约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
21:1 耶稣对七个门徒显现
Chiahê tāichì以后，耶稣tī Tî-bé-lī-a ê海边，koh显现kakī hō͘门徒看；他ê出现记tī下底：
21:2 有西门彼得、叫做「双生á」ê多马、加利利省ê迦拿人拿但业、西庇太ê两 个kiáⁿ，iáu有门徒两 个lóng做伙tī hia。
21:3 西门彼得kā in讲：「我beh去掠鱼。」In kā伊讲：「阮mā beh kah你去。Into̍h出去，上船；hit暝lóng掠无鱼。
21:4 天phú光，耶稣khiā tī岸顶，m̄ koh，门徒认bē出他是耶稣。
21:5 耶稣kā in讲：「少年人，lín掠有鱼无？」In讲：「无半尾。」
21:6 耶稣kā in讲：「Kā网抛落去船ê正pêng，to̍h ē抛tio̍h鱼。」In抛网落去，因为抛tio̍h真chē鱼，鱼网soah拖bē起来。
21:7 耶稣所疼hitê门徒kā彼得讲：「他是主。」西门彼得一下听tio̍h是主，因为thǹgpaktheh，就赶紧moa外衫，跳落去水里。
21:8 其他ê门徒，因为离岸无远，差不多三十丈，to̍h用细只船á来kā鱼á满满ê网拖上岸。
21:9 In一下上岸，看tio̍h有teh to̍h ê火炭火，顶面有鱼，koh有饼。
21:10 耶稣kā in讲：「Tú-chiah抛tio̍h ê鱼，掠几尾á来。」
21:11 西门彼得就peh起lí船顶，kā网拖上岸，kui网大尾鱼满满，总共一百五十三尾；鱼虽然hiah chē，网mā无破裂。
21:12 耶稣kā in讲：「来食早顿。」门徒无人敢kā他问：「祢是啥人？」因为in知他是主。
21:13 耶稣行óa来，the̍h饼分hō͘ in，鱼mā是ánne分hō͘ in。
21:14 耶稣tùi死人中koh活了后，出现hō͘他ê门徒看tio̍h，这是第三pái。
21:15 耶稣kah彼得
In食早顿了后，耶稣kā西门彼得讲：「约翰ê kiáⁿ西门，你比疼chiahê有khah疼我无？」彼得应讲：「主ah，有，祢知我有疼祢。」耶稣kā伊讲：「你tio̍h养饲我ê羊á-kiáⁿ。」
21:16 耶稣第二pái问伊讲：「约翰（注：太16：17 记做约拿）ê kiáⁿ西门，你有比chiahê khah疼我无？」彼得应讲：「主ah，有，祢知我有疼祢。」耶稣kā伊讲：「你tio̍h照顾我hiahê羊。」
21:17 耶稣第三pái kā伊问：「约翰ê kiáⁿ西门，你有比chiahê khah疼我无？」彼得因为耶稣第三pái ánne问，to̍h真忧闷，kā耶稣讲：「主ah，祢ta̍k项lóng知，祢知我有疼祢。」耶稣kā伊讲：「你tio̍h养饲我hiahê羊。
21:18 我实在kā你讲，你少年ê时kakī 缚裤带，随便去你ài去ê所在；独独到年老ê时，你tio̍h伸手hō͘人kā你缚，kā你拖到你无ài去ê所在。」
21:19 耶稣讲chiahê话，是teh指彼得ē án怎死来荣光上帝。Án-ne讲soah，耶稣kā伊讲：「来tòe我。」
21:20 耶稣kah他所疼ê门徒
彼得oa̍t-tńg身，看tio̍h耶稣所疼ê门徒tòe tī in ê后壁。伊to̍h是前tī晚餐ê时，靠óa耶稣ê胸坎讲：「主ah，是啥人beh出卖祢？」ê hitê门徒。
21:21 彼得看tio̍h，to̍h问耶稣讲：「主ah，chitê人ēán怎？」
21:22 耶稣kā伊讲：「我若ài伊活到我koh来，kah你有啥物关系？你tio̍h来tòe我。」
21:23 Chit句话就ánne tī门徒ê中间流传，讲：「Chitê门徒bē死。」其实耶稣m̄是讲伊bē死，是teh讲：「我若ài伊活到我koh来，kah你有啥物关系？」
21:24 Chitê门徒to̍h是为tio̍h chiahê tāichì做见证，koh kā chiahê tāichì写落来ê人，咱知伊ê见证是真实。
21:25 耶稣koh有做真chē项tāichì，若beh kā chiahê tāichì一项一项写落来，我想全世间mā无所在thang贮hiahê记录ê册。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。