哥林多前书 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
1:1 请安kah感谢
我是保罗,奉上帝ê旨意受召,做耶稣基督ê使徒。我kah兄弟Só͘-su-siánneh,
1:2 写phoe hō͘ tī哥林多上帝ê教会,to̍h是hiahê tī基督耶稣内成圣,受召成做信徒,以及tī ta̍k所在teh求叫咱ê主耶稣基督ê名ê人。基督是in ê主,mā是咱ê主。
1:3 愿lín tùi咱ê天父上帝kah主耶稣基督,得tio̍h恩典kah平安。
1:4 Tī基督里ê祝福
我tiāⁿ-tiāⁿ 替lín感谢我ê上帝,因为上帝ê恩典有通过耶稣基督赏赐hō͘ lín。
1:5 通过基督,lín ta̍k项得tio̍h富足,充满ta̍k款ê口才kah智识。
1:6 基督ê信息已经tī lín中间建立坚固ê基础,
1:7 hō͘ lín teh thèng候咱ê主耶稣基督ê显现ê时,lóng无欠啥物恩赐。
1:8 他mā ē hō͘ lín坚固,一直到咱ê主耶稣基督再临ê日子,lóng无thang hō͘人嫌。
1:9 上帝是信实ê,他呼召lín来kah他ê Kiáⁿ,咱ê主耶稣基督结联。
1:10 教会ê纷争
兄弟姊妹,taⁿ我奉咱ê主耶稣基督ê名劝lín,讲话tio̍h一致,m̄ thang有纷争,tio̍h一心一意抱仝款ê目标来团结。
1:11 亲爱ê兄弟姊妹,Khu-ló-eh厝内ê人bat kā我讲,lín中间有纷争。
1:12 我ê意思是讲lín ta̍k人有无仝款ê讲法;有ê讲:「我属保罗」;有ê讲:「我属亚波罗」;有ê讲:「我属彼得」,koh有ê讲:「我属基督。」
1:13 基督kám有hō͘人分开?保罗kám有替lín钉十字架?Lín kám有奉保罗ê名领受洗礼?
1:14 感谢上帝,Ku-lí-su-pò͘ kah该犹以外,我m̄ bat kā lín中间任何人洗礼,
1:15 所以,无人ē tàng讲,lín有奉我ê名领受洗礼。
1:16 Tio̍h lah,我mā有kā Su-tê-hoa-nah一家人洗礼,其他有kā别人洗礼á无,我却bē记得à。
1:17 基督无差派我来kā人洗礼,是beh来传福音。我无用智慧ê言词传,chiah免hō͘基督ê十字架失去意义。
1:18 人ê智慧kah十字架
十字架ê道理,hiahê沉沦ê人kā它看做是愚戆ê;咱chiahê得救ê人,kā它看做是上帝ê大能。
1:19 因为经典有记载:我beh消灭智慧ê人ê智慧, Mā beh弃sak聪明ê人ê聪明。(注:赛29:14)
1:20 Án-ne,智慧ê人tī tó位?经学教师tī tó位?Chit世间好辩论ê人tī tó位?上帝kám m̄是已经hō͘世间ê智慧变做愚戆?
1:21 既然世间人bē tàng用in ê智慧来认bat上帝,上帝to̍h用他kakī ê智慧,欢喜用阮所传ê愚戆ê信息,来拯救hiahê信ê人。
1:22 偤太人求神迹,希腊人chhōe智慧;
1:23 m̄ koh,阮是teh宣扬钉十字架ê基督。Chitê信息对偤太人来讲是阻碍,对外邦人来讲是愚戆;
1:24 m̄ koh,对上帝拣召ê人来讲,无论是偤太人á是希腊人,基督to̍h是上帝ê权能,是上帝ê智慧。
1:25 因为上帝ê愚戆比人khah有智慧,上帝ê软弱比人khah勇壮。
1:26 兄弟姊妹,tio̍h ē记得lín受召ê时,照世间一般ê标准,lín无几个人有智慧,无几个人有能力,无几个人属上流阶级。
1:27 M̄ koh,上帝用世间人看做戆ê,来hō͘智慧ê人见笑,mā用世间人看做软弱ê,来hō͘勇壮ê人见笑;
1:28 他koh用世间人所轻视,所hō͘人看bē起á是无路用ê,来废无人所看重ê。
1:29 Án-ne,世间to̍h无人ē tàng tī上帝ê面前夸口。
1:30 上帝hō͘ lín kah基督耶稣结联,hō͘基督成做咱tùi上帝来ê智慧,koh hō͘咱kah上帝和好,成做上帝圣洁ê子民,又koh hō͘咱得tio̍h救赎。
1:31 所以,照经典所记载:Ài-beh夸口ê人,tio̍h用主来做夸口。(注:耶9:24)
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。