利未记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
25:1 安息年
(申15：1-11)上主tī西奈山吩咐摩西讲：
25:2 「你tio̍h吩咐以色列人，kā in讲：Lín到我赏赐hō͘ lín hitê地ê时，地to̍h tio̍h kā上主守安息。
25:3 六年tio̍h种作你ê田园，六年tio̍h修整你ê葡萄园，来收地ê出产。
25:4 到第七年，地tio̍h守大ê安息，to̍h是kā上主守ê安息，m̄ thang种作你ê田园，mā m̄ thang修整葡萄园。
25:5 连田里kakī 发ê五谷，mā m̄ thang收割；园里无经过修整ê葡萄树，mā m̄ thang挽葡萄。Chit年是地ê安息年。
25:6 地tī安息年所出ê beh hō͘ lín做食物，它ê出产lóng beh hō͘你kah你ê奴仆，你ê女婢，你ê倩工，以及寄脚tī你hia ê出外人，
25:7 kah你ê chengseⁿ，以及tī你ê地ê走兽做食物。」
25:8 禧年
「你tio̍h为kakī 算安歇年七个，to̍h是七pái ê七年。Chit七pái ê安息年，对你是四十九年。
25:9 Hit年七月初十，你tio̍h四界pûn大声ê哨角；tī赎罪ê日，tio̍h全地pûn哨角。
25:10 Lín tio̍h kā第五十年分别做圣，tī全地kā所有tòa tī hia ê人民宣布自由。Chit年beh做lín ê禧年，lín ta̍k人tio̍h tńg去伊kakī ê产业，ta̍k人tio̍h tńg去伊kakī ê本家。
25:11 第五十年beh做lín ê禧年，m̄ thang种作；地kakī 发ê m̄ thang收割；无修整ê葡萄树mā m̄ thang挽葡萄。
25:12 因为这是禧年，lín tio̍h掠它做圣，lín thang食地里kakī 出ê农产物。
25:13 「Chitê禧年，lín ta̍k人tio̍h tńg去kakī ê产业。
25:14 Lín卖物hō͘厝边，á是tùi厝边买物，lín m̄ thang相khek亏。
25:15 你tio̍h照禧年后ê年限，tùi厝边买，伊mā tio̍h照收成ê年限卖hō͘ lín。
25:16 年限若chē，你tio̍h加添它ê价钱，年限若少，你tio̍h减少它ê价钱，因为伊是照收成ê数额来卖hō͘ lín。
25:17 Lín mā m̄ thang相khek亏，总是，tio̍h敬畏lín ê上帝，因为我是上主—lín ê上帝。」
25:18 安息年ê问题
「所以，lín tio̍h行我ê律例，遵守我ê法度来行，to̍h thang tī hitê地安然tòa落去。
25:19 地mā ē出它ê农产物，lín to̍hē tàng食饱，tī hitê地安然tòa落去。
25:20 Lín若讲：『你看，chitê第七年阮无种作，mā无收成农产物，beh食啥物？』
25:21 我ētī第六年命令我ê福气hō͘ lín，地to̍h ē生出三年ê农产物。
25:22 第八年lín tio̍h种作，mā tio̍h食地ê出产，to̍h是旧ê米粮，thèng候到第九年，hit年ê出产收成ê时，lín iáu koh teh食旧ê米粮。」
25:23 买卖土地ê规定
「地m̄ thang永远卖断，因为地是我ê；lín tī我ê面前是出外人，是寄脚ê。
25:24 Lín所得tio̍h做产业ê土地，tio̍h准人赎回。
25:25 「你ê兄弟若变sànchhiah，卖伊ê产业几nā份，伊ê至亲tio̍h来kā伊赎回你ê兄弟所卖ê。
25:26 若无人thang kā伊赎回，伊本身koh成做好额ê时，有够额thang来赎回，
25:27 伊to̍htioh8算卖出地ê年限，kā所chhun落来ê还hitê买主，本身to̍h thang回复伊ê产业。
25:28 Hitê人若bē tàng为kakī 赎回，所卖ê地就犹原存tī买主ê手，一直到禧年；禧年若到，产业tio̍h交出来，hitê人to̍h thang回复伊ê产业。
25:29 「人若卖城内ê厝，卖了后一年to̍h thang赎回；tī一年内lóng有赎回ê权利。
