以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
16:1 不忠ê耶路撒冷
上主ê话koh临到我，讲：
16:2 「人子，你tio̍h hō͘耶路撒冷知她hiahê可恶ê tāichì，
16:3 kā in讲，至koân上主对耶路撒冷ánne讲：你ê本源kah你ê出世是tī迦南地；亚摩利人是你ê老父，你ê老母是赫人。
16:4 讲tio̍h你出世ê景况，当你出世ê日无kā你tńg脐，mā无用水kā你洗hō͘你清气，lóng无kā你sám盐，mā无用布kā你包。
16:5 无人看顾你，kā你做chiahê tāichì，mā无人怜悯你；你出世ê日hō͘人hiat tī田野，是因为你hō͘人讨厌。
16:6 「我tùi你hia经过，看tio̍h你kō tī你ê血中，to̍h对你讲：你虽然tī你ê血中，iáu koh thang活leh。
16:7 我hō͘你长成，亲像田里所发生ê，你koh渐渐成（chiâⁿ）做大人，面貌清秀，奶phòng，头毛长；总是，你犹原赤身露体。
16:8 「我tùi你hia经过，看tio̍h你；你看，hit时是你兴起爱情ê时，我to̍h用衫á裾kā你盖teh，遮你thǹg光光ê身躯，koh对你chiùchōa，kah你结约，你就属tī我。这是至koân上主讲ê。
16:9 「Hit时，。我用水kā你洗，kā你身躯ê血洗清气，koh用油kā你抹。
16:10 我hō͘你穿绣花ê衫，mā hō͘你穿海狗皮ê鞋，mā用幼苎布hō͘你縖腰，koh用绸缎做衫hō͘你moa，
16:11 我用打扮ê物kā你打扮；用手环挂tī你ê手，用金链á挂tī你ê颔颈。
16:12 我mā用环挂tī你ê鼻；用耳钩挂tī你ê耳á，用súi ê帽á戴tī你ê头壳。
16:13 Án-ne，你to̍h有金银ê打扮，所穿ê是幼苎布kah绸缎，以及绣花ê衫；所食ê是幼幼ê面、蜂ê蜜kah油。你mā非常súi，发达到王后ê尊贵。
16:14 你súi ê名声传到tī列国中，是tùi你ê súi koh完全，因为我有用我ê荣光hō͘你。这是至koân上主讲ê。
16:15 「独独你óa靠kakī ê súi，koh因为你ê名声，to̍h行奸淫。你放纵淫欲，hō͘过路人chhut-chāi伊ê意思来行。
16:16 Koh用你ê衫，装饰（chong-sek）koân ê所在，五色lóng齐备（chê-pī）；tī hit顶面行奸淫。Chit款tāichì bē koh来，mā无koh有。
16:17 你mā取我所hō͘你ê金银kah súi ê宝器，为tio̍h你kakī 做chapo͘人ê像，kah它行奸淫；
16:18 koh用你绣花ê衫kā它moa，mā用我ê膏油，我ê芳料，排tī它ê面前；
16:19 而且koh kā我所赏赐hō͘你ê食物、幼面，以及油kah蜜，是我所用来养饲你ê，你to̍h kā伊排tī in ê面前，来做芳味，你实在有ánne做。这是至koân上主讲ê。
16:20 「你koh用你ê kiáⁿ儿，to̍h是你所kā我生ê，来献hō͘ in食。你行chiahê淫乱，kám是小khóa tāichì？
16:21 你竟然kohthâi死我chiahê kiáⁿ来交hō͘它，hō͘ in经过火来归tī它？
16:22 你行chiahê一切可恶kah淫乱ê tāichì，lóng无想tio̍h你细汉赤身露体，kō tī你血中ê日子。」
16:23 耶路撒冷亲像淫妇
（至koân上主讲：「你有灾祸à！有灾祸à！）
16:24 你行这一切pháiⁿ事以后，koh为kakī 起花楼，tī ta̍k条街路起高台。
16:25 你tī所有ê街路口起高台，hō͘你ê súi变做可恶ê，koh kah真chē过路ê人行奸淫。
16:26 你mā kah你ê隔壁国，放纵情欲ê埃及人行奸淫，加添你ê淫乱，惹我受气。
16:27 「你看，我伸出我ê手攻击你，减少你需要用ê物件，koh kā你交hō͘怨恨你ê腓利士hiahê chabó͘ gín-á，hō͘ in chhut-chāi意思款待你。In看tio̍h你行pháiⁿ来见笑。
16:28 「你因为好色不知足，koh kah亚述人行奸淫；kah in行奸淫了后，犹原无满意。
16:29 你koh tī迦南地去到迦勒底行真chē淫乱，iáu koh无满意。
16:30 至koân上主讲：你行这一切ê tāichì，是霸性淫妇ê所行，可见你ê心是gōa软弱！
16:31 因为你tī所有ê街路口起花楼，tī ta̍k条街路起高台，因为你无亲像别个娼妓，无ài钱。
16:32 Wah！你chitê行奸淫ê bó͘，beh ài别人来代替丈夫。
16:33 人是用物件送娼妓，你颠倒用物件送你相好ê人，请in tùi四箍围来kah你行奸淫。
16:34 你ê行奸淫kah别个 chabó͘人对反，因为m̄是人chhōe你行奸淫，是你用物件送人，m̄是人送你；所以，你kah别个 chabó͘人对反。」
16:35 上帝审判耶路撒冷
「因为ánne，你chitê娼妓，tio̍h听上主ê话。
