tio̍hē记得古早ê日，数念历代ê年；问你ê老父，伊ē kā你指示，问你ê序大，inē kā你讲。
32:8 至koân ・ê分业hō͘列邦，分开世间人ê时，to̍h定tio̍h人民ê界限，照以色列人ê数额。
32:9 上主ê份额是他ê子民；他所得tio̍h ê产业是雅各。
32:10 他tú tio̍h伊tī抛荒ê地，tī野兽哮ê荒废旷野，to̍h kā伊围起来，看顾伊，保护伊亲像目chiu 仁。
32:11 Koh亲像鹰鸟lā它ê巢，tī鹰á ê顶面ia̍t它ê翼，thí开翼股来承它，kā它载tī它ê翼股。
32:12 只有上主chhōa伊，无别个神明kah伊同在。
32:13 to̍h hō͘伊khiā tī地chiūⁿkoân ê所在，得tio̍h食田里ê农产物；koh hō͘伊tùi石磐suh蜜，tùi火石suh油；
32:14 mā食牛奶油kah羊奶，肥ê羊á-kiáⁿ，巴珊所出ê绵羊káng kah山羊，kah siōng好ê小麦，mā lim葡萄汁ê酒。
32:15 耶书仑肥就鸭霸，你已经肥，koh大粒，肉真phauh；伊to̍h离开创造伊ê上主，看轻拯救伊ê石磐。
32:16 In用别个神明激他嫉妒，用可恶ê惹他受气。
32:17 In祭献邪鬼，m̄是真ê上帝，to̍h是in平时所m̄ bat ê神明，是新ê，近来chiah有ê，是你ê祖先所无惊畏ê。
32:18 生你ê石磐，你无数念他，生你ê上主，你bē记得他。
32:19 上主看tio̍h就怨恨，因为他ê kiáⁿ儿激他ê缘故，to̍h讲：
32:20 我beh tùi in掩我ê面，看in结局án怎。In是乖癖ê族类，无信实ê kiáⁿ儿。
32:21 In用hitê m̄是上主ê激我ê嫉妒，用in ê虚假ê物惹我受气。我to̍h用m̄是做人民ê激in ê嫉妒，用愚戆ê人民惹in ê受气。
32:22 因为tī我ê受气中有火to̍h起来，烧到阴间极深ê所在，mā烧地kah地ê出产，mā起火烧chiahê山ê地基。
32:23 我beh积聚灾祸tī in ê顶面，用我所有ê箭来射in。
32:24 Inē因为iau饿来消瘦，hō͘炎热kah毒症吞灭。我ē hō͘ in tú tio̍h野兽ê嘴齿，kah蛇ê毒。
32:25 外面有刀剑，内面有惊惶，hō͘人死亡，hō͘少年ê chapo͘人kah在室女，食奶ê kah白头毛ê人，lóng灭亡。
32:26 我讲：我beh hō͘ in四散tī远远，tī人ê中间除in ê名字。
32:27 总是，我惊对敌激我，恐惊in ê对敌误会，恐惊in ē讲：是阮ê手gia̍h koân，m̄是上主行chiahê tāichì。
32:28 因为in是bē晓得想ê人民，tī心内无聪明。
32:29 愿in有智慧，会明白chitê，会想in ê结局。
32:30 若m̄是in ê石磐卖in，若m̄是上主kā in交hō͘人，怎样对敌一个会赶in一千？两 个ē hō͘ in一万个逃走？
32:31 In ê石磐无亲像咱ê石磐，连咱ê对敌mā ánne评断。
32:32 In ê葡萄树是tùi所多玛ê葡萄树传ê，mā tùi蛾摩拉ê园出ê；in ê葡萄是毒ê葡萄，kui葩lóng是苦ê。
32:33 In ê酒是龙ê毒，是恶蛇残害ê毒。
32:34 这kám m̄是积聚tī我chia，封密tī我宝贝ê库房？
32:35 申冤报应在tī我，tī in ê脚踏颠ê时，因为in tú tio̍h灾祸ê日teh beh到，所beh tú ・tio̍h ê tāichì会真紧到。
32:36 上主看tio̍h他ê子民气力已经死去，hiahê拘束ê，自由ê，lóng无留kah半个，to̍h beh替in申冤，因为他ê奴仆来后悔。
32:37 伊ē讲：In ê神明，in所óa靠ê石磐，
32:38 to̍h是食in祭祀ê油，Lim in灌奠ê酒ê，taⁿ tī tó位？Thang hō͘ in起来帮赞lín，保护lín。
32:39 Lín taⁿ tio̍h看，我，我to̍h是；我以外无有上帝。我hō͘人死，我hō͘人活；我kā伊损伤，我kā伊医治，无一个ē tùi我ê手救出。
32:40 我gia̍h起手ǹg天讲，我kí我ê永远活命来讲：
32:41 我若磨我光nà-nà ê刀，我若执行审判，to̍h beh刑罚我ê对敌，报应怨恨我ê人。
32:42 我beh hō͘我ê箭lim血到醉，我ê刀beh食肉，to̍h是受thâi受掠ê人ê血，对敌首领ê头ê肉。
32:43 列国，lóng tio̍h kah他ê子民做伙欢喜；因为他ē为他ê奴仆ê血申冤，报应伊ê对敌，beh赎伊ê地kah伊ê人民ê罪。
32:44 摩西来，用chitê歌一切ê话念hō͘人民听，嫩ê kiáⁿ约书亚mā kah伊tī ・leh。
32:45 摩西ê遗言
摩西对以色列ê群众讲chiahê话了后，to̍h kā in讲：
32:46 「我今á日所对lín见证一切ê话，lín tio̍h khǹg tī心里，mā tio̍h吩咐lín ê kiáⁿ孙执守来行chitê律法所有ê话。
32:47 因为这对lín来讲 m̄是空空ê tāichì，是lín ê活命，mā ē因为chitê tāichì，lín ê日子得tio̍h久长，tī lín过约旦河beh入去承接ê地。」
32:48 当日，上主吩咐摩西讲：
32:49 「你去亚巴琳山，尼波ê山头，kah耶利哥城对面ê摩押地，看我赏赐以色列人做产业ê迦南地。
32:50 你ē死tī你所去ê山内，亲像你ê阿兄亚伦死tī何珥山。
32:51 因为lín tī寻（Chîn）ê旷野，加低斯ê米利巴ê水边，tī以色列人中得罪我，因为tī以色列人中无尊我做圣。
32:52 你thang对面看hitê地，总是，bē tàng入去到我所赏赐以色列人ê地。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。