约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权) 客语 现代客语 福州话 粤语和合本 希腊文(WH-NT) 下载档案 关于语音圣经
13:1 耶稣kā门徒洗脚
Pôaⁿ过节前,耶稣知他离开chit世间tńg去天父hia ê时已经到。他有一直teh疼世间属他ê人,taⁿ他beh表示他疼in到底。
13:2 耶稣kah使徒食暗顿ê时,魔鬼kā出卖耶稣ê意思hē tī加略人西门ê kiáⁿ偤大ê心。
13:3 耶稣知天父已经kā 一切交tī他ê手,koh知他tùi上帝hia来,mā beh tńg去上帝hia。
13:4 他to̍h离开桌,thǹg外衫,the̍h一条巾á縖tī腰里,
13:5 然后倒水tī盆里,kā门徒洗脚,koh用縖tī腰里ê巾á kā in chhit。
13:6 洗到西门彼得ê时,彼得kā他讲:「主ah,祢beh kā我洗脚,是无?」
13:7 耶稣应讲:「我所做ê,你chitmá m̄知,后来,to̍h ē明白。」
13:8 彼得讲:「祢千万m̄ thang kā我洗脚。」耶稣应讲:「我若无kā你洗脚,你kah我to̍h无关系。」
13:9 西门彼得讲:「主ah,m̄ nā脚,连手kah头壳mā kā我洗。」
13:10 耶稣讲:「人洗身躯了后,kui身躯lóng清气,kantaⁿ洗脚to̍h好。Lín已经清气,m̄ koh,无ta̍k个 lóng ánne。」
13:11 因为耶稣知影啥人beh kā他出卖,所以chiah讲:「Lín无ta̍k个清气。」
13:12 耶稣kā in洗脚了后,穿外衫,koh tńg来坐桌,问in讲:「我对lín所做chiahê tāichì,lín kám有明白?
13:13 Lín称呼我『老师』,mā称呼我『主』,lín ánne称呼无m̄ tio̍h,因为我to̍h是。
13:14 我做『主』,做『老师』,都teh kā lín洗脚,lín mā tio̍h互相洗脚。
13:15 我有留好模样hō͘ lín,是beh hō͘ lín thang照我对lín所做ê去做。
13:16 我实在kā lín讲,奴仆bē比主人khah大,奉差派ê mā bē比差派他ê hit位khah大。
13:17 Lín既然明白chiahê tāichì,若照ánne去做,to̍h真有福气。
13:18 「我m̄是讲lín大家lóng ánne;我知我所拣选ê。独独这是beh应验经典所讲:kah我做伙食饭ê人ē悖逆我。(注:诗41:9)
13:19 Taⁿ tāichì iáu未发生,我先kā lín讲,到tāichì发生ê时,thang hō͘ lín相信我to̍h是hit位。
13:20 我实在kā lín讲,接纳我所差派ê人,to̍h是接纳我;接纳我,to̍h是接纳差派我来ê hit位。」
13:21 耶稣预言受出卖
(太26:20-25;可14:17-21;路22:21-23)
耶稣讲chiahê话了后,心内真艰苦,就明讲:「我实在kā lín讲,lín中间有一个人ē出卖我。」
13:22 使徒互相看来看去,m̄知耶稣是teh讲啥人。
13:23 使徒中间有一个是耶稣所疼ê,伊坐tī耶稣ê身边。
13:24 西门彼得ǹg hitê使徒tìm头,讲:「请你问耶稣,看他是teh讲啥人。」
13:25 Hitê使徒就靠óa耶稣ê胸坎,问讲:「主ah,是啥人?」
13:26 耶稣应讲:「我beh ùn饼the̍h hō͘伊,hitê人to̍h是。」他就ùn一块饼,the̍h hō͘加略人西门ê kiáⁿ偤大。
13:27 偤大一下接tio̍h hit块饼,撒旦to̍h入去伊ê心。耶稣to̍h kā偤大讲:「你想beh做ê,赶紧去做。」
13:28 同坐桌ê人无一个知影耶稣ná ē对伊讲chit句话。
13:29 因为偤大是teh管钱项,所以,有人想讲做是耶稣teh叫伊去买守节所需要ê物件,á是叫伊去赈济sànchhiah人。
13:30 偤大接tio̍h hit块饼,随时出去。Hit时,是暗时。
13:31 新ê诫命
偤大出去了后,耶稣讲:「Taⁿ人子得tio̍h荣光,上帝mā通过人子得tio̍h荣光。
13:32 既然上帝通过人子得tio̍h荣光,上帝kakī mā beh荣光人子,koh是beh随时hō͘他得tio̍h荣光。
13:33 细kiáⁿ,我kah lín做伙chhun无gōa久à,lín会beh chhōe我。照我bat kā偤太人讲ê,taⁿ我kā lín讲,『我beh去ê所在,lín bē tàng去。』
13:34 我hō͘ lín一条新ê诫命:Lín tio̍h相疼,亲像我bat疼lín。Lín mā tio̍h照ánne相疼。
13:35 Lín若相疼,众人ē就ánne来知lín是我ê门徒。」
13:36 耶稣预言彼得M̄认他
(太26:31-35;可14:27-31;路22:31-34)
西门彼得问耶稣讲:「主ah,祢beh去tó位?」耶稣应讲:「我beh去ê所在,你chitmá bē tàng tòe我去,后来,你ētòe我去。」
13:37 彼得讲:「主ah,我chitmá ná ē bē tàng tòe祢去?我甘愿为tio̍h祢来放sak性命。」
13:38 耶稣应讲:「祢beh为tio̍h我来放sak性命,是无?我实在kā你讲,鸡iáu未啼以前,你ē三pái m̄认我。」
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。