16:36 至koân上主ánne讲：因为你piàⁿ出你ê污秽，你kah你所相好ê thǹg光光行奸淫，koh因为你所拜一切可恶ê偶像，koh为tio̍h所流你chiahê kiáⁿ ê血，to̍h是你所献hō͘ in ê；
16:37 你看，因为ánne，我beh聚集你所有相好ê，to̍h是你bat kah伊宴乐ê，kah你一切所疼ê，你一切所怨恨ê，我beh tùi四箍围聚集来攻击你，mā beh对in露出你ê thǹgpaktheh，hō͘ in看你ê thǹgpaktheh。
16:38 我mā beh审判你，亲像审判行奸淫kahthâi人ê chabó͘人。我beh用大受气、嫉妒hō͘你流血。
16:39 我koh beh kā你交tī in ê手，in ē拆毁你ê花楼，毁坏你ê城堡，thǹg你ê衫，抢你súi ê宝器，kā你留tī hia赤身露体。
16:40 「In mā ēchhōa真chē人起来攻击你，用石头kā你tìm死，用刀剑凿透你，
16:41 用火烧你ê厝宅，tī真chē chabó͘人ê面前审判你；我一定hō͘你无koh行奸淫，mā无koh送人物件。
16:42 Án-ne，我对你ê大受气to̍h ēsoah去，我ê嫉妒mā ē离开你，我beh安静无koh受气。
16:43 因为你bē记得你细汉ê日子，tī这一切ê tāichì来激我，所以我beh照你所行ê，报应tī你ê头壳顶，hō͘你无koh行奸淫，加添tī你一切可恶ê tāichì。这是至koân上主讲ê。」
16:44 有hit款ê老母to̍h有hit款ê Cha-bó͘ kiáⁿ
上主讲：「你看，见若讲俗语ê，ē用俗语kā你供（keng）体，讲：『有hit款ê老母to̍h有hit款ê chabó͘ kiáⁿ。』
16:45 你真正是lín老母ê chabó͘ kiáⁿ，讨厌她ê丈夫kah kiáⁿ儿；你真正是lín姊妹ê姊妹，讨厌in ê丈夫kah kiáⁿ儿。Lín老母是赫人，lín老父是亚摩利人。
16:46 「你ê大姊是撒马利亚，她kah她ê众chabó͘ kiáⁿ tiàm tī你ê倒pêng；你ê小妹是所多玛，她kah她ê众chabó͘ kiáⁿ tiàm tī你ê正pêng。
16:47 你无学in ê所行，mā无照in可恶ê tāichì去做，你掠做小khóa tāichì，你所行ê一切比in khah臭名声。
16:48 「至koân上主讲：我kí我ê永远活命来chiùchōa，你ê小妹所多玛kah她众chabó͘ kiáⁿ，无行你kah你众chabó͘ kiáⁿ所行ê tāichì。
16:49 你看，你ê小妹所多玛ê罪是chit款：她kah她ê众chabó͘ kiáⁿ心志骄傲，米粮饱足，享受khùiⁿ活，lóng无扶助困苦kah sànchhiah人ê手。
16:50 In骄傲，tī我ê面前行可恶ê tāichì，我看了to̍h kā in除去。
16:51 「撒马利亚所犯ê罪无你ê一半，你加添可恶ê tāichì比in khah chē，koh tùi你所行一切可恶ê tāichì，hō͘你ê姊妹显明是义。
16:52 你既然断定你ê姊妹做义，to̍h tio̍h担当你kakī ê凌辱；因为你所犯ê罪比in khah可恶，in to̍h比你khah有义；你已经hō͘你ê姊妹显明是义，你to̍h tio̍h见笑，担当kakī ê凌辱。」
16:53 所多玛kah撒马利亚会复兴
上主对耶路撒冷讲：「我beh hō͘ in受掠ê倒tńg来，to̍h是hō͘所多玛kah她ê众chabó͘ kiáⁿ受掠ê，撒马利亚kah她ê众chabó͘ kiáⁿ受掠ê，以及in中间受掠ê，lóngē倒tńg来，
16:54 thang hō͘你担当kakī ê凌辱，koh tùi你一切ê所行hō͘ in得tio̍h安慰ê，来见笑。
16:55 你ê姊妹所多玛kah她ê众chabó͘ kiáⁿ会tńg来原位；撒马利亚kah她ê众chabó͘ kiáⁿ会tńg来原位；你kah你ê众chabó͘ kiáⁿ mā ētńg来原位。
16:56 当你骄傲ê日，你ê嘴无讲起你ê小妹所多玛。
16:57 Hit时，你ê pháiⁿ iáu未发现，亚南chiahê chabó͘ kiáⁿ连她四箍围ê人iáu未凌辱你；腓利士chiahê chabó͘ kiáⁿ平时tī四箍围藐视你ê，她mā无凌辱你。
16:58 上主讲：你好（hò͘ⁿ）淫乱kah可恶ê tāichì，你已经担当à。」
16:59 永远ê约
「因为至koân上主ánne讲：你背约koh看轻chiùchōa，我beh照你所行ê来款待你。
16:60 总是，我beh追念我tī你少年ê时kah你所立ê约，mā beh kah你设立永远ê约。
16:61 当你接纳你ê姊妹，to̍h是你ê大姊kah你ê小妹ê时，你ē记得你所行ê来见笑；我mā beh kā in hō͘你做chabó͘ kiáⁿ，独独m̄是对你ê约。
16:62 我beh kah你设立我ê约，（你to̍h ē知我是上主），
16:63 到我赦免你一切所做ê时，你ē记得就见笑，koh因为你ê凌辱，to̍h无koh开嘴。这是至koân上主讲ê。」
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。