路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
8:1 服事耶稣ê妇人人
过无几日，耶稣tī ta̍k个城市kah ta̍k个庄头四界行透透，来宣扬上帝国度ê福音。十二个门徒lóng kah他做阵。
8:2 一kóa bat hō͘邪神附身á是破病hō͘耶稣医好ê妇人人mā kah in做伙，其中有抹大拉ê马利亚。耶稣bat tùi chitê马利亚身上赶出七个鬼。
8:3 Koh有希律ê管家Khó͘-sat ê bó͘ Iô-a-ná kah So͘-sat-ná，以及其他真chē妇人人，in lóng用kakī ê钱财来服事耶稣kah他ê门徒。
8:4 掖种籽ê譬喻
(太13：1-9；可4：1-9)
有群众继续tùi ta̍k个城市聚集óa来chhōe耶稣。
8:5 耶稣用譬喻kā in讲：「有一个作穑人出去掖种籽，teh掖ê时，有ê ka-la̍uh tī路边，hō͘过路人踏，空中ê飞鸟kā in全部食了了。
8:6 有ê ka-la̍uh tī石磐顶，因为无水分，芽发起来就干去。
8:7 有ê ka-la̍uh tī刺á内，刺á平平大欉起来，soah hō͘ 刺á hip死。
8:8 有ê ka-la̍uh tī好ê土地，成长起来，结实到一百倍。」Chiahê话讲了，耶稣koh大声hoah：「有耳孔thang听ê人，tio̍h听！」
8:9 譬喻ê目的
(太13:10-17；可4：10-12)
耶稣ê门徒问他chitê譬喻是啥意思。
8:10 耶稣讲：「上帝国度ê奥秘已经hō͘ lín知，m̄ koh，对一般人tio̍h用譬喻，因为有记载：In看mā看bē清楚，听mā听bē明白。」(注：赛6：9)
8:11 解说掖种籽ê譬喻
(太13：18-23；可4：13-20)
「Chitê譬喻ê意思是ánne：种籽to̍h是上帝ê道理。
8:12 Ka-la̍uh tī路边ê，是teh譬喻人听tio̍h道理，魔鬼to̍h来tùi in ê心内kā道理抢去，hō͘ in bē tàng信道理来得tio̍h救。
8:13 Ka-la̍uh tī石磐顶ê，是teh譬喻人听tio̍h道理随时欢喜来接受，m̄ koh，in钉根无深，是暂时信niā-niā，tú tio̍h试探to̍h放sak。
8:14 Ka-la̍uh tī刺á内ê，是teh譬喻人听tio̍h道理，to̍h去hō͘世间ê操烦、钱财kah宴乐阻碍，道理soah bē成长结实。
8:15 Ka-la̍uh tī好土地ê，是teh譬喻人用好koh善良ê心来听道理koh执守，耐心坚持到结实。」
8:16 米斗下ê灯
(可4：21-25)
「无人点灯用米斗kā它盖起来，á是hē tī眠床脚。Tio̍h kā它chhāi tiàm灯台顶，hō͘入来ê人看tio̍h hitê光。
8:17 因为所有隐密ê tāichì将来lóng ē露现；所有秘密ê tāichì到时lóng ē暴露出来hō͘人知。
8:18 所以，lín tio̍h谨慎tio̍h án怎来听；因为见若有ê人beh hō͘伊koh khah chē；无ê人连伊kakī 掠做有ê，mā beh kā伊抢去。」
8:19 耶稣ê老母kah兄弟
(太12：46-50；可3：31-35)
耶稣ê老母kah兄弟来chhōe他，因为人真chē，bē tàng óa去。
8:20 有人kā他讲：「祢ê老母kah兄弟khiā tī外面，ài beh见祢。」
8:21 耶稣应讲：「Chiahê听上帝ê道理koh有照ánne去做ê人to̍h是我ê老母，我ê兄弟。」
8:22 耶稣平静风涌
(太8：23-27；可4：35-41)
有一日，耶稣kah门徒上船ê时kā in讲：「咱来去湖ê hit-pêng岸。」Into̍h开船。
8:23 船teh行ê时，耶稣困去。忽然一chūn强风扫落来湖里，船内入水kiōng-beh tīⁿ起来，非常危险。
8:24 门徒óa去叫醒耶稣，讲：「老师ah，老师ah，咱teh beh无命lò͘！」耶稣醒起来，责备风kah大涌，风涌就静落来。
8:25 耶稣to̍h对门徒讲：「Lín ná ē hiah无信心？」In就惊惶koh感觉奇怪，互相议论讲：「Chitê到底是啥人？连风kah涌lóng顺服他ê命令！」
8:26 耶稣医好邪神附身ê人
(太8：28-34；可5：1-20)
耶稣kah门徒坐船过去加利利湖ê对面岸，来到Gê-la̍h-sam人ê所在。
