马可福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
6:1 耶稣tī家乡Hông拒绝
(太13：53-58；路4：16-30)
耶稣离开hia，tńg去他ê故乡，门徒mā tòe他去。
6:2 到安息日，他to̍h tī会堂教示人。真chē人听tio̍h就奇怪，讲：「Chitê人ê本事是tùi tó位来？是啥人赏赐hō͘他chit款ê智慧？他án怎有权能行神迹？
6:3 他kám m̄是木匠师ê kiáⁿ？Kám m̄是马利亚ê kiáⁿ，雅各、约西、偤大kah西门ê兄弟？他ê姊妹kám m̄是kah咱tī chia？」In soah对耶稣起反感。
6:4 耶稣to̍h kā in讲：「先知tī kakī ê故乡、kakī ê宗族、kakī ê家庭以外，去到tó位lóngē受人尊重。」
6:5 他tī故乡bē tàng行啥物神迹，只不过用手hōaⁿ几个á病人来kā in医好。
6:6 耶稣对in ê m̄信感觉奇怪。耶稣差派十二个使徒
(太10：5-15；路9：1-6)
他to̍h去四箍围ê庄头行透透来教示人。
6:7 耶稣召集十二使徒来，to̍h差in一对一对出去，koh赏赐hō͘ in有权能来制压hiahê邪神。
6:8 他koh kā in吩咐：m̄ thang带路费，只有带一支拐á；m̄ thang带干粮；m̄ thang带行李袋；m̄ thang khǹg钱tī腰带；
6:9 tio̍h穿凉鞋，mā m̄ thang加带内衫。
6:10 耶稣koh kā in讲：「Lín无论去到啥物所在，tio̍h tòa tī欢迎lín ê人ê厝，一直到离开hitê所在。
6:11 无论tī啥物所在，人若m̄接纳lín，m̄听lín ê教示，lín离开hia ê时，tio̍h kā脚里ê土沙粉pōaⁿ清气，来对in警告。」
6:12 门徒to̍h出去传道，讲人tio̍h悔改。
6:13 In mā赶出真chē鬼，用油抹真chē病人，kā in医好。
6:14 行洗礼约翰ê死亡
(太4：1-12；路9：7-9)
希律王有听tio̍h耶稣ê tāichì，因为他ê名声已经传到ta̍k所在。有人讲：「他是行洗礼约翰tùi死人中koh活，所以，有权能行chiahê神迹。」
6:15 M̄ koh，mā有别人讲：「他是以利亚。」Koh有人讲：「他是先知，亲像古早ê一个先知。」
6:16 希律听tioh8to̍h讲：「伊是我kā伊斩头ê约翰，伊已经koh活起来。」
6:17 希律有派人去掠约翰来关监，原因是希律侵占小弟腓力ê bó͘希罗底。
6:18 约翰tiāⁿ-tiāⁿ 对希律讲：「你无应该占兄弟ê bó͘。」
6:19 希罗底就怨恨约翰，ài beh kā伊thâi，m̄ koh无法度实现。
6:20 因为希律知约翰ê做人公义koh圣洁，所以惊伊，mā有teh kā伊保护。希律每pái听tio̍h约翰ê话，心就操烦不安，m̄ koh伊iáu是欢喜ài听。
6:21 希罗底有tn̄g tio̍h好机会ê日，to̍h是希律做生日办桌，请hiahê文武百官kah加利利省民间ê头人。
6:22 希罗底 ê chabó͘ kiáⁿ入来跳舞，hō͘希律kah同桌ê来宾lóng欢喜。希律王kā chabó͘ gín-á讲：「看你ài啥物，做你求，我lóng beh hō͘你。」
6:23 希律koh对她chiùchōa讲：「无论你kā我讨啥物，连我ê国ê一半，我mā beh hō͘你。」
6:24 Cha-bó͘ gín-á出去问她ê老母，讲：「我tio̍h求啥物？」老母应讲：「行洗礼约翰ê头壳。」
6:25 Cha-bó͘ gín-á随时tńg来对王要求讲：「我ài你随时kā行洗礼约翰ê头壳贮tī盘里hō͘我。」
6:26 王ê心to̍h大忧闷；总是，伊bē tàng kā她拒绝，因为伊有tī众人ê面前chiùchōa。
