出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 对待奴隶ê规定
(申15：12-18)
「你tī人民ê面前所tio̍h设立ê法度是ánne：
21:2 你若买希伯来人做奴仆，伊tio̍h服事你六年，第七年伊to̍hē tàng自由离开。
21:3 伊若是单身来，就单身离开；伊若是有bó͘，伊ê bó͘ to̍h kah伊做伙离开。
21:4 伊ê主人若kā伊娶bó͘，bó͘ kā伊生kiáⁿ á是chabó͘ kiáⁿ，bó͘ kah kiáⁿ儿tio̍h归主人，伊tio̍h单身离开。
21:5 设使奴仆明明讲：『我疼我ê主人、我ê bó͘ kah我ê kiáⁿ儿，无ài出去自由。』
21:6 伊ê主人to̍h tio̍h chhōa伊到敬拜上帝ê所在，koh tio̍h chhōa伊óa近门á是门框，主人tio̍h用钻á钻伊ê耳á，伊to̍h永远服事chitê主人。
21:7 「人若卖chabó͘ kiáⁿ hō͘人做女婢，她bē tàng亲像奴仆ánne离开。
21:8 主人若定tio̍h收伊做bó͘，后来，若看无kah意，to̍h tio̍h准她赎身；主人已经骗她，to̍h无权thang kā她卖hō͘外邦人。
21:9 主人若kā她定tio̍h hō͘ kakī ê kiáⁿ，to̍h tio̍h亲像kakī ê chabó͘ kiáⁿ kā她款待。
21:10 若有koh娶一个bó͘，她ê食、穿kah配合ê tāichì，犹原m̄ thang减少。
21:11 伊若无对第一个bó͘尽chit三项义务，她to̍h thang自由离开去，免用钱来赎。
21:12 刑罚暴力ê条例
Phah死人ê一定tio̍h hō͘伊死。
21:13 人若m̄是故意thâi人，是上帝交tī伊手中ê，我to̍h kā伊设一个所在，伊thang走去hia。
21:14 人若用诡诈ê计谋thâi伊ê厝边，to̍h是讲来tī我ê坛前，mā tio̍h掠去kā伊thâi死。
21:15 「Phah老父á是老母ê，一定tio̍h hō͘伊死。
21:16 「拐人去卖ê á是iáu tī伊ê手中ê，一定tio̍h hō͘伊死。
21:17 「咒诅老父á是老母ê，一定tio̍h hō͘伊死。
21:18 「人若冤家，chitê用石头á是拳头母phah hitê，iáu无致到死，不过是倒tī眠床，
21:19 若ē koh起来，óa靠拐á出去，hitê kā伊phah ê，thang算做是无罪；独独tio̍h赔伊bē做工ê钱，mā tio̍h kā伊医到完全好。
21:20 人若用槌á phah伊ê奴仆á是女婢，致到随时死，伊一定tio̍h受刑罚。
21:21 若过一两日chiah死，to̍h thang免受刑罚，因为是用伊ê钱买ê。
21:22 「人若相phah，伤害有娠（sin）孕ê chabó͘人，致使ka-la̍uh娠，后来，无别项ê伤害，hitê人tio̍h罚钱，照chabó͘人ê丈夫所定ê，tī官府ê面前hō͘伊。
21:23 若有别项ê伤害，to̍h tio̍h用命赔命。
21:24 目chiu 赔目chiu ，嘴齿赔嘴齿，手赔手，
21:25 脚赔脚，烧赔烧，伤赔伤，phah赔phah。
21:26 「人若phah-pháiⁿ伊ê奴仆á是女婢一蕊目chiu ，to̍h tio̍h因为in ê目chiu 放in去自由。
21:27 若phah-lak伊ê奴仆á是女婢一支嘴齿，to̍h tio̍h因为in ê嘴齿放in去自由。
21:28 物件主人ê责任
「牛若触死一个chapo͘人á是一个chabó͘人，tio̍h用石头tìm死hit只牛，总是，m̄ thang食它ê肉；牛ê主人算无罪。
21:29 设使hit只牛平时会触人，有人报伊ê主人知，伊竟然无kā牛关起来，致使触死chapo͘人á是chabó͘人，to̍h tio̍h用石头kā hit只牛tìm死，牛ê主人mā tio̍h死。
21:30 若是拟定用钱赎性命，to̍h tio̍h照所拟定ê来赎伊ê性命。
21:31 牛无论触tio̍h人ê kiáⁿ á是chabó͘ kiáⁿ，tio̍h照chitê例来办。
21:32 牛若触tio̍h奴仆á是女婢，tio̍h用银三十舍客勒hō͘ in ê主人，mā tio̍h用石头kā牛tìm死。
21:33 「人若掀开井á是掘井无盖kòa，有牛á是驴跋落去hit内面，
21:34 井ê主人tio̍h赔，mā tio̍h the̍h钱hō͘它ê主人，死ê chengseⁿ归伊kakī 。
21:35 「Chitê人ê牛若触tio̍h hitê人ê牛致到死，in tio̍h去卖活ê hit只牛，价钱平分，死ê牛mā tio̍h平分。
21:36 人若知chit只牛平时会触人，主人竟然无kā牛关teh，伊to̍htioh8用牛赔牛，死ê牛归伊kakī 。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。