出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
18:1 叶忒罗来访问摩西
摩西ê丈人—米甸ê祭司叶忒罗，听tio̍h上帝为摩西kah他ê子民—以色列人所行一切ê tāichì，to̍h是上主chhōa以色列人出埃及ê tāichì。
18:2 摩西ê丈人叶忒罗chhōa摩西ê chabó͘人西坡拉来，to̍h是摩西前差她tńg去ê，
18:3 koh chhōa伊两 个kiáⁿ，一个名叫做革顺，因为摩西讲：「我寄脚tī外邦。」
18:4 另外一个名叫做以利以谢，因为摩西讲：「我ê父ê上帝帮赞我，救我脱离法老ê刀。」
18:5 摩西ê丈人叶忒罗，chhōa摩西两 个kiáⁿ kah伊ê chabó͘人，来到上帝ê山，to̍h是摩西tī旷野扎营ê所在。
18:6 伊kā摩西讲：「我是你ê丈人叶忒罗，chhōa你ê chabó͘人kah她ê两 个kiáⁿ，来你chia。」
18:7 摩西出去迎接伊ê丈人，对伊鞠躬行礼，kah伊chim嘴，做伙请安了后to̍h入去布棚。
18:8 摩西kā上主为以色列ê缘故对法老kah埃及人所行一切ê tāichì，以及路里所tú tio̍h一切ê艰难，kah上主án怎kā in拯救，lóng一一讲hō͘伊ê丈人听。
18:9 叶忒罗因为上主款待以色列人一切ê好事，救in脱离埃及人ê手，to̍h真欢喜。
18:10 叶忒罗讲：「上主是应该oló ê，他救lín脱离埃及人ê手，mā脱离法老ê手，救chiahê人民出埃及人ê手下。
18:11 Taⁿ我知影上主比hiahê神明khah伟大，to̍h是对in hiahê埃及人骄傲款待chiahê人民ê tāichì。
18:12 摩西ê丈人叶忒罗kā烧祭kah别款ê祭献hō͘上帝。亚伦kah以色列ê长老lóng来，tī上帝ê面前，kah摩西ê丈人做伙食。
18:13 指派审判官
(申1：9-18)
隔tńg工，摩西坐teh审判人民；人民tùi早起到ê-hng，lóng khiā óa来摩西ê身边。
18:14 摩西ê丈人看tio̍h伊对人民所做一切ê tāichì，to̍h讲：「你对人民所做ê是啥物tāichì？你ná ē kakī 坐teh，众人tùi早起到ê-hng lóng khiā tī你ê身边？」
18:15 摩西应伊ê丈人讲：「这是因为人民到我chia来问上帝。
18:16 In有tāichì ê时to̍h来我chia，我to̍h tī in双pêng ê中间kā in判断，hō͘ in知上帝ê律例kah法度。」
18:17 摩西ê丈人对伊讲：「你ánne做m̄好。
18:18 你kah你chiahê人民ē真损身，因为chitê tāichì hō͘你siuⁿ重ê担，你kakī 一个人做bē去。
18:19 Taⁿ你tio̍h听我ê话，我替你想讲，愿上帝kah你同在。你tio̍h替人民到上帝ê面前，kā案件请问上帝；
18:20 koh tio̍h kā律例kah法度教示in，指示in所tio̍h行ê路，所tio̍h做ê tāichì；
18:21 mā tio̍h tùi人民ê中间拣有才能ê人，to̍h是敬畏上帝，诚实无lāmsám，怨恨不义ê钱hit款人，设立in做人民ê序大，有ê管一千人，有ê管一百人，有ê管五十人，有ê管十人，
18:22 hō͘ in照时审判人民，大事tio̍h hō͘ in到你chia，小事in thang kakī 审判。Án-ne，你to̍h ēkhah减轻重担，in mā thang kah你做伙担当。
18:23 你若ánne行，上帝mā ánne吩咐你，你to̍h接（chih）载ē tiâu，chiahê人民mā thang安然到伊ê所在。」
18:24 就ánne，摩西遵thàn伊ê丈人ê话，lóng照伊所讲ê去行。
18:25 摩西tùi以色列人中间拣有才能ê人，设立in做人民ê序大，有ê管一千人，有ê管一百人，有ê管五十人，有ê管十人。
18:26 In照时审判人民，有oh得解决ê案件to̍h去摩西hia，若是ta̍k项小事，in to̍hkakī 审判。
18:27 后来，摩西送伊ê丈人出发，叶忒罗to̍h tńg去伊ê故乡。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。