但以理书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
8:1 看见公绵羊kah公山羊
伯沙撒王坐位第三年，koh有异象出现hō͘我—但以理看tio̍h，to̍h是tī我头一pái看tio̍h 异象ê以后。
8:2 我看tio̍h异象，看tio̍h ê时是tī以拦省书珊ê宫殿；我看tio̍h异象是tī U-lâi ê河边。
8:3 我gia̍h头teh看，你看，有公ê绵羊khiā tī河ê头前，它有两支角，两支角lóng高。Chit支比hit支khah koân，khah koân ê tòe尾后发。
8:4 我看tio̍h hit只公ê绵羊ǹg西、ǹg北、ǹg南来触。无一只兽有法度tī它ê面前khiā在，mā无人ē tàng救人脱出它ê手；它chhut-chāi kakī ê意思行，kakī 做大。
8:5 我teh想ê时，你看，有一只公ê山羊tùi西pêng来，它遍行全地，脚无踏tio̍h地。Chit只山羊tī它两蕊目chiu ê中央，有一支真映目ê角。
8:6 它去到有两支角ê公绵羊hia，to̍h是我所看tio̍h khiā tī河ê头前ê，它发大受气，走去chhōe hit只公绵羊。
8:7 我看tio̍h它óa近公ê绵羊，ǹg它发大受气，触hit只绵羊，phah断它两支角。绵羊无力thang khiā tī它ê面前；它to̍h hō͘ hit只公绵羊倒tī地里，kā它thún踏，无一个ē tàng救绵羊脱出它ê手。
8:8 Hit只山羊kakī 掠做真大。当它强猛ê时，hit支大支角phah断，有发四支映目ê角来代替，ǹg天ê四面方向。
8:9 In中间ê一支koh发出一支细支角，成做真大支，ǹg南、ǹg东、ǹg荣耀ê地。
8:10 它成做koân大，到tī天军，kā一kóa军队kah几nā个星辰hiat落地里，koh kā in thún踏。
8:11 而且它kakī 掠做koân大到tī军队ê主宰，除去ta̍k日所献hō͘他ê烧祭，koh毁坏他ê圣所。
8:12 为tio̍h罪过ê缘故，有军队kah日日所献ê烧祭交付它。它kā真理hiat tī地里，chhut-chāi kakī ê意思来行，lóng兴通。
8:13 我听tio̍h有一位圣ê teh讲话，koh有一位圣ê对hit位teh讲话ê讲：「Chitê异象，to̍h是讲tio̍h日日所献ê烧祭kah致使荒废ê罪恶，以及hō͘圣所kah军队受thún踏ê异象，ē到tang时？」
8:14 伊kā我讲：「Tio̍h到二千三百暝日，圣所to̍h ē得tio̍h清气。」
8:15 天使加百列解说异象
我—但以理，我有看tio̍h chitê异象，ài beh明白hitê意思。Hit时，忽然有一位亲像人ê款式ê khiā tī我ê面前。
8:16 我koh听tio̍h U-lâi河双pêng岸ê中间有人ê声hoah讲：「加百列，tio̍h hō͘ chitê人明白chitê异象。」
8:17 伊to̍h来到我khiā ・leh ê所在。伊一下来到位，我to̍h惊惶，仆tī土脚。伊kā我讲：「人子，你tio̍h明白，因为chitê异象是关系末日。」
8:18 伊kah我讲话ê时，我ê面仆tī土脚，soah困重眠；伊to̍h摸我，扶我khiā起来。
8:19 伊讲：「你看，我beh hō͘你知受气ê末日所ē发生ê tāichì，因为chitê是关系tī路尾所定tio̍h ê时。
8:20 「你所看tio̍h ê公ê绵羊，有两支角ê，to̍h是玛代kah波斯两 个王。
8:21 Hit只长毛ê公ê山羊to̍h是希腊王；伊两蕊目chiu 中间ê大支角to̍h是头一个王。
8:22 讲tio̍h hit支phah断ê角，tùi它ê底部koh发出四支角，代表有四国ē tùi伊ê国兴起，总是，权力kah伊bē比得。
8:23 「Hiahê国ê末日临到ê时，人ê罪恶贯满，就ē有一个王兴起，面貌凶恶，gâu用诡诈ê话。
8:24 伊ê权柄成做大，总是，m̄是tùi kakī ê权柄；伊ē行非常ê毁灭，mā ē兴通，koh照kakī ê意思来行，koh ē毁灭有权力ê kah圣ê子民。
8:25 伊用计谋hō͘伊诡诈ê手段兴通，心内掠kakī 做大。Tī in无提防ê时，伊毁灭真chē人；koh ē起来攻击万王ê王。总是，伊ē受毁坏，却m̄是用人ê手。
8:26 以前所讲ê-hng kah早起ê异象是真ê，总是，你tio̍h封密hitê异象，因为它是讲tio̍h真chē日后ê tāichì。」
8:27 就ánne，我—但以理昏迷，破病几nā日，然后起来办理王ê事务。我因为chitê异象tio̍h惊kah gāng去，无人ē了解其中ê意思。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。