8:27 耶稣落船上岸ê时，有一个hō͘邪神附身ê人tùi城里出来tú tio̍h他。Chitê人已经真久无穿衫，无tòa tī厝内，lóng tiàm tī墓á埔。
8:28 Hitê人一下看见耶稣to̍h仆tī他ê面前大声hoah：「至koân上帝ê Kiáⁿ耶稣，我kah祢有啥物牵连？求祢m̄ thang hō͘我受苦毒。」
8:29 因为耶稣有命令邪神tùi hitê人出来。以前邪神tiāⁿ-tiāⁿ kā伊掠tiâu-tiâu，人用铁链á kā伊链teh，用脚镣手铐kā伊铐teh，koh kā伊关起来；m̄ koh，伊kā缚伊ê器具chhoah断，邪神koh hō͘伊chông出去旷野。
8:30 耶稣问hitê人讲：「你叫啥物名？」伊应讲：「军团。」因为有真chē邪神kā伊附身。
8:31 邪神哀求耶稣m̄ thang命令in入去无底深坑。
8:32 Hit时，有kui大阵ê猪tī山里teh讨食。邪神求耶稣准in入去hiahê猪ê内面。耶稣有照in所求ê允准in。
8:33 邪神to̍h对hitê人出去，入去hiahê猪ê内面。Kui阵ê猪to̍h tùi山坪chông落去湖里，hō͘水淹死。
8:34 Hiahê顾猪ê人看tio̍h chitê tāichì，to̍h走去报hō͘城内kah庄头ê人知。
8:35 听tio̍h ê人lóng出来ài beh看chitê tāichì。In来到耶稣hia，邪神已经tùi hitê人出来。In看tio̍h伊有穿衫，精神正常，坐tī耶稣ê脚前，in to̍h大tio̍h惊。
8:36 亲目看tio̍h ê人kā hō͘邪神附身ê人án怎得tio̍h医好ê tāichì，报hō͘众人知。
8:37 Gê-la̍h-sam四箍围ê人lóng求耶稣离开in，因为in真惊惶。耶稣to̍h坐船tńg去。
8:38 脱离邪神ê hitê人求beh tòe耶稣去，m̄ koh，耶稣叫伊tńg去，讲：
8:39 「Tńg去lín tau，kā上帝为你所做hiah大ê tāichì报hō͘众人知。」Hitê人to̍h tńg去，kā耶稣为伊所做ê tāichì报hō͘全城ê人知。
8:40 耶稣医好两 个妇人人
(太9：18-26；可5：21-43)
耶稣tńg来ê时，众人lóng kā他迎接，因为大家lóng teh thèng候他。
8:41 有一个会堂ê主管，名叫做崖鲁，来仆tī耶稣ê脚前，恳求他去伊ê厝。
8:42 因为伊十二岁ê独生chabó͘ kiáⁿ teh beh死à。耶稣to̍h kah伊去，群众mā挨挨kheh-kheh做伙去。
8:43 Hit时，有一个妇人人，带血漏病已经十二年à，虽然家伙开了了chhōe医生医治，无kah一个人ē tàng kā她医好。
8:44 Chitê妇人人行óa来耶稣ê 尻脊后，摸他衫á裾ê须，她ê血漏随时止。
8:45 耶稣问讲：「啥人kā我摸？」大家lóng讲无。彼得to̍h讲：「老师，群众逼óa来kā祢kheh tio̍h lah。」
8:46 耶稣讲：「的确有人摸tio̍h我，因为我知有权能tùi我身躯出去。」
8:47 妇人人知影掩盖bē tiâu，就phi̍h-phi̍h chhoah来仆tī耶稣ê脚前。她tī群众ê面前讲明摸耶稣ê原因，kah伊ê病án怎随时好去。
8:48 耶稣kā她讲：「妇人人，你ê信心hō͘你ê病好去。做你安心tńg去。」
8:49 耶稣iáu teh讲ê时，有人tùi会堂主管ê厝来kā崖鲁讲：「你ê chabó͘ kiáⁿ已经死去à，何必koh劳烦老师？」
8:50 耶稣听tioh8to̍h应讲：「M̄免惊，只有信，她to̍h会好起来。」
8:51 耶稣去到in厝ê时，除了彼得、约翰、雅各，kah chabó͘ gín-á ê父母以外，m̄准别人kah他入去。
8:52 众人lóng为tio̍h死去ê chabó͘ gín-á teh啼哭悲伤。耶稣讲：「M̄-thang啼哭，因为她m̄是死，是teh困niā-niā。」
8:53 因为大家lóng知chabó͘ gín-á已经死去à，就耻笑耶稣。
8:54 耶稣牵chabó͘ gín-á ê手大声hoah：「Cha-bó͘ gín-á，起来！」
8:55 Cha-bó͘ gín-á就回魂，随时peh起来。耶稣吩咐tio̍h hō͘ chabó͘ gín-á食物件。
8:56 她ê父母tio̍h惊kah gāng去。耶稣命令in m̄ thang kā所发生ê tāichì kā人讲。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。