传道书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
2:1 我心内想讲：「来！我用欢喜kā你试探，你thang享受安乐。」你看，这mā是空虚。
2:2 讲tio̍h好笑，我to̍h讲：「这是颠狂」；讲tio̍h欢喜，我to̍h讲：「这beh chhòng啥？」
2:3 我用心讲究走chhōe tio̍h án怎用酒hō͘我ê肉体khùiⁿ活；总是，我ê心犹原tio̍h hō͘智慧引chhōa；我mā 走chhōe tio̍h án怎擒tiâu愚戆，thèng候我看清楚，世间人tī天下，tī伊短短ê一生tio̍h行啥物tāichì chiah好。
2:4 我为tio̍h kakī 兴起大ê工程，为kakī 起厝，为kakī 栽葡萄园。
2:5 我为kakī 修造花园kah果子园，tī hit内面栽种ta̍k种ê果子树。
2:6 我为kakī 开水池，来灌ak培养生长ê树林。
2:7 我mā买奴仆kah女婢，mā有出世tī我厝内ê，mā有真chē牛群kah羊群，赢过我以前tī耶路撒冷hiahê人所有ê。
2:8 我koh为kakī 积聚金银，kah列王以及ta̍k省ê财宝，koh得tio̍h唱歌ê男女，kah世间人所欢喜ê物，koh有真chē宫妃。
2:9 Án-ne，我to̍h做大，赢过我以前所有tòa tī耶路撒冷ê人。而且，我ê智慧mā犹原kah我同在。
2:10 我ê目chiu 所意爱ê，我无kā它阻挡；我ê心所欢喜ê，我无kā它禁止。因为我ê心为tio̍h我所劳苦ê来快乐；这to̍h是我tùi所有ê劳苦来得tio̍h ê份额。
2:11 我看我ê手所做一切ê工，以及我所经历ê劳苦；你看，这lóng是空虚，lóng是teh掠风，tī日光ê下面lóng无利益。
2:12 我kakī oa̍t tńg来看智慧、颠狂kah愚戆；tī君王后辈ê人iáu ē tàng做啥物？to̍h是早前已经做过ê tāichì niā-niā。
2:13 Án-ne，我to̍h看出智慧赢过愚戆，亲像光明赢过乌暗。
2:14 智慧ê人ê目chiu 光明，愚戆ê人行tī乌暗。总是，我知in ê结局lóng相仝。
2:15 我to̍h心内想讲：「戆人所tú ・tio̍h ê，我mā ē ánne tú ・tio̍h；我kám m̄免比in khah有智慧？」我心内想讲：「这mā是空虚。」
2:16 智慧ê人kah愚戆ê人仝款无得tio̍h人永远ê记念，因为到将来ê日lóngē hō͘人bē记得。害ah！智慧ê人死去kah愚戆ê人无啥物无仝。
2:17 所以，我怨身戚命，因为tī日光ê下面所做ê工lóng是hō͘我劳苦；因为这lóng是空虚，lóng是掠风。
2:18 我怨恨我一切ê劳碌，to̍h是我tī日光ê下面所劳碌ê；因为我tio̍h留hō͘我以后ê人。
2:19 Hitê人是智慧á是愚戆，啥人ē知？而且我tī日光ê下面，用智慧劳碌所做成ê，伊ē kā它管辖。这mā是空虚。
2:20 因为ánne，我倒tńg去想，为tio̍h我tī日光ê下面ê劳碌hō͘我真失望。
2:21 因为有人用智慧、智识、本事来劳碌，总是，伊tio̍h kā一切留hō͘ hiahê m̄ bat劳碌ê人做产业。这mā是空虚，mā是大不幸。
2:22 因为人tī日光ê下面劳碌劳心，有得tio̍h啥物？
2:23 因为伊一生忧闷操心，伊ê劳碌成做痛苦，连暗时心神mā无安息。这mā是空虚。
2:24 人不如来食来lim，koh hō͘心享受伊所劳苦ê成果。我看，chitê mā是出tī上帝ê手。
2:25 讲tio̍h lim食á是享福，啥人ē赢过我？
2:26 因为上帝所欢喜ê人，他to̍h hō͘伊有智慧、智识kah快乐；独独有罪ê人他hō͘伊劳苦来收集、来积聚，thang归tī上帝所欢喜ê人。这mā是空虚，mā是掠风。
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。