马可福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
9:1 耶稣koh kā in讲：「我实在kā lín讲，khiā tī chia ê，有人iáu未死以前，会看tio̍h上帝国度充满大权能临到。」
9:2 耶稣改变形像
(太17：1-13；路9：28-36)
过六日后，耶稣kantaⁿ chhōa彼得、雅各kah约翰peh上一座高山。耶稣tī in ê面前改变形像。
9:3 他ê衫白siaksiak koh灿烂，世间ê漂布师傅mā bē tàng漂kah hiahni̍h白。
9:4 In看见以利亚kah摩西出现，kah耶稣teh讲话。
9:5 彼得对耶稣讲：「老师，咱tī chia真好，阮来搭三间寮á，一间hō͘祢，一间hō͘摩西，一间hō͘以利亚。」
9:6 彼得ē ánne讲是因为伊真tio̍h惊，soah m̄知tio̍h án怎讲chiah好。
9:7 Hit时，有一片云kā in罩teh，koh tùi云里出声讲：「Chitê是我所疼ê Kiáⁿ，lín tio̍h听他ê话。」
9:8 In随时看四箍围，无看tio̍h半人，只有耶稣kah in tī hia。
9:9 In落山ê时，耶稣命令in讲：「人子iáu未tùi死人中koh活chìn前，m̄ thang kā lín所看tio̍h ê tāichì kā人讲。」
9:10 门徒kā耶稣ê话记tiâu tī心内，互相议论「tùi死人中koh活」chit句话是啥物意思。
9:11 门徒koh问耶稣讲：「是án怎经学教师ē讲：以利亚tio̍h tāi先来到？」
9:12 耶稣应讲：「以利亚果然会tāi先来kā一切重新整顿；kám是有ánne记载讲：人子tio̍h受真chē苦难koh hō͘人看轻？
9:13 M̄ koh，我kā lín讲，tútú照经典所记载，以利亚已经来ā，而且人照kakī ê意思kā伊款待。」
9:14 耶稣Tháu放邪神附身ê Gín-á
(太17：14-20；路9：37-43a)
耶稣kah彼得、雅各、约翰来到其他ê门徒hia，看tio̍h kui大阵人kā in围teh，mā有经学教师kah in teh辩论。
9:15 群众看tio̍h耶稣，真tio̍h惊，soah gāng去，随时走óa来kā他请安。
9:16 耶稣问in讲：「Lín kah in teh辩论啥物？」
9:17 众人中间有一个人应讲：「老师，我chhōa我ê kiáⁿ到祢chia，伊hō͘鬼附身soah变哑口。
9:18 无论tī啥物所在，鬼若附身to̍h kā伊siak倒，伊to̍h流澜，咬嘴齿根koh kui身躯硬khok-khok。我有请祢ê门徒kā伊赶鬼，m̄ koh，in lóng无法度。」
9:19 耶稣应讲：「Ai-ah！Chitê世代ê人ná ē hiahni̍h无信心？我tio̍h koh kah lín tòa gōa久？我tio̍h koh忍耐lín gōa久？Chhōa你hitê hō͘鬼附身ê kiáⁿ来我chia。」
9:20 Into̍h chhōa伊来耶稣hia。Hitê鬼一下看tio̍h耶稣，to̍h随时hō͘ hitê gín-á大抽chhoah，kā伊siak落去土脚，hō͘伊liàn来 liàn去koh流澜。
9:21 耶稣问gín-á ê老父讲：「伊hō͘鬼附身gōa久à？」Hitê老父讲：「自细汉to̍h ánne。
9:22 鬼tiāⁿ-tiāⁿ kā伊hiat落火，á是hiat落水，beh kā伊害死。Taⁿ祢若做ē到，求祢可怜阮，来kā阮帮赞。」
9:23 耶稣kā伊讲：「你怎样讲：『祢若会』？有信心ê人ta̍k项lóng ē。」
9:24 Gín-á ê老父随时大声hoah：「我信à；我ê信心若无够，求祢tio̍h帮赞我。」
