民数记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
4:1 哥辖宗族ê职责
上主吩咐摩西kah亚伦讲：
4:2 「你tio̍h tùi利未人ê中间经过点算哥辖kiáⁿ孙ê总额，照in ê家口kah宗族。
4:3 Tùi三十岁以上到五十岁，见若入来当职tī会幕内做工ê，lóng tio̍h算。
4:4 「哥辖ê kiáⁿ孙tī会幕所做ê工，to̍h是办理至圣ê物，记tī下底：
4:5 营队出发ê时，亚伦kah伊ê kiáⁿ tio̍h入去剥遮闸ê帐帘，the̍h来遮盖法柜。
4:6 Koh用海狗皮盖tī顶面，koh盖纯蓝色ê布，然后chiah穿它ê杠。
4:7 「Koh用蓝色ê布chhu tī排列饼ê桌，kā chiahê 盘、匙、碗kah灌奠ê杯排tī hit顶面，tī hia mā tio̍h有tiāⁿ-tiāⁿ 排设ê饼。
4:8 Tī hit顶面koh tio̍h罩朱红色ê布，koh用海狗皮做kòa来盖，chiah穿它ê杠。
4:9 「In tio̍h the̍h蓝色布来盖照光ê灯台kah伊ê盏，它ê剪，它ê盘，以及所有做它ê路用贮油ê器具。
4:10 Koh tio̍h kā灯台kah伊所有ê器具，包tī海狗皮ê盖内，hē tī柴架顶。
4:11 「Tī金坛顶in tio̍h chhu蓝色ê布，用海狗皮做kòa来盖，chiah穿它ê杠。
4:12 Koh tio̍h the̍h所用来服事ê器具，to̍h是tī圣所用来服事ê，包tī蓝色ê布，用海狗皮做kòa来盖，hē tī柴架顶。
4:13 In tio̍h收坛顶ê火灰，用紫色ê布chhu tī hit顶面。
4:14 Koh tio̍h kā in做工所用一切ê器具排tī顶面，to̍h是火鼎、肉叉、托á、盘，一切属tī坛ê器具，koh用海狗皮做kòa来罩，chiah穿它ê杠。
4:15 营队beh出发ê时，亚伦kah伊ê kiáⁿ kā圣所kah圣所所有ê器具盖了后，然后哥辖ê kiáⁿ孙tio̍h来扛。「总是，m̄ thang摸圣ê物，免得in死；会幕内chiahê物件lóng是哥辖ê kiáⁿ孙所tio̍h扛ê。
4:16 「祭司亚伦ê kiáⁿ以利亚撒所tio̍h顾守ê，是点灯ê油kah芳料，以及tiāⁿ-tiāⁿ 献ê素祭kah抹ê油，mā tio̍h顾守全会幕kah hit中间所有ê，以及圣所kah圣所所有ê器具。」
4:17 上主吩咐摩西kah亚伦讲：
4:18 「Lín m̄ thang kā哥辖人家族ê支族tùi利未人ê中间剪除去。
4:19 In óa近至圣ê物ê时，lín tio̍h kā in ánne设法，hō͘ in ē活，免得死。亚伦kah伊ê kiáⁿ tio̍h入去，派in ta̍k人所tio̍h做kah所tio̍h扛ê。
4:20 总是，in一时á都m̄ thang入去看圣所，免得inē死亡。」
4:21 革顺宗族ê职责
上主吩咐摩西讲：
4:22 「你tio̍h算革顺kiáⁿ孙ê总额，照in ê宗族kah家口，
4:23 tùi三十岁以上到五十岁，见若入来当职tī会幕内做工ê lóng tio̍h算。
4:24 革顺人chiahê家ê工程，所tio̍h办理，所tio̍h扛ê，to̍h是chiahê：
4:25 In tio̍h扛会幕hiahê帐幅，以及会幕kah它ê盖 kah tī hit顶面海狗皮做ê盖，kah会幕ê门帘，
4:26 院ê布帷kah院门ê门帘，(院to̍h是围会幕kah坛ê)，索á kah所用ê器具，无论做啥物路用ê，in lóng tio̍h办理。
4:27 革顺ê kiáⁿ孙tī in一切所扛ê物，所办ê tāichì，lóng tio̍h照亚伦kah伊ê kiáⁿ孙所命令ê来办，in所应该扛ê，lín tio̍h派in顾守。
4:28 这是革顺kiáⁿ孙chiahê家，tī会幕内所做ê工，in所顾守ê，tio̍h tī祭司亚伦ê kiáⁿ以他玛ê手下。」
4:29 米拉利宗族ê职责
「若是米拉利ê kiáⁿ孙，你tio̍h照in ê家口kah宗族，kā in点算。
4:30 Tùi三十岁以上到五十岁，见若入来当职tī会幕内做工ê，lóng tio̍h算。
4:31 In所担当ê责任，照会幕chiahê工程，to̍h是会幕ê板kah它ê门闩，它ê柱，它ê座，
4:32 院四箍围ê柱kah它ê座；所钉ê钉kah索á，以及一切所用ê器具。In担当所扛ê器具，lín tio̍h照名kā in定tio̍h。
4:33 这是米拉利kiáⁿ孙chiahê家ê工，to̍h是in tī会幕内所做ê工，lóng tī祭司亚伦ê kiáⁿ以他玛ê手下。」
4:34 利未支族人数ê统计
摩西kah亚伦以及会众chiahê首领，kā哥辖ê kiáⁿ孙照in ê宗族kah家口，
4:35 tùi三十岁以上到五十岁，见若入来当职tī会幕内做工ê，lóng经过点算。
4:36 照in ê家口经过点算ê，总共有二千七百五十名。
4:37 这是哥辖族chiahê家经过点算ê，是所有tī会幕内做工ê，to̍h是摩西kah亚伦，照上主托摩西所命令点算ê。
4:38 革顺ê kiáⁿ孙经过点算ê，照in ê家口kah宗族，
4:39 tùi三十岁以上到五十岁，见若入来当职tī会幕内做工ê，
4:40 其中经过点算ê，照in ê家口kah宗族，总共有二千六百三十名。
4:41 这是革顺kiáⁿ孙chiahê家经过点算ê，是所有tī会幕内做工ê，to̍h是摩西kah亚伦照上主所命令来点算ê。
4:42 米拉利kiáⁿ孙chiahê家所经过点算ê，照in ê家口，in ê宗族，
4:43 tùi三十岁以上到五十岁，见若入来当职tī会幕内做工ê，
4:44 其中经过点算ê，照in ê家口，总共有三千两百名。
4:45 这是米拉利kiáⁿ孙chiahê家经过点算ê，to̍h是摩西kah亚伦照上主托摩西所命令点算ê。
4:46 见若经过点算ê利未人，to̍h是摩西kah亚伦kah以色列chiahê首领，照in ê家口，in ê宗族，所点算ê，
4:47 tùi三十岁以上到五十岁，见若入来当职tī会幕内做扛物件ê工ê，
4:48 其中经过点算ê，总共有八千五百八十名。
4:49 In hō͘摩西点算，照上主所命令ê，ta̍k人照伊所办ê tāichì，照伊所扛ê物件，in ánne hō͘伊点算，是照上主所命令摩西ê。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。