使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 粤语和合本 希腊文(WH-NT) 下载档案 关于语音圣经
10:1 彼得、哥尼流kah外邦人
Tī该撒利亚有一个人,名叫做哥尼流,是意大利营ê连长。
10:2 伊是敬虔ê人,kah全家lóng敬畏上帝,赈济真chē sànchhiah ê偤太人,koh tiāⁿ-tiāⁿ 对上帝祈祷。
10:3 有一日,差不多下晡三点,伊tī异象中明明看tio̍h上帝ê天使入来,对伊讲:「哥尼流。」
10:4 伊掠天使金金看,非常惊惶,讲:「主ah,啥物tāichì?」天使kā伊讲:「你ê祈祷,你ê赈济,已经lóng得tio̍h上帝欢喜接纳。
10:5 Taⁿ你tio̍h差人去约帕,请hitê叫做彼得ê西门来。
10:6 伊tòa tī制皮师傅西门in tau,伊ê厝tī海边。」
10:7 kah伊讲话ê天使离开了后,哥尼流to̍h叫两 个奴仆,kah一个平常侍候伊koh是敬虔ê兵来,
10:8 kā chiahê tāichì lóng kā in吩咐,to̍h差in去约帕。
10:9 隔tńg工,差不多中昼时,chit三个人行beh到约帕ê时,彼得peh起lí厝顶祈祷。
10:10 伊腹肚真iau,想beh食物件;人tútú teh准备中昼顿ê时,彼得soah入神去。
10:11 伊看tio̍h天开,有一个亲像四角头缚teh ê大幅布降落来,坠tī土脚,
10:12 hit内面有地面ta̍k种ê走兽、虫thōa kah空中ê飞鸟。
10:13 Koh有声对伊讲:「彼得,起来,thâi来食。」
10:14 M̄ koh,彼得讲:「主ah,千万m̄ thang,因为我m̄ bat食lahsap无清气ê物。」
10:15 Hitê声第二pái对伊讲:「上帝所hō͘它清气ê,你m̄ thang掠做lahsap。」
10:16 Án-ne ê对话连续三pái,然后hitê四角头吊teh ê大幅布随时koh收tńg去天顶。
10:17 彼得感觉奇怪,心内tú-teh想chitê异象是啥物意思ê时,哥尼流所差来ê人已经chhōe tio̍h西门ê厝,来khiā tī门口,
10:18 大声问讲:「有一个叫做彼得ê西门tòa tī chia á无?」
10:19 彼得iáu teh想chitê异象ê时,圣神kā伊讲:「有三个人来beh chhōe你。
10:20 Taⁿ tio̍h赶紧落去kah in做伙去,m̄ thang踌躇,是我差派in来ê。」
10:21 彼得to̍h落去见hiahê人,讲:「我to̍h是lín teh chhōe ê人,lín来有啥物贵事?」
10:22 In应讲:「连长哥尼流差派阮来。伊是义人koh敬畏上帝,受全部ê偤太人尊敬。伊得tio̍h圣天使指示,来请你到in tau,thang听你ê讲道。」
10:23 彼得to̍h请in入去厝内,留in tòa hia过暝。隔tńg工,彼得kah in去,koh有几nā个约帕ê信徒mā tòe伊去。
10:24 Koh隔tńg工,in来到该撒利亚。哥尼流已经聚集伊ê亲人kah好朋友,teh thèng候in。
10:25 彼得入去ê时,哥尼流kā伊迎接,仆tī伊ê脚前kā伊拜。
10:26 总是,彼得牵伊起来,讲:「起来,我kah你仝款,平平mā是人。」
10:27 彼得kah伊ná行ná讲话,入去厝内,看tio̍h真chē人已经聚集tī hia。
10:28 彼得对in讲:「Lín知偤太人ê律法禁止in kah别族ê人交陪来往,m̄ koh,上帝已经指示我,无论啥人lóng m̄ thang讲人是lahsap无清气。
10:29 所以,lín请我来,我无推辞to̍h来。Taⁿ请问lín chit pái请我来,有啥物贵事?」
10:30 哥尼流讲:「四日前,差不多chitê时下晡三点,我tī厝内teh祈祷,忽然有一个人,衫裤光iàⁿiàⁿ,khiā tī我ê面前,
10:31 讲:『哥尼流,上帝已经听tio̍h你ê祈祷,mā ē记得你ê赈济。
10:32 Taⁿ你tio̍h差人去约帕,请hitê叫做彼得ê西门来。伊tòa tī制皮师傅西门in tau,伊ê厝tī海边。』
10:33 我to̍h随时差人到你hia,taⁿ你来实在真好。Chit-má阮lóng tī上帝ê面前,ài beh听主命令你beh kā阮讲ê话。」
10:34 彼得tī哥尼流ê厝传道
彼得开嘴,讲:「Taⁿ我确实知,上帝无用外貌取人。
10:35 无论tó一个民族,敬畏上帝来行义ê人,他lóng欢喜接纳。
10:36 Lín知:上帝有通过万民ê主耶稣基督,来对以色列人传和平ê福音。
10:37 Lín mā知:约翰传洗礼ê道理以后,chitê福音有tùi加利利省开始,传到偤太全地。
10:38 Chitê福音to̍h是拿撒勒人耶稣,上帝有kā圣神kah才能赏赐hō͘他,他to̍h去ta̍k所在做好事,医好所有hō͘魔鬼压制ê人,因为上帝kah他同在。
10:39 阮是他tī偤太人ê所在kah耶路撒冷所做ê tāichì ê见证人。In kā他钉死tī十字架,
10:40 到第三日,上帝hō͘他koh活,koh hō͘他显现;
10:41 m̄是对所有ê人显现,kantaⁿ对阮chiahê hō͘上帝拣选来做见证ê人显现。阮chiahê人tī他tùi死人中koh活了后,kah他做伙lim食。
10:42 耶稣命令阮传福音hō͘所有ê人,证实他是上帝所任命来做活人kah死人ê审判官。
10:43 众先知mā为他做见证,to̍h是所有信他ê人lóng ē tàng óa靠他ê名得tio̍h赦罪。」
10:44 外邦人领受圣神
彼得iáu teh讲话ê时,圣神降临tī所有听道理ê人中间。
10:45 kah彼得做伙来ê hiahê受割礼ê信徒大tio̍h惊,因为圣神ê赏赐mā有降临tī外邦人。
10:46 因为in有听tio̍h hiahê人用卷舌话teh oló上帝ê伟大。
10:47 彼得to̍h应讲:「Hiahê人已经kah咱仝款有领受圣神,啥人ē tàng禁止in领受水ê洗礼?」
10:48 彼得to̍h命令in奉耶稣基督ê名领受洗礼。后来,in请彼得kah in koh tòa几nā日。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。