出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
12:1 Pôaⁿ过节
上主tī埃及地对摩西kah亚伦讲：
12:2 「Chit月tio̍h做lín ê正月，做每年ê头一个月。
12:3 Lín tio̍h对以色列ê全会众讲：「本月初十，做老父ê tio̍h为全家ê人取羊á，一家一只。
12:4 若是一家ê人siuⁿ少，一只羊á食bē了，伊tio̍h kah厝边，照人额做伙取一只。Lín准备羊á，tio̍h按算ta̍k人所会食ê量。
12:5 Lín ê羊á tio̍h无缺点ê，未满年ê羊káng-á，lín tio̍h tùi绵羊中á是山羊中，lóng thang。
12:6 Lín tio̍h留到本月十四日，黄昏ê时，以色列全会众人lóng tioh8thâi羊á。
12:7 In tio̍h取淡薄á血，抹tī食羊á hit间厝ê双pêng ê门框 kah门楣。
12:8 Hit暝，tio̍h食用火逼ê羊á肉，kah无酵饼、苦菜chham-teh食。
12:9 M̄-thang生食，绝对m̄ thang用水煮，tio̍h用火煏，头、脚kah五脏lóng tio̍h食。
12:10 Lóng m̄ thang留隔暝，若留到隔工早起，tio̍h用火烧掉。
12:11 Lín tio̍h ánne食，腰縖带，脚穿鞋，手gia̍h 拐á，mā tio̍h赶紧食。这是上主ê Pôaⁿ过节。
12:12 「因为hit暝我beh遍行埃及地，phah死埃及地所有头水生ê，无论人á是chengseⁿ，koh beh审判埃及所有ê神明。我to̍h是上主。
12:13 Chitê血tī lín所tòa ê厝，beh做lín ê记号；我一下看tio̍h chitê血，to̍h ētùi lín pôaⁿ过去。我phah埃及地ê时，灾祸bē临到lín来kā lín毁灭。
12:14 Lín tio̍h用chit日做记念，做上主ê节来守，lín tio̍h代代守chitê节，做永远ê例。
12:15 无酵节
上主koh讲：「Lín tio̍h食无酵饼七日，头一日tio̍h tùi lín ta̍k间厝kā酵除去，因为tùi头一日到第七日，所有食有酵ê，ē tùi以色列中除去。
12:16 头一日，lín tio̍h有圣会，第七日mā tio̍h有圣会。Chit两日，除去准备ta̍k人所tio̍h食ê以外，无论啥物工lóng m̄ thang做。
12:17 Lín tio̍h守无酵节，因为我tútú tī hit日chhōa lín ê军队tùi埃及地出来。所以，lín tio̍h守chit日，ta̍k世代做永远ê例。
12:18 Tùi正月十四ê-hng到二一ê-hng，lín tio̍h食无酵饼。
12:19 Tī lín ta̍k间厝，七日内m̄ thang有酵，因为见若食有酵ê物，无论是寄脚ê á是本地ê，hitê人tio̍h tùi以色列会中除去。
12:20 有酵ê物，lín lóng m̄ thang食，tī lín所有tòa ê所在，tio̍h食无酵饼。」
12:21 第一pái ê Pôaⁿ过节
摩西to̍h叫以色列众长老来，kā in讲：「Lín ta̍k人tio̍h照家口取羊á，kā它thâi来做Pôaⁿ过节。
12:22 Lín tio̍h the̍h一把ê牛膝草，ùn盆内ê血，用盆内ê血抹门楣kah双pêng ê门框，lín无论啥人lóng m̄ thang tùi伊ê厝出门，一直到明á早起。
12:23 因为上主beh遍行，phah死埃及人，他看tio̍h血tī门楣kah双pêng ê门框，上主to̍h ēpôaⁿ过hitê门，m̄准灭性命ê入去lín ê厝，来phah死lín。
12:24 Chitê tāichì lín tio̍h遵守，做lín kah lín ê kiáⁿ孙永远ê例。
12:25 后来，lín来到上主照他所应允赏赐hō͘ lín hitê地，to̍h tio̍h守chitê礼仪。
12:26 Lín ê kiáⁿ儿若问lín：『是án怎行chitê礼仪？』
12:27 Lin2to̍h tio̍h讲：『这是上主Pôaⁿ过节ê祭，当以色列人tī埃及ê时，上主phah死埃及人，pôaⁿ过以色列人ê厝，救咱大家。』」就ánne，人民àⁿ头敬拜。
12:28 以色列人to̍h照ánne行，上主所吩咐摩西kah亚伦ê，in照ánne去行。
12:29 头胎ê long2thâi
到半暝，上主kā埃及地所有ê大kiáⁿ，to̍h是tùi坐位ê法老ê大kiáⁿ到监犯ê大kiáⁿ，以及头水生ê chengseⁿ，全部thâi死。
12:30 法老kah所有ê人臣，以及埃及ê群众，暗时lóng起来，tī埃及有大啼哭ê声，因为无一家无死人。
12:31 法老透暝召摩西kah亚伦来，讲：「起来！叫以色列人tio̍h tùi我ê人民中间出去，照lín所讲ê，去服事上主！
12:32 Μā照lín所讲ê，连羊群、牛群lóng带带去，mā tio̍h kā我祝福。」
12:33 埃及人迫人民，叫in赶紧离开in ê地，讲：「阮lóng死à。」
12:34 人民就the̍h无酵ê生面，kā chhiau面ê器具包tī衫á内，背tī肩胛头顶。
12:35 以色列人照摩西ê话行，tùi埃及人讨银器、金器kah衫裤。
12:36 上主hō͘人民tī埃及人ê面前得tio̍h恩典，照in所讨ê hō͘ in。就ánne，in去抢埃及人。
12:37 以色列人离开埃及
以色列人tùi兰塞去疏割，除gín-á以外，行路ê大人约有六十万。
12:38 Koh有真chē杂族ê人，mā有羊群、牛群、真chē chengseⁿ kah in做伙去。
12:39 In用tùi埃及带出来ê生面煏做无酵饼，无发酵，是因为受逼出埃及，bē tàng延chhiân得，mā无为kakī 准备啥物食物。
12:40 以色列人出外tī埃及，总共四百三十年。
12:41 到四百三十年满，tútú hit日，上主ê军队lóng tùi埃及地出来。
12:42 Chit暝，tio̍h为上主来守做记念日，因为他chhōa in出埃及地。这是上主ê暝，是以色列人民代代所tio̍h守ê记念日。
12:43 Pôaⁿ过节ê规定
上主对摩西kah亚伦讲：「Pôaⁿ过节ê例是ánne：外邦人lóng m̄ thang食Pôaⁿ过节。
12:44 独独ta̍k人用银买来ê奴仆已经kā伊行割礼ê，to̍h thang食。
12:45 寄脚ê kah倩工lóng m̄ thang食。
12:46 Tio̍h tī一间厝内食，一块肉mā m̄ thang带出去厝外，它ê骨一支mā m̄ thang phah断。
12:47 以色列人全会众lóng tio̍h守chitê节。
12:48 若有外族人出外tī lín中间，ài守Pôaⁿ过节来服事上主，伊所有ê chapo͘人tio̍h受割礼，然后伊to̍hthang来守chitê节，to̍h kah本族ê人无各样；总是，无受割礼ê人lóng m̄ thang守chitê节。
12:49 本族ê人kah外族ê人出外tī lín中间，lóng仝相siâng ê例。
12:50 以色列人民就ánne行，照上主所吩咐摩西kah亚伦ê去做。
12:51 当hit日，上主chhōa以色列人，照in ê军队，出埃及地。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。