6:27 王随时差派一个侍卫兵去监里the̍h约翰ê头壳来。侍卫兵to̍h去监里斩约翰ê头，
6:28 kā头壳贮tī盘里，phâng来hō͘ chabó͘ gín-á。Cha-bó͘ gín-á就the̍h去hō͘ in老母。
6:29 约翰ê门徒听tio̍h，to̍h来收伊ê身尸，kā伊埋葬tī墓里。
6:30 耶稣hō͘五千人食饱
(太14：13-21；路9：10-17；约6：1-14)
使徒lóng tńg来聚集tī耶稣ê面前，kā in所做kah所教示ê lóng kā他报告。
6:31 因为hit时出入ê人真chē，连食饭ê时间都无。耶稣kā in讲：「Án-ne, lín mā tio̍h kah我来去偏僻khah无人ê所在小歇困一下。」
6:32 In就闪开群众，坐船去偏僻ê所在tòa。
6:33 真chē人看tio̍h in离开，认出是in，to̍h tùi ta̍k个城市行陆路走进前，比in tāi先到hit所在。
6:34 耶稣一下上岸to̍h看tio̍h kui大阵ê人，就怜悯in，因为in亲像羊无牧者。他就教示in真chē项tāichì。
6:35 日beh落山ê时，门徒来kā耶稣讲：「Chia真偏僻，时间mā真òaⁿ à，
6:36 请kā群众解散，hō͘ in thang去附近ê庄头，kakī 买物件食。」
6:37 耶稣应讲：「Lín hō͘ in食。」门徒应讲：「总无阮tio̍h用两百个银á去买饼来hō͘ in食？」
6:38 耶稣问in讲：「Lín有gōa chē饼，去看māi lè。」In看了，to̍h讲：「有五块饼，mā有两尾鱼。」
6:39 耶稣to̍h吩咐门徒kā群众分组，坐tòa 青翠ê草埔。
6:40 群众就分组来坐，有ê一百人，有ê五十人。
6:41 耶稣the̍h起hit五块饼kah两尾鱼，ǹg天感谢了后，kā饼peh开，hō͘门徒去分hō͘群众，mā kā hit两尾鱼分hō͘群众。
6:42 大家lóng食kah真饱。
6:43 后来，门徒拾hiahê食chhun落来ê饼碎kah鱼屑á，贮满十二篮。
6:44 食饼ê chapo͘人to̍h有五千。
6:45 耶稣tī湖ê水面行
(太14：22-33；约6：15-21)
耶稣随时叫门徒紧上船，tāi先过去hit-pêng岸，到伯赛大。他kakī 留teh，来解散群众。
6:46 群众离开了后，耶稣to̍h去山里祈祷。
6:47 天已经暗à，船行到湖中，kantaⁿ耶稣kakī tī岸顶。
6:48 耶稣看tio̍h门徒chìⁿ风划桨真艰苦。暗时差不多四更，耶稣tùi湖ê水面行来in hia，ài beh tùi in ê边á过去。
6:49 门徒看tio̍h他行tī水面，掠做是鬼，to̍h大声hoah。
6:50 因为大家lóng有看tio̍h他，to̍h tio̍h惊。耶稣随时kā in讲：「安lín ê心，是我，m̄免惊。」
6:51 耶稣to̍h chiūⁿ船去kah in做伙，风to̍h恬去。门徒不止á tio̍h惊，soah gāng去。
6:52 因为in iáu未了解hit五块饼ê神迹；in ê心真钝。
6:53 耶稣tī革尼撒勒医好病人
(太14：34-36)
耶稣kah门徒过湖了后，来到革尼撒勒上岸，kā船抛tòa岸边。
6:54 In一下落船，众人随时认出耶稣。
6:55 众人tī hit地方行透透，群众听tio̍h耶稣tī啥物所在，to̍h用铺á扛病人去hia。
6:56 耶稣无论入去啥物庄头、城市、乡村，人to̍h kā病人khǹg tòa街路，求耶稣至少hō͘ in摸他ê衫á裾ê须。所有摸tio̍h ê人lóng得tio̍h医好。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。