路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
19:1 耶稣kah抽税ê撒该
耶稣入去耶利哥城，tī街路teh行ê时，
19:2 tī hia有一个人名叫做撒该，是抽税ê头人，mā是好额人。
19:3 伊ài beh看耶稣是啥人，m̄ koh，人真chē，伊ê身材koh矮，soah看bē tio̍h。
19:4 所以，伊to̍h走做前，peh起lí一欉桑材树，beh看耶稣tùi hia经过。
19:5 耶稣行到hit所在，gia̍h头起来看，kā伊讲：「撒该，赶紧落来，今á日我一定tio̍h tòa你ê厝。」
19:6 撒该就赶紧落来，欢欢喜喜去迎接耶稣。
19:7 众人看tio̍h就nga̍uh-nga̍uh念，讲：「Chitê人soah入去罪人ê厝tòa！」
19:8 撒该khiā ・leh，对主讲：「主ah，我beh kā我所有财产ê一半，the̍h来赈济sànchhiah人；我若bat pián啥人ê钱，我beh四倍赔伊。」
19:9 耶稣对伊讲：「今á日救恩来到chitê家，因为伊mā是亚伯拉罕ê kiáⁿ孙。
19:10 因为人子是beh来chhōe失迷ê人，来kā伊救。」
19:11 十两银á ê譬喻
(太25：14-30)
In听tio̍h chiahê话ê时，耶稣koh kā in讲一个譬喻，这是因为他teh beh到耶路撒冷à，hiahê人mā想讲上帝国度liâmpiⁿ to̍hē出现。
19:12 所以，耶稣kā in讲：「有一个贵族beh去真远ê所在，受封做王了后chiah ē倒tńg来。
19:13 伊叫十个奴仆来，hō͘ in每人一两银á，对in讲：『到我tńg来以前，用chiahê银á去做senglí。』
19:14 总是，hitê贵族本国ê人民怨恨伊，to̍h差一个使者tòe后去奏，讲：『阮无ài chitê人做阮ê王。』
19:15 「Chitê贵族受封做王tńg来，叫hiahê tùi伊领银á ê奴仆来，ài beh知in做senglí thàn gōa chē钱。
19:16 头一个来伊ê面前，讲：『主人，我用你hō͘我hiahê银á thàn十两à。』
19:17 主人kā伊讲：『真好，好ê奴仆，你既然tī小khóa ê tāichì尽忠，taⁿ hō͘你管十个城。』
19:18 第二个来，讲：『主人，我用你hitê银á thàn五两à。』
19:19 主人mā ánne kā伊讲：『Hō͘你mā管理五个城。』
19:20 Koh一个奴仆来，讲：『主人，你看，你ê一两银á tī chia，我用手巾á kā伊包起来khǹg ・leh。
19:21 我惊你，因为你是刻薄ê人，无寄mā beh领，无掖种mā beh收割。』
19:22 主人kā伊讲：『你chitê pháiⁿ ê奴仆，我beh照你所讲ê kā你定罪。你既然知我是刻薄ê人，无寄mā beh领，无掖种mā beh收割，
19:23 你ná ē无kā我ê银á去lok tī钱店，到我tńg来ê时thang领母金kah利息？』
19:24 主人kā khiā tī边á ê人讲：『Kā伊ê一两银á the̍h来，交hō͘ hitê有十两ê。』
19:25 In对主人讲：『主人，伊已经有十两à。』
19:26 主人应讲：『我kā lín讲，已经有ê人，我beh hō͘伊koh khah chē；无ê人，连伊所有ê mā beh kā伊the̍h来。
19:27 M̄ koh，hiahê无ài我做in ê王ê对敌，tio̍h kā in拖来，tī我ê面前kā inthâi死。』」
19:28 耶稣光荣进入耶路撒冷
(太21：1-11；可11：1-11；约12：12-19)
耶稣讲chiahê话了后，继续做前行，上耶路撒冷。
19:29 Teh beh到叫橄榄山山脚ê Pek-hoat-kî kah伯大尼ê时，耶稣差两 个门徒，
19:30 kā in吩咐讲：「Lín去对面ê庄头，入去ê时会tú tio̍h一只iáu未有人骑过ê驴á缚tī hia，lín kā它tháu开牵来chia。
19:31 若有人问讲：『Lín tháu驴á beh chhòng啥？Lín tio̍h讲：『主teh需要。』」
19:32 Hit两 个门徒to̍h去，所tú ・tio̍h ê tāichì果然kah耶稣所讲ê完全仝款。
19:33 In teh tháu驴á ê时，主人问in讲：「你tháu驴á beh chhòng啥？」
19:34 In应讲：「主teh需要。」
19:35 In就牵hit只驴á来hō͘耶稣，kā in kakī ê外衫phoa̍h tòa驴á顶，扶耶稣起lí骑。
19:36 耶稣骑驴á向前行ê时，众人kā kakī ê外衫铺tī路里。
19:37 耶稣tú beh落橄榄山ê时，kui大阵ê门徒看tio̍h一切奇妙ê tāichìto̍h大欢喜，大声oló上帝，讲：
19:38 奉主ê名来ê王应该得tio̍h oló，愿天顶和平，归荣光hō͘至koân上帝。
19:39 众人中间有几nā个法利赛派ê人对耶稣讲：「老师ah，tio̍h责备祢ê门徒。」
19:40 耶稣应讲：「我kā lín讲，in若恬恬，hiahê石头mā ē大声hoah。」
19:41 耶稣teh beh到耶路撒冷ê时，看tio̍h城to̍h为tio̍h chitê城啼哭，
19:42 讲：「我实在真ài你tī chit日to̍h知关系平安ê tāichì；总是，现此时你ê目chiu 看bē出。
19:43 因为时日teh beh到，你ê对敌ē tī你ê四箍围起土墙来kā你封锁起来。
19:44 In koh ēhō͘你kah你城内ê人民lóng毁灭，无留kah两块石相叠，因为你m̄知上帝来beh拯救你ê好机会。」
19:45 耶稣清气圣殿
(太21：12-17；可11：15-19；约2：13-22)
耶稣入去圣殿ê时，就赶出hiahê卖物件ê人。
19:46 他kā in讲：「有记载：我ê厝beh做祈祷ê厝，m̄ koh，lín hō͘它变做贼巢。」(注：赛56：7；耶7：11)
19:47 耶稣ta̍k日tī圣殿教示人，hiahê祭司长、经学教师以及人民ê头人计谋beh杀害耶稣，
19:48 总是，lóng chhōe无步，因为人民lóng真致意teh听耶稣ê话。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。