9:25 耶稣看tio̍h kui阵人走óa来，就责备hitê邪神讲：「你chitê哑口koh臭耳聋ê鬼，我命令你离开chitê gín-á，m̄准你koh入去。」
9:26 Hitê鬼大声hoah，hō͘ hitê gín-á大抽chhoah了后chiah出去。Hitê gín-á变kahná死人。所以，真chē人讲：「伊死去à。」
9:27 M̄ koh，耶稣牵伊ê手，kā伊扶起来，伊to̍h起来。
9:28 耶稣入去厝内，门徒偷偷á问他讲：「是án怎阮无法度赶hitê鬼？」
9:29 耶稣应讲：「Chit款鬼tio̍h靠祈祷，chiah有法度kā伊赶出去。」
9:30 耶稣koh预言他ê死亡kah Koh活
(太17：22-23；路9：43b-45)
耶稣kah门徒tùi hia经过加利利省，耶稣无ài人知他tī tó位。
9:31 因为他teh教示门徒讲：「人子ē hō͘人出卖，人ē kā他害死。死了三日了后，他ēkoh活。」
9:32 门徒bē明白chit句话ê意思，koh m̄敢问他。
9:33 啥人Siōng大
(太18：1-5；路9：46-48)
耶稣kah门徒来到迦百农。耶稣tī厝里ê时，问in讲：「Lín tī路里teh议论啥物？」
9:34 门徒恬恬，因为in tī路里有互相争论啥人siōng大。
9:35 耶稣坐落来，叫十二使徒óa来，kā in讲：「人若ài beh做第一，tio̍h做众人ê路尾，mā tio̍h做众人ê差用。」
9:36 耶稣to̍h chhōa一个gín-á来hō͘伊khiā tī in中间，koh kā伊抱起来，对门徒讲：
9:37 「人若为tio̍h我ê名来接纳一个chit款gín-á ê，to̍h是接纳我；接纳我ê人，m̄是接纳我，是接纳差我来ê hit位。」
9:38 认bat咱ê盟友
(路9：49-50)
约翰kā耶稣讲：「老师，阮有看tio̍h一个人奉祢ê名teh赶鬼。阮kā伊阻挡，因为伊无teh tòe咱行。」
9:39 耶稣讲：「M̄-thang kā伊阻挡，因为无人奉我ê名行神迹，随时反tńg来讲我ê pháiⁿ话。
9:40 无反对咱ê人to̍h是赞成咱。
9:41 我实在kā lín讲，因为lín属基督，无论啥人用一杯水hō͘ lín lim，chitê人一定ē得tio̍h报赏。」
9:42 引起人犯罪ê Tāi-chì
(太18：6-9；路17：1-2)
耶稣讲：「无论啥人hō͘信我ê人中间微细ê一个犯罪，hitê人宁可hō͘人用大石磨缚tòa颔颈，hiat落去海里。
9:43 你ê一支手若引起你犯罪，tio̍h kā它斩hiat-ka̍k；宁可减一支手破相来入去tī永远活，比双手好好落地狱，hō͘ bē hoa去ê火烧khah好。
9:44 Tī hia teh kā in食ê虫bē死，teh kā in烧ê火mā bē hoa去。(注：有ê抄本无chit节)
9:45 你ê一支脚若引起你犯罪，tio̍h kā它斩hiat-ka̍k；宁可减一支脚破相来入去永远活，比双脚好好落地狱khah好。
9:46 Tī hia teh kā in食ê虫bē死，teh kā in烧ê火mā bē hoa去。(注：有ê抄本无chit节)
9:47 你ê一蕊目chiu 若引起你犯罪，tio̍h kā它挖hiat-ka̍k；宁可减一蕊目chiu 破相来入去上帝国度，比两蕊目chiu 好好落地狱khah好。
9:48 Tī hia teh kā in食ê虫bē死，teh kā in烧ê火mā bē hoa去。(注：赛66：24。有ê抄本无chit节)
9:49 因为ta̍k人lóng tio̍h用火来炼，亲像用盐sīⁿ。
9:50 盐本身真有路用，盐若失去它ê咸味，beh用啥物来回复它ê味？Lín ê内面应该tio̍h有盐ê作用，大家tio̍h互相和好。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。