民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
8:1 安置七盏灯
上主吩咐摩西讲：
8:2 「你吩咐亚伦kā伊讲：你点灯ê时，七盏灯lóng tio̍h tī灯台前照光。」
8:3 亚伦照ánne行，点灯照光tī灯台前，是照上主命令摩西ê。
8:4 Chitê灯台ê做法，是用金phah-ê，连它ê座kah它ê花lóng是phah-ê。摩西制造灯台，是照上主所指示ê款式。
8:5 利未人ê洁净kah奉献
上主吩咐摩西讲：
8:6 「你tio̍h tùi以色列人ê中间拣出利未人，hō͘ in清气。
8:7 Hō͘ in清气tio̍h ánne行：用除去罪ê水hiù tī in身躯，koh kah in用剃头刀剃全身躯，洗衫裤，清气本身。
8:8 后来，in tio̍h取一只牛káng-á kah伊ê素祭，to̍h是调和油ê幼面粉；你tio̍h另外取一只牛káng-á做赎罪祭。
8:9 你tio̍h chhōa利未人到会幕前，聚集以色列族ê全会众。
8:10 Koh chhōa利未人到上主ê面前，以色列人tio̍h tī利未人ê顶面hōaⁿ手。
8:11 亚伦tio̍h献利未人tī上主ê面前，做以色列人ê摇祭，hō͘ in thang做服事上主ê工。
8:12 利未人tio̍h tī hiahê牛káng-á ê头壳顶hōaⁿ手；你tio̍h献一只做赎罪祭，koh献一只做烧祭hō͘上主，来kā利未人赎罪。
8:13 「你tio̍h hō͘利未人khiā tī亚伦kah伊ê kiáⁿ ê面前，献in做摇祭hō͘上主。
8:14 Án-ne，你tio̍h tùi以色列人分别利未人，利未人to̍h beh归tī我。
8:15 Chit时了后，利未人tio̍h入去做会幕ê工；你tio̍h hō͘ in清气，献in做摇祭，
8:16 因为in是tùi以色列中完全归我ê，我拣选in来属tī我，来替一切头胎ê，to̍h是以色列人ê头chiūⁿ ê。
8:17 因为以色列中一切头chiūⁿ生ê，á是人，á是chengseⁿ，lóng是我ê。我tī埃及地phah死一切头chiūⁿ生ê hit日，已经kā in分别做圣归tī我。
8:18 我拣选利未人，来替以色列人一切头chiūⁿ生ê。
8:19 我tùi以色列人中拣选利未人，赏赐亚伦kah伊ê kiáⁿ孙，thang替以色列人做会幕ê差用，koh为以色列人赎罪；免得以色列人óa近圣所ê时，有灾祸临到以色列人ê中间。
8:20 摩西kah亚伦以及以色列全会众，to̍h对利未人ánne行；见若上主论起利未人所命令摩西ê，以色列人to̍h对in ánne行。
8:21 就ánne，利未人清气kakī ，除去罪，洗in ê衫裤；亚伦kā in献做摇祭tī上主ê面前，亚伦koh为in赎罪来hō͘ in清气。
8:22 然后利未人入去，tī亚伦kah伊ê kiáⁿ ê面前，tī会幕中做in ê工。上主论利未人来命令摩西ê，以色列人to̍hánne对in行。
8:23 上主吩咐摩西讲：
8:24 「论利未人是ánne：tùi二十五岁以上，in tio̍h来会幕做差用。
8:25 到五十岁to̍h停工，无koh做差用；
8:26 总是，tio̍h tī会幕，kah in ê兄弟做伙侍候，守所交带ê，无koh做工；关系所交带利未人ê，你tio̍h对in ánne行。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。