创世记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
7:1 大水灾
上主对挪亚讲:「你kah你全家lóng tio̍h入大船,因为tī chit世代ê中间,我看tio̍h你tī我ê面前是义人。
7:2 见若清气ê chengseⁿ,你tio̍h带七只公ê,七只母ê;无清气ê chengseⁿ,你tio̍h带一只公ê,一只母ê。
7:3 天顶ê鸟mā tio̍h带,七只公ê,七只母ê,thang留in ê种活tī全地。
7:4 因为koh过七日,我beh落雨tī地chiūⁿ,四十工四十暝。我beh kā我所造ta̍k种ê活物lóng tùi地chiūⁿ剿灭。」
7:5 挪亚就照上主所kā伊命令ê,全部去行。
7:6 当大水泛滥tī地chiūⁿê时,挪亚六百岁。
7:7 挪亚to̍h kah伊ê kiáⁿ,伊ê bó͘,伊ê新妇,lóng入去大船,闪避大水。
7:8 清气ê chengseⁿ kah无清气ê chengseⁿ,飞鸟kah地chiūⁿ一切ê虫thōa,
7:9 lóng一对一对,有公ê有母ê,来到挪亚hia,进入大船;tú照上主命令挪亚ê。
7:10 过七日了后,大水泛滥tī地chiūⁿ。
7:11 当挪亚六百岁,二月十七日,hit日深渊ê水源lóng裂开,天mā破隙。
7:12 四十工四十暝,落雨tī地面上。
7:13 Tú-tú hit日,挪亚kah伊ê kiáⁿ—闪、含、雅弗kah挪亚ê bó͘,以及伊三个新妇lóng入去大船;
7:14 in kah百兽各照它ê类,一切ê chengseⁿ各照它ê类,一切tī地chiūⁿ趖(sô)ê虫thōa各照它ê类,一切有翼ê各照它ê类,一切ê飞鸟各照它ê类,lóng进入大船。
7:15 见若肉体内面有活气ê,lóng一对一对,来到挪亚hia,入去大船。
7:16 见若入去大船ê,lóng是有公有母ê肉体,tú照上帝所命令ê。上主to̍h kā in关tī大船内。
7:17 大水泛滥tī地chiūⁿ四十工;水涨ná koân,hō͘大船chhèng浮,船to̍h离地。
7:18 水势真大,tī地chiūⁿ直直涨起来;船漂流tī水面。
7:19 水势tī地chiūⁿ非常大,天下ê高山lóng hō͘大水淹密。
7:20 水势比山加涨高十五肘;山lóng hō͘大水淹密。
7:21 见若tī地chiūⁿ有肉体ê动物,to̍h是飞鸟、chengseⁿ、走兽,kah一切tī地chiūⁿ趖(sô)ê虫thōa,以及所有ê人类lóng死。
7:22 见若tī干地有鼻孔喘气ê生灵lóng死。
7:23 见若地chiūⁿ一切ê活物lóng受剿灭;人kah chengseⁿ、虫thōa,以及空中ê飞鸟,in lóng tùi地chiūⁿ受剿灭,只有挪亚chham hiahê kah伊tī船里ê留teh。
7:24 水势真大,tī地chiūⁿ经过一百五十工。
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。