25:30 若一年满无赎回chitê城内ê厝，to̍h定tio̍h永远归买主到万世代，tī禧年mā m̄免还卖主。
25:31 独独厝tī无城墙ê田庄所在，tio̍h kā它看做kah田相siâng，thang赎回；到禧年，lóng tio̍h还卖主。
25:32 总是，利未人ê城，to̍h是in所得tio̍h做产业ê城hit中间ê厝，利未人thang不管时来赎回。
25:33 若有人tùi利未人赎回厝宅，所卖ê厝tī所得tio̍h做产业ê城，到禧年to̍h tio̍h交出来还卖主，因为利未人城内ê厝，是in tī以色列人中间ê产业。
25:34 总是，in ê城外郊野ê地m̄ thang卖，因为he是in永远ê产业。」
25:35 借钱hō͘ Sàn-chhiah人ê规定
「你ê兄弟变sànchhiah来tòa tī你hia，你tio̍h kā伊补助，hō͘伊kah你做伙tòa，亲像出外人kah寄脚ê。
25:36 M̄-thang the̍h伊ê利息，mā m̄ thang kā伊the̍h khah加；独独tio̍h敬畏你ê上帝，hō͘你ê兄弟kah你tòa。
25:37 你借伊钱m̄ thang kā伊the̍h利息，你借伊米粮mā m̄ thang kā伊the̍h khah加。
25:38 我是上主—lín ê上帝，bat chhōa lín出埃及地，为tio̍h beh赏赐hō͘ lín迦南地，mā beh做lín ê上帝。」
25:39 赎回奴隶ê规定
「你ê兄弟若变sànchhiah去tòa tī你hia，kā本身卖hō͘你，m̄ thang hō͘伊亲像奴仆服事你。
25:40 伊tio̍h tī你hia亲像做工人，kah寄脚ê相siâng，tio̍h服事你直到禧年。
25:41 Hit时，伊ē离开你出去，kah伊ê kiáⁿ儿做伙tńg去伊ê本家，回复伊祖先ê产业。
25:42 因为in是我ê奴仆，是我所chhōa出埃及地ê，m̄ thang kā in卖做奴仆。
25:43 M̄-thang严严kā伊管辖，总是，tio̍h敬畏你ê上帝。
25:44 关系你所beh ài ê奴仆kah女婢，thang tùi四箍围ê国中间买来做奴仆kah女婢。
25:45 Koh hiahê寄脚tī lín中间ê出外人ê kiáⁿ儿，以及in kah lín tòa hiahê家眷，tī lín ê所在所生ê，lín mā thang tùi in中间买人来，in beh做lín ê家业。
25:46 Lín beh取in做产业，留hō͘ kiáⁿ孙做家业，línē永远tùi in中间kā伊征服做奴仆；独独lín ê兄弟以色列人，lín m̄ thang严严相管辖。
25:47 「Tòa tī lín hia ê出外人á是寄脚ê若变好额，你ê兄弟tī in hia变sànchhiah，kā kakī 卖hō͘ lín中间ê出外人á是寄脚ê á是外人ê家族。
25:48 卖了后thang kā伊赎回，伊ê兄弟ê一个thang kā伊赎回。
25:49 叔伯á是叔伯ê kiáⁿ thang kā伊赎回，á是本家ê亲人mā thang kā伊赎回。伊本身若成做好额，mā thang kakī 赎回。
25:50 伊tio̍h kah买主算账，tùi卖kakī hit年起，算到禧年，所卖ê价钱tio̍h照年限ê chē少，tio̍h照做工人ê年限kah伊算。
25:51 若所chhun落来ê年iáu koh chē，to̍h tio̍h照hitê年限兑买伊ê价钱，伊tio̍h还伊赎回ê价钱。
25:52 若到禧年chhun无几年，tio̍h kah伊算，照hitê年限tio̍h还伊赎回ê价钱。
25:53 伊tio̍h kah伊tòa，亲像每年所倩ê做工人，买主m̄ thang严严kā伊管辖。
25:54 若无tī chiahê受赎，到禧年伊kah伊ê kiáⁿ儿lóng thang出去自由。
25:55 因为以色列人是我ê奴仆，是我chhōa出埃及地ê。我是上主—lín ê上帝。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。