申命记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
12:1 唯一崇拜ê场所
「Lín tī世间一生ê日子,tī上主—lín祖先ê上帝所赏赐hō͘ lín做产业ê地,tio̍h执守来行ê律例kah法度,to̍h是chiahê:
12:2 Lín所beh赶走来承接ê列国,见若in服事in hiahê神明ê所在,无论tī高山,tī小山,tī所有青翠ê树脚,lóng tio̍h kā in毁坏。
12:3 Lín mā tio̍h拆毁in ê祭坛,phah碎in雕刻ê柱,用火烧in ê亚舍拉,锉in所雕刻ê神明ê像,mā tio̍h tùi hit所在kā in ê名除灭。
12:4 「Lín m̄ thang亲像ánne来服事上主—lín ê上帝。
12:5 总是,上主—lín ê上帝将来tùi lín众支族中所beh拣选ê所在,thang tī hia安置他ê名,to̍h是他tòa ê所在,lín tio̍h去hia chhōe他,
12:6 kā lín ê烧祭kah别种ê祭,十份取一份ê物,kah手里ê举祭,以及谢愿ê祭,甘心献ê祭,以及牛群、羊群中头水生ê,lóng tio̍h带到hia。
12:7 Τī hia,lín tī上主—lín ê上帝ê面前,为tio̍h lín ê手所做一切ê tāichì,得tio̍h上主—lín ê上帝赐福ê,lín kah lín ê家眷lóng tio̍h lim食欢喜。
12:8 「咱今á日tī chia所做ê tāichì,是ta̍k人照ánne行kakī 看做是tio̍h ê,lín将来m̄ thang ánne行。
12:9 因为lín现今iáu未来到上主—你ê上帝所赏赐hō͘你ê安息kah产业。
12:10 总是,lín过约旦河,得tio̍h tòa tī上主—lín ê上帝赏赐hō͘ lín承接ê地,koh hō͘ lín脱离四箍围所有ê对敌,得tio̍h安息,来安稳tòa落去。
12:11 to̍h tio̍h有一个所在,是上主—lín ê上帝所拣来安置他ê名ê,见若我所命令lín ê,to̍h是lín ê烧祭kah别种ê祭,十份取一份ê物kah手里ê举祭,以及你对上主所下愿极好ê物,lóng tio̍h带到hia。
12:12 Lín kah lín ê kiáⁿ儿、奴仆、女婢,lóng tio̍h欢喜tī上主—lín ê上帝ê面前;利未人tòa tī lín ê门内ê mā是ánne,因为in tī lín中间无份无业。
12:13 你tio̍h kakī 谨慎,m̄ thang tī你看kah意ê所在献lín ê烧祭。
12:14 独独tī你chiahê支族中ê一个,上主所拣选ê所在,lín tī hia tio̍h献你ê烧祭,koh tī hia行我一切所命令你ê。
12:15 「总是,你tī你ta̍k个门内,lóng thang照上主—你ê上帝所赏赐hō͘你ê福份,照你ê心所爱,thâichengseⁿ食肉;无论清气ê人,á是无清气ê人,lóng thang食,ná亲像teh食羚羊kah鹿。
12:16 总是,血m̄ thang食,tio̍h piàⁿ tī地里,亲像teh piàⁿ水。
12:17 你ê五谷、酒、油ê十分之一,á是牛群、羊群中头水生ê,á是你下愿献ê,甘心献ê,á是手里ê举祭,lóng m̄ thang tī你ê门内食。
12:18 独独thang tī上主—你ê上帝ê面前食,to̍h是tī上主—你ê上帝所拣选ê所在,你kah你ê kiáⁿ、你ê chabó͘ kiáⁿ、奴仆、女婢,以及tòa tī你门内ê利未人,lóng tio̍h食;见若你ê手所做ê,tī上主—你ê上帝ê面前,thang欢喜。
12:19 你tio̍h kakī 谨慎,tī你ê所在,一世人m̄ thang放sak利未人。
12:20 「上主—你ê上帝照他所应允你ê,开阔你ê境界ê时,你ê心ài食肉,所以,讲:『我beh食肉』,to̍h thang照你ê心所爱ê来食肉。
12:21 上主—你ê上帝所拣选beh安置他ê名ê所在,若离开你真远,to̍h thang照我所命令你ê,kā上主赏赐hō͘你ê牛、羊取来thâi,thang照心所爱ê,tī你ê门内食。
12:22 你thang亲像食羚羊kah鹿á ánne来食,清气kah无清气ê人平平thang食。
12:23 独独你tio̍h决意,m̄ thang食血,因为血是活命;你m̄ thang食肉,续食它ê活命。
12:24 M̄-thang食血,tio̍h piàⁿ tī地里,亲像teh piàⁿ水。
12:25 M̄-thang食血,ánne,你行上主所看做是tio̍h ê tāichì,你kah你ê kiáⁿ孙to̍h ē得tio̍h福气。
12:26 总是,你所有ê圣物kah你所下愿ê,tio̍h带到上主所拣选ê所在。
12:27 你ê烧祭,肉kah血,tio̍h献tī上主—你ê上帝ê坛顶。你祭物ê血,tio̍h piàⁿ tī上主—你ê上帝ê坛;hitê肉,你thang食。
12:28 你tio̍h执守,听thàn我命令你一切ê话,行上主—你ê上帝所看做好koh tio̍h ê tāichì。Án-ne,你kah你ê kiáⁿ孙to̍h ē tàng永远得tio̍h福气。」
12:29 对拜偶像ê警告
「上主—你ê上帝tùi你ê面前kā你除灭你所beh去承接ê国,你承接了后to̍htoa3 hitê地,
12:30 hit时,你tio̍h kakī 谨慎,m̄ thang tī in tùi lín ê面前除灭了后,soah陷落in ê罗网来tòe in,mā m̄ thang探听in ê神明ê tāichì,讲:『Chiahê国án怎服事in ê神明,我mā beh ánne行。』
12:31 你m̄ thang对上主—你ê上帝ánne行,因为in对in ê神明行上主一切所痛恨讨厌ê tāichì,甚至kā in ê kiáⁿ儿用火烧,献hō͘ in ê神明。
12:32 见若我所命令lín ê,lín lóng tio̍h执守来行,你m̄ thang加添,mā m̄ thang减少。」
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。